បទ​ភ្លេង​ទំនុក​ច្រៀង​    ​    ​សម្រួល​តន្ត្រី​    ​    ​ច្រៀង​ដោយ​
​គ​ង្គ ប៊ុន​ឈឿន​    ​    ​កែវ អែម​    ​    ​ស៊ីន​ ស៊ី​សាមុត​

​    ​១-​    ​ស៊ូ ដើរ​ចេញ​ទ្រូង​ពេញ​ដោយ​ទុក្ខ​
​    ​    ​ជាជាង​ឱនក្រាប​លាក់​មុខ​
​    ​    ​ឱ្យ​ប្តី​សោយសុខ​    ​លើ​ត្រើយ​វាសនា​
​    ​    ​ល្ខោន​ស្នេហ៍​សង្គ្រាម​    ​ហូរ​ឈាម​ដាប​លោក​ឫស្យា​
​    ​    ​កងចក្រ​ឬ​ផ្កា​    ​ចារ​ចង​ជា​អន្ទាក់​? ។​
​    ​២-​    ​កូន ក្នុង​ផ្ទៃ​    ​ស្នាដៃ​ឃាតក​
​    ​    ​ទឹកក្រុត​    ​ដុត​ទ្រូង​អ្នកក្រ​
​    ​    ​យក​ឈាម​លាយ​ស្ករ​    ​ស្លរ​ជា​ច្រវាក់​
​    ​    ​អណ្តាត​ផ្ទាប់​ប្រាក់​    ​ពាក់​ស្រោម​ស្នេហ៍​ឃោរឃៅ ។​
​    ​R-​    ​ឱ ព្រៃភ្នំ​    ​អ្នក​កុំ​ចំអក​
​    ​    ​បើ​ជាតិ​នេះ​ប្រែជា​ខក​    ​ក៏​ខក​ព្រោះក្តី​ល្ងង់ខ្លៅ​
​    ​    ​ស៊ូ លុបលាង​ស្នាមដំបៅ​
​    ​    ​មិន​ឱ្យ​ធ្លាក់​ជ្រោះ​ជ្រៅ​    ​សំណៅ​អវិចី​ស្នេហា ។​
​    ​៣-​    ​ទ្រាំ ស៊ូទ្រាំ​ពាំ​ខ្នាះ​ជីវិត​
​    ​    ​ធ្មេចភ្នែក​ខ្ពើម​ភព​ងងឹត​    ​រំលាយ​អតីត​ដែល​ឥត​ខ្លឹមសារ​
​    ​    ​បើ​គេ​ត្រឡប់​    ​គួរ​រាប់​ទុក​ជា​តម្រា​
​    ​    ​ដូច​ពាក្យ​លោក​ថា​    ​អារ​សាច់​ជូន​ខ្លា​    ​ទើប​នៅ​ស្រុក​បាន ។​

​    ​បទ​“​នេះ​ឬ​ជីវិត​?” លោក​គ​ង្គ ប៊ុន​ឈឿន និពន្ធ​នៅ​ចុងឆ្នាំ​១៩៧០ ក្រោយពេល​រដ្ឋប្រហារ​១៨​មីនា​បាន កន្លងផុតទៅ ។ កាលណោះ មាន​ផលិតកម្ម​មួយ​ឈ្មោះ គង​ជ័យ​ភាពយន្ត ដែល​ដឹកនាំ​ដោយ អ្នកស្រី សំអាន ណុល បាន​ពឹងពាក់​ឱ្យ​លោក​សរសេរ​បទ​នេះ សម្រាប់​ដាក់​បញ្ចូល​ទៅក្នុង​ខ្សែភាពយន្ត​របស់​អ្នកស្រី​ឈ្មោះថា នេះ​ឬ​ជីវិត​? ។​
