“​ស្ពាន​កំពង់ហ្លួង​”
បទ​ភ្លេង​ទំនុក​ច្រៀង​    ​       សម្រួល​តន្ត្រី​    ​      ​  ច្រៀង​ដោយ​
​      គ​ង្គ ប៊ុន​ឈឿន​    ​    ​         កែវ អែម​    ​             ​សូ សាវឿន​
​    ​
    -​    ​សុរិយា​លា​ព្រៃ​    ​    ​           រៃ​យំ​បោក​ប្រាណ​
​    ​    ​ក្លិន​ក្លែប​រុះ​រោយ​លើ​ស្ពាន​    ​   ជា​ឋាន​វិមាន​ស្នេហ៍​ខ្ញុំ​
​    ​    ​ពាម​នឹក​ដួងចិត្ត​    ​                   ​ប្រឌិត​រឿង​សោ​ក​សណ្តំ​
​    ​    ​ភូមិ​សង្វរ​ព្រៃ​ជ្រៅ​ធំ​    ​             ទួញយំ​សុំ​ក្តីមេត្តា ។​
    -​    ​រាត្រី ដែល​យើង​ជួប​គ្នា​ដំបូង​
​        លើ​ស្ពាន​នៅ​កំពង់ហ្លួង​    ​       ផ្កាយ​ព្រោងព្រាត​លើ​មេ​ឃា​
​        ពេលដែល​យើង​បែក​    ​          ស្ពាន​ស្រែក​អង្វរ​សួរថា​
​        តើ​ម្ចាស់​ខ្ញុំ​ទៅ​ឋាន​ណា​    ​       ប្រាថ្នា​សូម​ជួប​ជាថ្មី ។​
    R​-​    ​ឱ​!​កំពង់​ហ្លួង​    ​    ​                ជួង​មាស​ដាក់​កម្ម​
​    ​    កន្សែង​ចិញ្ចៀន​ស្រែ​កផ្តាំ​    ​    ចារ​ចាំចិត្ត​ចង​នឹង​ថ្លៃ​
​        ​បើ​បង​រៀបការ​    ​                 ​   ប្រាថ្នា​គូ​ថ្មី​
​    ​    បង​អើយ​កុំ​ភ្លេច​ហៅ​ស្រី​    ​     ចងដៃ​ប្រុស​ថ្លៃ​កុំ​ខាន ។​
    -​    ​គូ​ពុំបាន​ព្រៀង​    ​              ​ច្រៀង​តែ​កម្មផល​
​        ​លេប​ឆ្អែត​ទុក្ខសោក​កង្វល់​    ​ដែល​ផ្តល់ឱ្យ​យើង​ចែក​ឋាន​
​    ​    កាត់​សាច់​មួយ​ដុំ​    ​    ​             ប្រាថ្នា​សុំឱ្យ​សុខសាន្ត​
​    ​    បើ​ជាតិ​នេះ​ប្រែ​ខកខាន​    ​      ជាតិ​ក្រោយ​សូម​បាន​ជួប​អើយ ។​
​ប្រវត្តិ​ដើម​
​        បទ​“​ស្ពាន​កំពង់ហ្លួង​”ពិពណ៌នា​ពី​ការ​ចាប់កំណើត​និង​ការ​រលាយ​ទៅ​វិញ​នូវ​ស្នេហា របស់​តារាចម្រៀងសូ សាវឿន និង​តន្ត្រីករ កែវ អែម ។ ស្នេហា​របស់​គូសង្សារ​មួយគូ​នេះ
ចាប់កំណើត​នៅលើ​ស្ពាន​កំពង​ហ្លួង ហើយរលាយ​ទៅវិញក៏​នៅ​លើ​ស្ពាន​កំពង់ហ្លួង  ​ដែរ ។​
