khmer star,music,song

ទឹកភ្នែកឪពុក

បទភ្លេងទំនុកច្រៀង      សម្រួលតន្ត្រី      ច្រៀងដោយ
គង្គ ប៊ុនឈឿន      ម៊ែរ ប៊ុន      ស៊ីន ស៊ីសាមុត
១-   ជើងមេឃវែងឆ្ងាយ   ឆ្ងាយពីរូបខ្ញុំ
   ប្រៀបបានប្រាណមុំ   ឃ្លាតឆ្ងាយចោលខ្ញុំ   ក្រៀមក្រំសៅហ្មង
   សល់តែបុត្រី      បីលើដៃបង      ខ្សឹកខ្សួលកន្លង
   យំរកនួនល្អង   ឱ្យបងខ្លោចផ្សា ។
២-   ឱទារិកា   វាសនាឥតន័យ
   អ្នកកុំយំថ្វី   សូម្បីបក្សីគង់ខំនិន្ទ្រា
   ទ្រាំទៅតាមខ្សែជីវិតកំព្រា      វាលវដ្តសង្សារ
   មហាធំធេង      វង្វេងកោះត្រើយ ។
R-   កាចសាហាវ   ព្រហ្មលិខិត
   គ្មានអាណិត      ដល់ចិត្តស្នេហ៍ខ្ញុំឡើយ
   ឱស ឱ!...      ធ្វើម្តេចមច្ចុរាជអើយ
   មិនមកផ្តាច់ជីវិតឱ្យហើយ   ឱ្យផុតត្រើយព្យុះកម្មវេរា ។
៣-   បើប៉ាមរណា   ឃ្លាតឃ្លាចោលស្ងួន
   ម្ល៉េះសមរូបកូន   គ្មានអ្វីជ្រកពួន   ជ្រកកោនឡើយណា
   ណ្ហើយចុះស៊ូទ្រាំ   ចាំភពមេត្តា
   ផ្តល់ព្រេងវាសនា   ជួយយកអាសារសង្ខារយើងអើយ ។

ប្រវត្តិដើម

   បទ“ទឹកភ្នែកឪពុក” លោកគង្គ ប៊ុនឈឿនមានអនុស្សាវរីយ៍កម្សត់កម្រជាងគេនៅក្នុងឆាកជីវិត ព្រោះជា បទដែលលោកសរសេរសម្រាប់បញ្ចូលក្នុងខ្សែភាពយន្តរឿង“ទឹកភ្នែកឪពុក” ដែលលោកបានថតនៅឆ្នាំ១៩៦៤ ជា ពេលដែលលោកបានជួបស្នេហ៍ជាមួយប្រពន្ធលោក ព្រោះពេលនោះ ប្រពន្ធលោកក៏ដើរជាតួឯកនៅក្នុងរឿងនេះដែរ ។
   គួររំលឹកឡើងវិញខ្លះថា ក្រោយពេលដែលលោកគង្គ ប៊ុនឈឿនចេញពីមន្ទីរឃុំឃាំង ព្រោះវិបត្តិប្រលោម លោកឈ្មោះវិមាននរកនោះមក គ្មានបណ្ណាគារណាហ៊ានទទួលសៀវភៅលោកយកទៅបោះពុម្ពឡើយ ដោយគេខ្លាច មានរឿង ទើបលោកមានការលំបាកជាខ្លាំងក្នុងជីវភាពរស់នៅ ។
   តែគាប់ជួនពេលនោះ ផលិតកម្មចក្រវាឡភាពយន្ត បានផ្តល់ជាសម្ភារៈ និងលុយកាក់ខ្លះឱ្យលោកមករៀបចំ ថតរឿងទឹកភ្នែកឪពុកនេះ ។ គឺរឿងនេះហើយ ដែលបងប្រុសរបស់លោកឈ្មោះគង្គ ប៊ុនឆោម ត្រូវស្លាប់ពាក់កណ្តាល រឿង ដោយសារមានជំងឺ ហើយពេលនោះ គាត់ក៏ជាតួកំប្លែង និងជាអ្នកកាន់កាមេរ៉ាថតរឿងនោះទៀតផង ។
   ចំពោះមុខសភាពការណ៍នេះ លោកគង្គ ប៊ុនឈឿន ត្រូវបង្ខំចិត្តរកលុយមកថតបន្តរឿងនេះឱ្យចប់ ហើយសូម្បីតែពេលដែលយកបទទឹកភ្នែកឪពុកទៅថត ក៏ថតរួចពុំទាន់មានលុយឱ្យថ្លៃឈ្នួលអ្នកចម្រៀង អ្នកភ្លេង និងថ្លៃស្ទីឌីយ៉ូដែរ គឺជំពាក់គេសិន ។ ពេលនោះ លោកខំសម្ងំគូរសៀវភៅរូបភាពបានពីរបីរឿង យកទៅលក់ឱ្យគេ ទើបយកលុយមកសងថ្លៃថតបទទឹកភ្នែកឪពុកនេះ ។
   មានប្រផ្នូលជាមេរៀនក្នុងជីវិតថា រឿងអ្វីក៏ដោយ បើដាក់ចំណងជើងថាទឹកភ្នែកនៅពីមុខ មុខជាជួបប្រទះ តែទឹកភ្នែកតាំងពីដើមដល់ចប់ ។ ប៉ុន្តែបទនេះ ពេលដែលចាក់ផ្សាយភ្លាម បានទទួលការនិយមជាខ្លាំងពីគ្រប់មជ្ឈដ្ឋាន ដោយសារពាក្យពេចន៍ទំនុកច្រៀង និងមេឡូឌី ធ្វើឱ្យអ្នកស្តាប់អណ្តែតអណ្តូងទៅដល់ពិភពមួយដែលស្មានមិនត្រូវ ។
   លោកគង្គ ប៊ុនឈឿន ក៏មិនភ្លេចគុណដែរ ចំពោះលោកវ៉ោយ ហូរ ដែលជាមិត្តសម្លាញ់រួមអាជីពដូចគ្នា ដែលបានទំនាក់ទំនងនិងជួយសម្រួលការឱ្យលោកបានថតបទទឹកភ្នែកឪពុកនេះ ព្រោះពេលនោះ លោកគ្មានស្គាល់អ្នក ភ្លេង ឬអ្នកចម្រៀងណាម្នាក់ឡើយ ។
   បទទឹកភ្នែកឪពុក រៀបចំថតមុនបទលាហើយសោភីនីទៅទៀត ។

តន្ត្រី ចម្រៀង