ភ្ជាប់ទំនាក់ទំនងជាមួយយើងតាមរយៈ

សេចក្ដីថ្លែងការណ៍​រប​ស់​សិទ្ធិមនុស្ស ត្រូវបាន​មន្ត្រី​រដ្ឋាភិបាល​ប្រតិកម្ម​ថា កំពុង​បារម្ភ ជ្រុល​ហួសហេតុ​ពេក​

(ថ្ងៃទី 17 ឧសភា 2012, ម៉ោង 06:50:PM) | ដោយ: លីនណា

ក- ក+ | Print

ភ្នំពេញ: មជ្ឈមណ្ឌល​សិទ្ធិមនុស្ស​កម្ពុជា នៅ​ថ្ងៃទី​១៧ ខែឧសភា ឆ្នាំ​២០១២ បានចេញ​សេចក្ដីថ្លែងការណ៍​ថា សេចក្ដី​លោភលន់ ចង់បាន​ដីធ្លី បណ្ដាល​ឲ្យ​ប្រជាពលរដ្ឋ​ស្លូតត្រង់​ពីរ​នាក់​ស្លាប់ និង​ប្រជាពលរដ្ឋ​ជាច្រើន​នាក់​ទៀត ត្រូវបាន​រំពឹងទុក​ថា នឹង​ជួប​បញ្ហា​ដូចគ្នា ហើយ​បាន​ចោទ​សួរថា តើ​ប្រជាពលរដ្ឋ​ខ្មែរ​ស្លូតត្រង់​ប៉ុន្មាន​នាក់​ទៀត នឹងត្រូវ​ស្លាប់ មុននឹង​រដ្ឋាភិបាល​ភ្ញាក់ខ្លួន និង​ការពារ​មិន​ឲ្យ​វិបត្តិ​កាន់តែ​ធ្ងន់ធ្ងរ​កើតឡើង​?

​ក៏ប៉ុន្តែ​មន្ដ្រី​រដ្ឋាភិបាល បាន​លើកឡើងថា លោក អ៊ូ វីរៈ កំពុងតែ​ព្រួយបារម្ភ​ជ្រុល​ហួសហេតុ​ពេក​។​

​សេចក្ដីថ្លែងការណ៍ បាន​លើកឡើងថា ក្មេងស្រី​ម្នាក់​ឈ្មោះ ហេង ចាន់ថា អាយុ ១៤​ឆ្នាំ ត្រូវបាន​គេ​បាញ់សម្លាប់ នៅវេលា​ម៉ោង ៨ និង ៣០​នាទី​ព្រឹក ថ្ងៃទី​១៦ ខែឧសភា ឆ្នាំ​២០១២ ក្នុងភូមិ​ប្រ​ម៉ា ឃុំ​កំពង់​ដំរី ស្រុក​ឆ្លូង ខេត្តក្រចេះ ហើយ​យ៉ាងហោចណាស់​ប្រជាពលរដ្ឋ​ពីរ​នាក់​ទៀត ត្រូវបាន​គេ​ចាប់ខ្លួន ក្នុងអំឡុងពេល នៃ​ការ​បណ្ដាញ​ចេញពី​ដី​ដោយ​ប្រើ​អំពើហិង្សា​។
​សាក្សី​បាន​រាយការណ៍​ថា នរគ​បាល និង​ទាហាន​ប្រដាប់អាវុធ​រាប់រយ​នាក់ បាន​ប្រើប្រាស់​អាវុធជាតិផ្ទុះ​ជាច្រើន​គ្រាប់ ប្រឆាំងនឹង​ប្រជាពលរដ្ឋ​ជាង ១.០០០ នាក់ ដើម្បី​បណ្ដេញ​ពួកគេ​ចេញពី​ដី​របស់​ពួកគេ​។
​ប្រជាពលរដ្ឋ​បានធ្វើ​បាតុកម្ម​ប្រឆាំងនឹង​ការបាត់បង់​ដីស្រែ ដោយសារ​ការផ្ដល់​ដី​សម្បទាន​សេដ្ឋកិច្ច​ទៅ​ឲ្យ​ក្រុមហ៊ុន​កា​សូ​ធី​ម ខូ អិ​ល ធី ឌី ដែល​គ្រប់គ្រង​ដោយ​ជនជាតិ​រុស្ស៊ី​។ យ៉ាងហោចណាស់ នេះ​គឺជា​ករណី​ទី​ប្រាំបី ដែល​អាជ្ញាធរ ឬ​ស្ថាប័ន​អនុវត្ត​ច្បាប់​បានធ្វើការ​បាញ់ប្រហារ​ប្រជាពលរដ្ឋ ចាប់តាំងពី​ខែ​វិ​ច្ឆ​កា ឆ្នាំ​២០១១ ក្នុងករណី​ពាក់ព័ន្ធ​នឹង​ការរំលោភបំពាន​ដីធ្លី ឬ​សិទ្ធិ​ដីធ្លី​។​

