ហុងស៊ុយ | ហុងស៊ុយ​រៀបចំ​បន្ទប់​កូនក្រមុំ​នៅ​ថ្ងៃ​អាពាហ៍ពិពាហ៍​

ហុងស៊ុយ

មាតិកា

ហុងស៊ុយ​រៀបចំ​បន្ទប់​កូនក្រមុំ​នៅ​ថ្ងៃ​អាពាហ៍ពិពាហ៍​


១. បន្ទប់​កូនក្រមុំ​ត្រូវ​ឲ្យ​មាន​ខ្ល​យ​ចេញចូល និង មិនគួរ​ប្រើ​គ្រឿង​សង្ហា​រឹម​ថ្មីៗ​ពេក​ទេ ដើម្បី​បង្ការ​កុំ​ឲ្យ​ក្លិន​ថ្នាំលាប​ប៉ះពាល់​ដល់​ប្រព័ន្ធ​ដកដង្ហើម និង ខួរក្បាល​ដែល​កំពុងតែ​ស្រស់ស្រាយ ។ ក្រៅពីនេះ គ្រឿង​សង្ហា​រឹម​ឈើ​មិនត្រូវ​ប្រើ​ឈើ​ពណ៌​ខ្មៅ​ឡើយ ។​
២. ជញ្ជាំង គ្រឿង​សង្ហា​រឹម និង រនាំង​បង្អួត​នៅក្នុង​បន្ទប់​កូនក្រមុំ​មិនត្រូវ​ប្រើ​ពណ៌​ផ្កាឈូក​ឡើយ ពីព្រោះ​របស់​ទាំងនេះ​ងាយ​នឹងធ្វើ​ឲ្យ​គំនិត​ស្មារតី​ចុះខ្សោយ ភិតភ័យ មិនមាន​សេចក្តីសុខ និង ឆាប់​ខឹង ព្រមទាំង​ងាយ​បង្កជម្លោះ​ទៀតផង ។​
៣. ទីតាំង​បន្ទប់​កូនក្រមុំ​ត្រូវ​ជ្រើសរើស​រក​ទីកន្លែង​ណា​ដែលមាន​ពន្លឺព្រះអាទិត្យ​គ្រប់គ្រាន់ យក​ល្អ​ត្រូវមាន​ពន្លឺព្រះអាទិត្យ​ចាំង​ចំ ។ ប្រសិនបើ​នៅក្នុង​បន្ទប់​គ្មាន​ពន្លឺ ព្រះអាទិត្យ​ចាំង​ចូល និង ងងឹត​ពេក​អាចធ្វើ​ឲ្យ​គូ​ស្វាមីភរិយា​ទើប​រៀបការ​ថ្មីថ្មោង​មាន​ ទឹកចិត្ត​ព្រួយបារម្ភ​រហូត​អាច​ធ្លាក់​ក្នុងស្ថានភាព​ហាក់ដូច​ជាមាន​សម្ពាធ​ទៀតផង ។​
៤. កម្រាល​ក្តារ ឬ ឥដ្ឋការ៉ូ ដាច់ខាត​មិនត្រូវ​ប្រើ​ពណ៌​ស្រអាប់​ពេក​ទេ ហើយក៏​មិនត្រូវ​ប្រើ​ពណ៌​ស្រស់​ឆើតឆាយ​ពេក​ដែរ ដូចជា​ពណ៌​ក្រហមឆ្អិនឆ្អៅ និង ពណ៌​ផ្កាឈូក​ជាដើម ពីព្រោះ​ពណ៌​ទាំងនេះ អាចធ្វើ​ឲ្យ​ចរិត​មនុស្ស​ឆាប់​ខឹងឆេវ​ឆាវ រវាង​ប្តី​ប្រពន្ធ​អាច​ឈ្លោះប្រកែក​គ្នា ។ ម្យ៉ាង​ទៀង​កម្រាលព្រំ កម្រាលពូក និង រនាំងបង្អួច​ប្រសិនបើ​ប្រើ​ពណ៌​ក្រហម​គឺ​ពេល​មានគភ៌​មានឱកាស​ច្រើន​កើត​បាន​កូនស្រី ។​
៥. ការប្រើ​ពណ៌​នៅក្នុង​បន្ទប់​កូនក្រមុំ​មិនត្រូវ​ស្រអាប់​ពេក​ទេ មិនត្រូវ​ប្រើ​ពណ៌​ខៀវចាស់ បៃតងចាស់ ក្រហមជាំ និង ប្រផេះ​ចាស់ ពីព្រោះ​ពណ៌​ទាំងនេះ​ងាយ​នឹងធ្វើ​ឲ្យ​ទឹកចិត្ត​ប្តី​ប្រពន្ធ​មិនល្អ ប្រពៃ​ឡើយ ។​
៦. នៅ​ចំ​ពីមុខ​គ្រែ​គេង ឬ គ្រែ​ផ្សំ​ដំណេក​មិនត្រូវ​ឲ្យ​បែរមុខ​ចំ​បន្ទប់ទឹក​ឡើយ ហើយ​មុខទ្វារ​បន្ទប់​កូនក្រមុំ​ក៏​មិនត្រូវ​បែរមុខ​ចំ​មុខទ្វារ​បន្ទប់ទឹក​ដែរ ពីព្រោះ​អាច​ប៉ះពាល់​ដល់​សុខភាព ជាពិសេស​អាចមាន​ជំងឺ ឬ មាន​បញ្ហា​ហើមពោះ និង ពិបាក​ដើរខ្យល់​ទៀតផង ។​
