ខេត្តព្រះសីហនុ ៖ សមត្ថកិច្ច នគរបាលខេត្តព្រះសីហនុ បានឱ្យដឹងថា កម្លាំងជំនាញបានតាមចាប់ខ្លួនបុរសម្នាក់ ដែលគេសង្ស័យ បែកថ្នាំ ឬមានសតិមិនល្អ ក្រោយពីបុរសម្នាក់នេះ បានធ្វើសកម្មភាពអុកឡុកអ្នកភូមិនៅម្តុំសេតេ។
សមត្ថកិច្ចឱ្យដឹងបន្តថា មុនដំបូងបុរសរូបនោះ បានចូលទៅបើកយករថយន្តមួយគ្រឿង របស់ប្រជាពលរដ្ឋ ដោយបើករត់យកទៅចូលផ្ទះអ្នកភូមិមួយកន្លែងទៀត នៅក្បែរនោះ រួចចតរថយន្តនេះទុកចោល ហើយបុរសរូបនេះក៏បានស្ទុះទៅយកម៉ូតូ របស់ម្ចាស់ផ្ទះនោះ ជិះចេញបន្តទៅទៀត រហូតដល់សមត្ថកិច្ចបង្ក្រាបបាននៅវេលាម៉ោងជាង ១២ថ្ងៃត្រង់ថ្ងៃ៥ ខែវិច្ឆិកា ឆ្នាំ២០១៨។
បច្ចុប្បន្ន បុរសសង្សយ័ខាងលើនេះ ត្រូវបានសមត្ថកិច្ចនាំខ្លួនយកទៅសាកសួរ និងពិនិត្យរកមើលសារធាតុញៀនតាមបច្ចេកទេស និងនីតិវិធី។ សមត្ថកិច្ចបានឱ្យដឹងបឋមថា បុរសរូបនេះ ទំនងជាមិនមែនធ្វើសកម្មភាពចោរកម្មទេ ប៉ុន្តែអាចជាមនុស្សញៀនថ្នាំ ឬក៏ជាមនុស្សមានសតិមិនល្អ ៕ ដោយ ៖ ដែន សីមា