khmer star,music,song

ម្លប់ដូងទី១០

   បទភ្លេងទំនុកច្រៀង   សម្រួលតន្ត្រី         ច្រៀងដោយ
   គង្គ ប៊ុនឈឿន          ហាស់ សាឡន      ស៊ីន ស៊ីសាមុត
      ១-   មើលស្ទឹងសង្កែ   មើលខ្សែទឹកហូរ   រគាំងវត្តពោធិ
         លាយនឹងជំនោរ   ថ្ងួចថ្ងូរផ្តាំពេលសាយណ្ណ
         រៃយំទ្រហ៊ឹង   លាស្ទឹងកវីនិពន្ធ
         សុរិយាទោរទន់   ពួនក្រោយផ្ទះស្រី ។
      ២-   ដើមដូងទីដប់   ម្លប់គ្របមាត់ស្ទឹង   បងឈររំពឹង
         ឈរចាំព្រលឹង   ស្ងាត់ឈឹងកណ្តាលរាត្រី
         អូនភ្លេចសន្យា   ដែលបានវាចាពីថ្ងៃ
         ថាម៉ោងប្រាំបី   ស្រីមកជួបបង ។
      R-   ឥឡូវស្ងាត់សូន្យ   ដូនក្បូនរសាត់
         ទឹកកួចសំណាត់   ហូរលឿនកន្លង
         បុណ្យផ្កាវត្តពោធិ   នៅមិនទាន់ឆ្លង
         មិនគួរនួនល្អង   បែរខ្នងសូន្យសោះ ។
      ៣-   ភ្លេងការគ្រឹមៗ   ពីទួលតាឯក   ក្លាយជាខ្លងខែក
         នារីពស់វែក   បិទភ្នែករៀបការនឹងប្រុស
         បងឈរមាត់ស្ទឹង   ប្រឹងយំរងំក្នុងពោះ
         លាស្រីស្រោមងោះ   ឈ្មោះក្នុងជាខ្លា ។

ប្រវត្តិដើម

   បទ“ម្លប់ដូងទី១០” បានចាប់កំណើតឡីងនៅក្នុងកំណត់ហេតុនិពន្ធរបស់លោកគង្គ ប៊ុនឈឿន អំពីប្រវត្តិស្នេហ៍ឈឺចាប់របស់លោកជាមួយនារីក្រមុំជាកូនស្រីអ្នកជិតខាងរបស់លោកម្នាក់តាំងពីឆ្នាំ១៩៦៩ម្ល៉េះ ។ ប៉ុន្តែ កំណត់ហេតុនិពន្ធនេះ លោកបានត្រឹមតែតាក់តែងទុកចោលនៅក្នុងសៀវភៅប៉ុណ្ណោះ លោកមិនទាន់បានបញ្ចោញឱ្យ អ្នកចម្រៀងណាម្នាក់បកស្រាយនៅឡើយ ។ រហូតដល់ឆ្នាំ១៩៧២ ទើបលោករៀបចំបទនេះឡើងវិញ ដើម្បីថត ផ្សាយ ។
   ខេត្តបាត់ដំបង ជាទឹកដីកំណើតរបស់លោកគង្គ ប៊ុនឈឿន ដែលបានចិញ្ចឹមរូបលោកតាំងពីតូច ដល់ធំ ក្នុងបរិយាកាសមួយដ៏ស្រងេះស្រងោចពន់ប្រមាណ ។ ឯស្ទឹងសង្កែ ក៏ជាស្ទឹងទឹកខ្មៅសម្រាប់ជីវិតកវីនិពន្ធ របស់លោក ដែលលោកជ្រលក់សរសេរមិនចេះរីងស្ងួតដែរ មិនតែប៉ុណ្ណោះ វាជាកន្លែងមួយបណ្តុះអនុស្សាវរីយ៍រាប់មិន អស់ នៅក្នុងឆាកជីវិតស្នេហាបឋមវ័យរបស់លោកទៀតផង ។
   ក្នុងចំណោមដើមដូងទាំងជួរនៅត្រើយខាងលិចស្ទឹងសង្កែ មានដើមដូងមួយស្ថិតនៅចំពីមុខកំពង់ វត្តវាល និងមានកៅអីថ្មមួយ ដែលលោកគង្គ ប៊ុនុឈឿនធ្លាប់ទៅអង្គុយបណ្តែតអារម្មណ៍នៅរាល់ពេលទឹកជន់ និង ទឹកស្រក ។
   កាលណោះ នៅចំពេលដែលដំណើរជីវិតរបស់លោកគង្គ ប៊ុនឈឿន បានធ្លាក់ចុះដុនដាបមែន ទែន ។ ម្តាយរបស់លោកបានឈឺស្លាប់នៅក្រោមផ្ទះរបស់គេ លោកបានលះបង់ការសិក្សា ហើយគ្មានការងារធ្វើ   ទេ ។ កូនស្រីអ្នកជិតខាងរបស់លោកម្នាក់ ដែលលោកបានលួចស្រឡាញ់ ហើយដែលនាងធ្លាប់បានសច្ចាស្បថស្បែ ថាស្មោះស្ម័គ្រ ស្រឡាញតែលោកដែរនោះ បានប្រែចិត្តបោះបង់លោកចោលដោយគ្មានអាល័យ ។ លោក       គង្គ ប៊ុនឈឿន បាននិយាយថា“ពេលមួយខ្ញុំបានណាត់ជួបនាងនៅមាត់ស្ទឹងសង្កែ ក្រោមម្លប់ដើមដូងទី១០ តែនាង មិនមក ទោះជាខ្ញុំបានណាត់សន្យាកាលពីថ្ងៃហើយក៏ដោយ” ។
   ទឹកជន់ ទឹកហូរកាចស្ទឹង បោះពួយនាំពពុះសំណាត់រសាត់ទៅកាន់បឹងទន្លេសាប ដោយគ្មានវិល ត្រឡប់ ពាំនាំទាំងស្នេហាអស់សង្ឃឹមរបស់លោកគង្គ ប៊ុនឈឿន ទៅជាមួយផង ធ្វើឱ្យបេះដូងលោកមានរបួស ...។ រហូតមកដល់ឆ្នាំ១៩៧២ ទើបលោកគង្គ ប៊ុនឈឿន រៀបចំបទចម្រៀងដែលលោកបានតាក់តែងទុកចោល នៅក្នុងសៀវភៅឡើង ដើម្បីថតផ្សាយ ដោយដាក់ចំណងជើងថា“ម្លប់ដូងទី១០” ហើយលោកស៊ីន ស៊ីសាមុតជាអ្នក   ច្រៀង ។
   បទ“ម្លប់ដូងទី១០”នេះ លោកស៊ីន ស៊ីសាមុតច្រៀងផង ខ្សឹកខ្សួលអួលដើមកផង ហាក់ដូចជា លោកជួយរួមចំណែកកាន់ទុក្ខអតីតស្នេហារបស់លោកគង្គ ប៊ុនឈឿន ដែលមានកំណើតឡើងនៅមាត់ស្ទឹងសង្កែ ហើយត្រូវរលាយទៅវិញនៅមាត់ស្ទឹងសង្កែនោះដែរ ។
   បទនេះ ស្ថិតនៅក្នុងកម្រងចម្រៀង“កំលោះហុងដា កញ្ញាប៉េសេ” ដែលមានប្រជាប្រិយភាពចំពោះ អ្នកស្នេហាតន្ត្រី រហូតមកដល់ពេលបច្ចុប្បន្ននេះ ឥតមានស្រកស្រុតឡើយ ។

តន្ត្រី ចម្រៀង