៧. នៅ​ចំ​ពីលើ​ក្បាល​ដំណេក​មិនត្រូវ​ដាក់តាំង​ស៊ុម​រូបថត​អាពាហ៍ពិពាហ៍​ឡើយ ហើយ​ស៊ុម​រូបថត​កាន់តែ​ធំ​កាន់តែ​មិនល្អ ពីព្រោះ​ស៊ុម​រូបថត​បែបនេះ​អាច​បង្ក​ឲ្យ​មាន​សម្ពាធ ព្រមទាំង​គេង​យល់សប្តិ​អាក្រក់​ញឹកញាប់​ទៀតផង ។ ដូច្នេះ​ប្រសិនបើ​ដាក់តាំង​ត្រាំត្រែង​យូរ អាច​បង្ក​ឲ្យ​មានគំនិត​ចង់​លែងលះគ្នា​ទៀតផង ។​
៨. នៅ​កែង​ជ្រុង​នៃ​ក្បាល​គ្រែ​ទាំងសងខាង មិនត្រូវ​ដាក់​ទូ​សម្លៀកបំពាក់ ទូ​ចាន តុ​អាន​សៀវភៅ និង ទូ​សំអាង​ចំ​គ្នា​ត្រង់ៗ​ឡើយ ពីព្រោះ​អាចធ្វើ​ឲ្យ​ប្តី​ប្រពន្ធ​ជួប​អាការ​:​រោគ​ឈឺ​មួយ​ចំហៀង​ក្បាល ឬ ប្រកាំង ។​
៩. ចំពោះ​ពិតាន​ក្នុង​បន្ទប់​កូនក្រមុំ មិនត្រូវ​លាបថ្នាំ​ពណ៌​ក្រហម ឬ ខៀវចាស់​ឡើយ ។​
១០. ពិតាន​ក្នុង​បន្ទប់​កូនក្រមុំ​ក៏​មិនត្រូវ​តុបតែង ឬ ប្រើ​ថ្នាំ​ពណ៌​គូរ​ក្រវេមក្រវាម​ឡើយ បើ​មិន​ដូច្នេះ​ទេ​ងាយ​នឹងធ្វើ​ឲ្យ​ប្តី​ប្រពន្ធ​មាន​ជំងឺ​ផ្សេងៗ​មក​បៀតបៀន ។​
១១. ចំពោះ​ចុង​គ្រែ​គេង មិន​ថា​ចំ​ពីមុខ ឬ ពី​ចំហៀង​ឡើយ មិនត្រូវ​ដាក់​បែរមុខ​ឲ្យ​ចំ​មាត់ទ្វារ​បង្គន់​ឡើយ ព្រោះ​អាច​បង្ក​ឲ្យ​មាន​អាការ​:​រោគ​ចុក​រួយ​ស្រពន់​នៅត្រង់​ជើង ។​
១២. ទីតាំង​គ្រែ​គេង​ត្រូវ​ដាក់តាំង​ឲ្យ​ចំ​ទិស​នាគ​ខៀវ (​ខាងកើត​) ត្រូវដាក់​អែប​ឲ្យ​ជាប់​នឹង​ជញ្ជាំង ឬ ក្បែរ​ជញ្ជាំង ធ្វើបែបនេះ​ងាយ​នឹង​បានកូន​ប្រុស ពីព្រោះ​ទិស​នេះ​អំណោយផល​ដល់​មនុស្ស ប្រុស ។​
១៣. ទីតាំង​គ្រែ​គេង​មិន​ត្រូវដាក់​តាំងនៅ​ចំ​ពីក្រោម​ធ្នឹម​ទទឹង​ឡើយ ព្រោះ​សម្ពាធ​នៃ​ធ្នឹម​ទទឹង​អាចធ្វើ​ឲ្យ​ខូច​អារម្មណ៍ និង សុខភាព ប៉ុន្តែ​បើ​គ្រាន់តែ​ជាការ​តុបតែង​បន្ទះក្តារ​ពិតាន​កាត់​ទទឹង គឺ​មិនមាន​ចោទ​ជា​បញ្ហា​ឡើយ ។​
១៤. ទីតាំង​គ្រែ​គេង​ត្រូវ​ចៀសវាង​ដាក់​ក្បែរ​មាត់​បង្អួច ពីព្រោះ​កាលបើ​មាន​កម្តៅ​ព្រះអាទិត្យ ចែងចាំង​ខ្លាំង​អាចធ្វើ​ឲ្យ​មនោសញ្ចេតនា​រវាង​ប្តី​ប្រពន្ធ​មិនមាន​លំនឹង ព្រមទាំង​មិនមាន​សេចក្តីសុខ​ទៀតផង ។​
១៥. ទីតាំង​ក្បាល​គ្រែ​គេង​ទាំងសងខាង មិនត្រូវ​ដាក់តាំង​ឲ្យ​ចំ​មាត់ទ្វារ​ឡើយ ព្រោះ​អាច​បង្ក​ឲ្យ​មាន​អាការ​:​រោគ​ឈឺក្បាល​រ៉ាំរ៉ៃ​យូរអង្វែង ៕
​តូច រំលឹក​