​        បទ​នេះ លោក​លោក​គ​ង្គ ប៊ុន​ឈឿន និពន្ធ​និង​ថត​នៅ​ឆ្នាំ​១៩៦៥ ជាមួយគ្នា​នឹង​បទ​វិញាណ​ផ្នូរ​ខ្ញុំ ប៉ុន្តែ​ខ្លឹមសារ​របស់​ទំនុកច្រៀង លោក​គ​ង្គ ប៊ុន​ឈឿន​បាន​សរសេរ​យោល​ទៅតាម​សំណូមពរ​របស់​អ្នកស្រី សូ សាវឿន ព្រោះ​អ្នកស្រី​ចង់ឱ្យលោក​សរសេរ​ពី​ភូមិ កំណើត​របស់​អ្នកស្រី គឺ​ភូមិ​កំពង់​ហ្លួង ។​
​       លោក​គ​ង្គ ប៊ុន​ឈឿន បានបញ្ជាក់​ថា អ្វីៗ​ទាំងអស់ ដែល​ជា​ជីវិត​ស្នេហា​បឋមវ័យ​របស់​អ្នកស្រី សូ សាវឿន បាន​ត្រូវ​ប្រមូលផ្តុំ​មក​បកស្រាយ​នៅក្នុង​បទ​ចម្រៀង​នេះ ពិសេស​គឺ​ទីតាំង​ដ៏​សំខាន់ ដែល​ធ្វើឱ្យ​ស្នេហា​របស់​អ្នកស្រីចាប់កំណើត​ឡើង និង​រលាយ​ទៅវិញ នៅលើ​ស្ពាន​កំពង់ហ្លួង​នេះឯង ។​
​      បទ​“​ស្ពាន​កំពង់ហ្លួង​”​ប្រគំ​ដោយ​វង់​តន្ត្រី យោធា​ភិរម្យ ថត​នៅ​ស្ទីឌីយ៉ូ​វិទ្យុជាតិ ប៉ុន្តែ​ក្រោយពី​ចាក់ផ្សាយទៅ មាន​ប្រជាប្រិយភាព​ល្បីល្បាញដ៏​ខ្លាំងក្លា ទើប​ក្រុមហ៊ុន​ថត​ថាស បាន​ទិញយក​ទៅ​ថត​បញ្ចូល​ក្នុង​ថា​ស និង​ដាក់ក្នុងការ​ស្សែត ។​
​      លោក​គ​ង្គ ប៊ុន​ឈឿន បាន​បញ្ជាក់​ឱ្យដឹង​បន្ថែមថា សព្វថ្ងៃ មិន​ត្រឹមតែ​អ្នកស្រី សូ- សាវឿន យក​ទៅ​ច្រៀងនៅ​ប្រទេស​បារាំង​ប៉ុណ្ណោះ​ទេ សូម្បី​តែ​ក្នុង​ស្រុក​ខ្មែរ ក៏​គេ​និយម​យក​បទ​នេះ​ទៅ​ច្រៀង​ស្ទើរ​គ្រប់ទិសទី​ដែរ ខ្លះ​ក៏ច្រៀង​តាម​ទំនុក​ដើម​ទាំងស្រុង ខ្លះ​ក៏​យក​ទៅ​កែប្រែ​ទំនុកច្រៀង​ថ្មី​វិញ ។ ប៉ុន្តែ​គួរ​ឱ្យ​ស្តាយ​ណាស់ ក្រុមហ៊ុន​ថតកា​រ៉ា​អូ​ខេ បាន​យក​បទ​នេះ​ទៅ​ថត ដោយ​សរសេរ​ខុស​ទំនុកច្រៀង​ច្រើន​អន្លើ ប្រហែល​ជា​ស្តាប់​ អ្នកចម្រៀង​ដើមមិន​ច្បាស់​ក៏​មិនដឹង ៘​
​      អាស្រ័យហេតុនេះ លោក​គ​ង្គ ប៊ុន​ឈឿន​បានបញ្ជាក់​ថា ចាប់ពី​ពេលនេះ​ទៅ សូម​អស់លោក​អ្នក​នាង​កញ្ញាដែល​ច្រៀង កុំឱ្យ​មាន​ការភ័ន្តច្រឡំ​ប៉ា​រ៉ូល​តទៅទៀត ហើយ​លោក​សូម​ឧទ្ទិស​បទ​នេះ​ដល់​វិញ្ញាក្ខន្ធ​លោក កែវ អែម ដែល​គាត់​បាន​ខ្នះខ្នែង​ជួយ​ជ្រោមជ្រែង​ធ្វើ Arrangement បទ និង​រៀបចំ​ប្រគំ​រហូត​ទាល់តែ​បាន សម្រេច​ចេញជា រូបរាង ទុកជា​កេរ្តិ៍មរតក​រហូតមក​ដល់​បច្ចុប្បន្ន​នេះ ។​
​    ​“​ស្ពាន​កំពង់ហ្លួង គឺជា​ស្ពាន​ស្នេហា​រវាង​លោក កែវ អែម និង​នាង សូ សាវឿន
ដែល​ស្ថិតនៅ​ជា​អមតៈ ក្នុង​បេះដូង​ប្រជាជន​ខ្មែរ​គ្រប់ពេល​ជំនាន់​...”-​លោក​ប៊ុន​ឈឿន​បញ្ជាក់បន្ថែម ។​

តន្ត្រី ចម្រៀង