​សេចក្ដីថ្លែងការណ៍​បានលើកឡើង​បន្តថា នៅក្នុង​ថ្ងៃ​ជាមួយគ្នា​នឹង​ការបាញ់សម្លាប់​នេះ វិបត្តិ​ដីធ្លី​បាន​បណ្ដាល​ឲ្យ​មាន​ជនរងគ្រោះ​ទី​ពីរ ដែលជា​ទារក​អាយុ ៩​ខែ ដែល​ស្លាប់​ដោយសារ​ជម្ងឺ នា​ព្រឹក​ថ្ងៃទី​១៦ ខែឧសភា ឆ្នាំ​២០១២ ដោយ​ទារក​នោះ មាន​អាកា​រៈ​រាគរូស និង​ក្ដៅខ្លួន​ចាប់តាំងពី​ថ្ងៃ ដែល​ក្រុមគ្រួសារ​របស់​ទារក​ត្រូវបាន​អាជ្ញាធរ​មូលដ្ឋាន បណ្ដេញ​ចេញពី​ភូមិ​បុរី​កីឡា ដែល​កំពុងមាន​កេរ្តិ៑៍ឈ្មោះ​អាស្រូវ ក្នុង​រាជធានី​ភ្នំពេញ នៅ​ថ្ងៃទី​៣ ខែមករា ឆ្នាំ​២០១២​។

​ទារក​ប្រុស​នោះ ឈ្មោះ ចាន់​សំណាង បាន​ធ្លាក់ខ្លួន​ឈឺ ដោយសារ​ស្ថានភាព​រស់នៅ​លំបាក​វេទនា ក្នុង​តំបន់​ដែល​គ្រួសារ​ទារក បាន​តាំង​លំនៅ​ថ្មី​នៅក្រៅ​ទីក្រុង​។

​នៅក្នុង​សេចក្ដីថ្លែងការណ៍ លោក អ៊ូ វីរៈ ប្រធាន​មជ្ឈមណ្ឌល​សិទ្ធិមនុស្ស​កម្ពុជា មានប្រសាសន៍ថា “​វា​ជាការ​ប្រសើរ​ណាស់ បើ​មិនមាន​ការធ្វើសម្បទាន​ដី នៅក្នុង​ថ្ងៃ​អនាគត ប៉ុន្តែ​ប្រសិនបើ​ការធ្វើសម្បទាន​ដី បច្ចុប្បន្ន​បណ្ដាល​ឲ្យ​មានការ​ស្លាប់​ដ៏​សោកសៅ និង​ហិង្សា មិន​ថា តាមរយៈ​ការធ្វេសប្រហែស​ទាំងស្រុង ឬ​អំពើ​ឃោរឃៅ​ដ៏​ខុសឆ្គង​របស់​អាជ្ញាធរ ពិតប្រាកដ​ណាស់​វិធានការ​ទាំងនេះ គឺ​នៅ​មិន​គ្រប់គ្រាន់​នៅឡើយ​”​។​

​លោក​បាន​បញ្ជាក់ថា “​ព្រឹត្តិការណ៍ ដែល​ក្មេងស្រី​អាយុ ១៤​ឆ្នាំ ត្រូវបាន​គេ​សម្លាប់​តាម​វិធី​នេះ ហាក់​មិនមាន​អ្វី​គួរ​ឲ្យ​ចម្លែក​សម្រាប់​ព្រឹត្តិការណ៍​ថ្មីៗ ដែល​បាន​កើតឡើង តែ​ជា​ព្រឹត្តិការណ៍​ដ៏​គួរ​ឲ្យ​រន្ធត់ និង​បង្ហាញថា វិបត្តិ​ដីធ្លី​កាន់តែ​មានការ​លំបាក​ក្នុងការ​គ្រប់គ្រង​។ ការដែល​កុមារ​បាន​ស្លាប់​នៅ​បុរី​កីឡា គឺជា​ព្រឹត្តិការណ៍​ដ៏​គួរ​ឲ្យ​ស​ង្វែ​ក និង​សោកសៅ​”​។​

