ខេត្តព្រះសីហនុ៖ អភិបាលនៃគណៈអភិបាលខេត្តព្រះសីហនុ ឯកឧត្តម យន្ត មីន បានឲ្យដឹងថា ក្នុងពេលដ៏ឆាប់ខាងមុខ ប្រសិនបើធាតុអាកាសនមិនមានភ្លៀងធ្លាក់មួយរយៈ នឹងអាចបង្កការងាយស្រួលដល់ មន្ត្រីជំនាញបច្ចេកទេសជួសជុលផ្លូវមួយចំនួន ដែលខូច ដោយជំនន់ទឹកភ្លៀង នាទីប្រជុំជនក្រុងព្រះសីហនុ រួចរាល់បានឆាប់។
ឯកឧត្តម យន្ត មីន បន្តថា ពេលនេះ ក្រុមអ្នកបច្ចេកទេសស្ថាបនាផ្លូវ បានដំណើរការចាក់អ៊ុតកៅស៊ូ AC នៅតាមផ្លូវមួយចំនួន នាទីប្រជុំជនក្រុងព្រះសីហនុ និងនៅតាមបណ្តាស្រុកមួយចំនួនទៀត។ ជាក់ស្តែងក្រុមការងារបច្ចេកទេស ចាប់ពីខែតុលា រហូតមកដល់ខែវិច្ឆិកា ឆ្នាំ២០១៨នេះ កំពុងពន្លឿនសកម្មភាពជួសជុលផ្លូវឯករាជ្យ ដែលខូចនាពេលកន្លងមក។ បន្ថែមលើនេះ ក្រុមការងារបច្ចេកទេសក៏កំពុងន្លឿនសកម្មភាពស្ថាបនាផ្លូវ ចាប់ពីអូរ១ ដល់អូរ៥ថែមទៀត ដើម្បីបង្កលក្ខណៈងាយស្រួលដល់ការធ្វើដំណើររបស់ប្រជាពលរដ្ឋឡើងវិញ។
ឯកឧត្តម យន្ត មីន ឲ្យដឹងដូច្នេះ រួចបញ្ជាក់ថា បច្ចុប្បន្ននេះក្រុមការងារជួសជុលផ្លូវ ដែលខូចនាទីប្រជុំជន ក្នុងក្រុងព្រះសីហនុ កំពុងពន្លឿនបញ្ចប់ការងារជួសជុល ឱ្យចប់រួចរាល់បានឆាប់ ប្រសិនបើអាកាសធាតុ អំណោយផល ដល់ការងារចាក់អ៊ុតកៅស៊ូផ្លូវខូច ដែលបង្កការលំបាកដល់ការធ្វើដំណើរ របស់ប្រជាពលរដ្ឋ ក៏ដូចជាភ្ញៀវទេសចរកន្លងមក។
ឯកឧត្តម យន្ត មីន អភិបាលខេត្តព្រះសីហនុ អះអាងថា ក្នុងពេលដ៏ឆាប់ខាងមុខ ផ្លូវដែលខូចដោយជំនន់ទឹកភ្លៀងកន្លងមក នឹងលែងជាបញ្ហាចោទទៀតហើយ សម្រាប់ពលរដ្ឋ រស់នៅក្រុងព្រះសីហនុ និងភ្ញៀវទេសចរ ចូលមកទស្សនាខេត្តទេសចរណ៍ជាប់ឆ្នេរសមុទ្រមួយនេះ៕ ដោយ ៖ ដែន អយុធ្យា