នេះជាខណៈពេលដ៏គួរឲ្យព្រឺសក់ក្បាលមួយ ខណៈពេលដែលបានឃើញម៉ូតូធំ១គ្រឿង ស្រាប់តែបង្ហាញឲ្យខ្លួនចេញពីផ្លូវច្រមុះជ្រូកមួយ ដោយគ្មានអ្នកជិះ ហើយវាបានបោលនៅលើផ្លូវមួយសន្ទុះ មុនពេលប្រាសខ្លួនដេកនៅលើចិញ្ចើមផ្លូវមួយកន្លែង នៅក្នុងប្រទេសហ្វីលីពីន ។
ទោះយ៉ាងណា វីដេអូត្រូវបានថតដោយរថយន្ត១គ្រឿងបង្ហាញម៉ូតូបោលគ្មានអ្នកជិះ ដែលបង្កឲ្យមានការភ្ញាក់ផ្អើលយ៉ាងខ្លាំង នៅលើបណ្តាញសង្គម ឥឡូវនេះ ដឹងការពិតហើយ វាពុំមែនជាម៉ូតូបញ្ជាដោយអ្នកជិះជាខ្មោច ឬ វាបើកបរសាកល្បងដោយខ្លួនវានោះទេ ។ តាមពិតទៅ ម្ចាស់របស់វាត្រូវបានខ្ទាតចេញពីវា បន្ទាប់ពីបានជួបគ្រោះថ្នាក់ចរាចរណ៍បុកគ្នាជាមួយរថយន្ត១គ្រឿងប៉ុណ្ណោះ ។
អ្នកប្រើប្រាស់ហ្វេសប៊ុកឈ្មោះ Chuen Chern បានអះអាងថា គាត់គឺជាម្ចាស់របស់ម៉ូតូនេះ និងបានបញ្ជាក់ថា គាត់ត្រូវបានខ្ទាតចេញពីម៉ូតូរបស់គាត់ បន្ទាប់ពីបានជួបគ្រោះថ្នាក់ប៉ះទង្គិចគ្នាជាមួយរថយន្ត១គ្រឿង កាលពីពេលមុននេះ ។
យោងតាម Chuen គាត់ជិះម៉ូតូបុកជាមួយរថយន្ត Grab ស្ថិតនៅតាមបណ្តោយផ្លូវ Seletar Expressway នៅពេលយប់ ហើយម៉ូតូរបស់គាត់បានបន្តបោលឆ្ពោះទៅមុខ បន្ទាប់រងកម្លាំងប៉ះទង្គិច ។
ឥឡូវនេះ គាត់កំពុងស្វែងរកអ្នកណា ដែលមានវីដេអូបង្ហាញអំពីហេតុការណ៍នេះ ដើម្បីគាត់ពន្យល់បន្ថែមអំពីករណីដែលម៉ូតូរបស់គាត់បានបោលនៅលើផ្លូវដោយខ្លួនឯងវា ៕ ដោយ៖ ឧត្តម (ប្រភព៖ Coconuts)