​    ​តាមពិត បទ​នេះ តាម​សាច់​ទំនុក​ច្រៀង គឺ​តម្រូវ​តួ​ស្រី​ជា​អ្នក​ច្រៀង តែ​ដើម្បី​សង្កត់​សាច់រឿង​ឱ្យ​កាន់តែ ធ្ងន់​ថែមទៀត ទើប​អ្នកនិពន្ធ​មិន​កំណត់​ឱ្យ​តួ​ច្រៀង​ផ្ទាល់​ទេ គឺ​យក​សំឡេង​អ្នកចម្រៀង​ឯក ស៊ីន ស៊ី​សាមុត បណ្តែត ជា​ហ្វូន​វិញ ។​
​    ​ថ្វី​បើ​បទ​នេះ មិន​បាន​ស្ថិតនៅ​ក្នុង​កម្រង​កាស្សែត​ណាមួយ ក្រៅពី​ចាក់ផ្សាយ​តាម​វិទ្យុ តែ​វា​មាន​ឥទ្ធិពល អាច​សណ្តំ​បេះដូង​នារី​ទូទៅ ដែល​មាន​រឿង​កម្សត់កម្រ ព្រាត់ប្រាស​និរាស​គូជីវិត តាមរយៈ​សំឡេង​មាស​របស់​អ្នក ចម្រៀង​ឯក ស៊ីន ស៊ី​សាមុត ធ្វើឱ្យ​អ្នក​ស្តាប់​រណ្តំ​អួលអាក់​ជាប់​ជានិច្ច ។​
​    ​បទ​“​នេះ​ឬ​ជីវិត​” មិន​បាន​ថត​នៅ​ស្ទីឌីយ៉ូ​អ្នកស្រី​វណ្ណច័​ន្ទ​, ស្ទីឌីយ៉ូ​របស់​លោក​ចាប ឆុន ឬ​ស្ទីឌីយ៉ូ​នៅ ក្រសួង​ឃោសនាការ​ជាតិ​នោះ​ទេ ដោយ​បន្ទាន់​ពេក លោក​ស៊ីន ស៊ី​សាមុត ក៏​បាន​នាំ​លោក​គ​ង្គ ប៊ុន​ឈឿន ទៅ​ថត នៅ​ស្ទីឌីយ៉ូ​មួយ ដែល​ប្រគំ​វង់​តន្ត្រី​ដោយ​យោធា​ភិរម្យ ។​
​    ​ប៉ុន្តែ ដោយសារ​សភាពការណ៍​ភ័ន្ត​ប្រែ​របស់​ប្រទេសជាតិ បទ​នេះ​ឃើញ្ញ​មាន​ចាក់​ផ្សាយ​ដោយ កម្រ​ណាស់ មិនដឹង​ជា​កាស្សែត​ដើម​នៅ​សល់ ឬរ​លុប​រលាយ​បាត់​ទៅ​ណា​អស់ហើយ ។​
​    ​ក្នុងន័យ​សោកស្តាយ​នូវ​បទ​ចម្រៀង​ដ៏​សំខាន់​នេះហើយ ទើប​នៅ​ឆ្នាំ​១៩៨៩ ផលិតកម្ម​រស្មី​មេគង្គ​ភាពយន្ត បាន​ឱ្យ​លោក​គ​ង្គ ប៊ុន​ឈឿន​រៀបចំ​បទ​នេះ​សាជាថ្មី ដើម្បី​បញ្ចូល​ទៅ​ក្នុង​ខ្សែភាពយន្ត​មួយ​រឿង​ឈ្មោះថា សែន​ទារុណ ដែល​មាន​រូប​លោក​គ​ង្គ ប៊ុន​ឈឿន​ជា​អ្នកដឹកនាំ​រឿង​ផ្ទាល់ ប៉ុន្តែ​ផ្លាស់​មក​ឱ្យ​នាង សុខ សុខុម ច្រៀង​វិញ ។ បទ​នេះ នៅ​តែ​ទទួល​ការពេញនិយម​ពី​អ្នក​ស្តាប់​ជាខ្លាំង ហើយ​នៅ​តែ​រក្សា​អនុស្សាវរីយ៍​តាម​ទឹកដម​សំឡេង​មាស​របស់លោក ស៊ីន ស៊ី​សាមុត​ដដែល​...​។​