​នៅក្នុង​សេចក្ដីថ្លែងការណ៍ លោក អ៊ូ វីរៈ បាន​ចោទ​ជា​សំណួរ​ថា តើ​ប្រជាពលរដ្ឋ​ខ្មែរ​ស្លូតត្រង់​ប៉ុន្មាន​នាក់​ទៀត នឹងត្រូវ​ស្លាប់ មុននឹង​រដ្ឋាភិបាល​ភ្ញាក់ខ្លួន និង​ការពារ​មិន​ឲ្យ​វិបត្តិ​កាន់តែ​ធ្ងន់ធ្ងរ​កើតឡើង​?

​លោក អ៊ូ វីរៈ បានលើកឡើង​បន្តថា “​អ្វីដែល​អាច​សន្មត បាន​គឺថា រដ្ឋាភិបាល​មិនអាច​គ្រប់គ្រង​ប្រទេស​បាន ឬ​ការលុបចោល​ការធ្វើសម្បទាន​ដី គឺ​គ្រាន់តែ​ជាការ​សម្ដែង​របស់​រដ្ឋា​ភិ​បាល​តែប៉ុណ្ណោះ​។ វា​គឺជា​ពេលវេលា​មួយ​ដ៏​ចាំបាច់ ដែល​រដ្ឋាភិបាល​ត្រូវគោរព​កាតព្វកិច្ច និង​ការពារ​ប្រជាពលរដ្ឋ​របស់ខ្លួន ពី​ស្រមោល​ដ៏​គួរ​ឲ្យ​ស្អប់ខ្ពើម នៃ​ការ​លោភលន់ ដែល​កំពុង​ធ្វើ​ឲ្យ​ប្រទេសជាតិ​សាបសូន្យ​។ ករណីនេះ អាច​ចាប់ផ្ដើម​ដោយ​បង្កើត​ការស៊ើបអង្កេត​ពេញលេញ និង​ជាក់លាក់​លើ​ការស្លាប់​ទាំងនេះ​”​។​

​ពាក់ព័ន្ធ​នឹង​ការ​ចោទ​ជា​សំណួរ​របស់​ប្រធាន​មជ្ឈមណ្ឌល​សិទ្ធិមនុស្ស​កម្ពុជា ត្រូវបាន​មន្ត្រី​រដ្ឋាភិបាល លោក ទិ​ត សុធា អ្នកនាំពាក្យ និង​ជា​អនុប្រធាន​អង្គភាព​ព័ត៌មាន និង​ប្រតិកម្ម​រហ័ស បាន​ប្រតិកម្ម​តប​វិញ​ថា “​មជ្ឈមណ្ឌល​សិទ្ធិមនុស្ស​កម្ពុជា របស់លោក អ៊ូ វីរៈ កំពុងតែ​ព្រួយបារម្ភ​ជ្រុល​ហួសហេតុ​ពេក ហើយ​ការស្លាប់​របស់​ប្រជាពលរដ្ឋ នៅ​ខេត្តក្រចេះ វា​មិនមែនជា​បទបញ្ជា​របស់​ប្រមុខ​រដ្ឋាភិបាល​ទេ គឺ​កើតឡើង​ដោយ​ចៃដន្យ ទិសដៅ​រដ្ឋាភិបាល គឺ​អនុវត្ត​ច្បាប់​ជាធំ​។ ជនល្មើស​នឹងត្រូវ​ផ្ដន្ទាទោស​ទៅតាម​ច្បាប់​។ ដូច្នេះ​មជ្ឈមណ្ឌល​សិទ្ធិមនុស្ស មិនត្រូវ​ចោទប្រកាន់​រដ្ឋាភិបាល​បែបនេះ​ទេ​។ ជាមួយគ្នា​នោះដែរ មជ្ឈមណ្ឌល​សិទ្ធិមនុស្ស​កម្ពុជា គួរ​ជំរុញ​មន្ត្រី​របស់ខ្លួន ឲ្យ​ចេះ​ការគោរព​ច្បាប់ និង​អនុវត្ត​ច្បាប់​ឲ្យ​បាន​ត្រឹមត្រូវ​”៕
E-Newspaper (រស្មីកម្ពុជា)
cen
រូបភាព
  • Neay kroch (1)
  • Prim liza
  • 2-lumbini-garden-nepal
  • 1
  • 09

Our Partners