ខេត្តស្វាយរៀង៖ សមទ្ធិផលថ្មីៗនិងចេញរូបរាងជាបន្តបន្ទាប់នៅក្នុងទឹកដីខេត្តស្វាយរៀង ដោយមានការ ខិតខំយកចិត្តទុកដាក់របស់លោកម៉ែន វិបុល អភិបាលខេត្ត បានធ្វើឲ្យខេត្តស្វាយរៀង មានការអភិវឌ្ឍរីកចម្រើនលើគ្រប់វិស័យ ឆ្លើយតបទៅនឹងសេចក្តីត្រូវការ និងសំណូមពរបស់ប្រជាពលរដ្ឋ។
លោកប្រាក់ សុវណ្ណ អភិបាលរងខេត្ត ស្វាយរៀងតំណាងលោកម៉ែន វិបុលអភិបាលខេត្ត រួមនិងមន្ត្រីដែលមានការពាក់ពន្ធ័នៅព្រឹកថ្ងៃទី៦ខែវិច្ចិកាឆ្នាំ២០១៨នេះបានអញ្ជើញចុះពិនិត្យមើលការអ៊ុតកៅស៊ូបេទីមមីន័រនៅតាមផ្លូវ មួយខ្សែ ក្នុងភូមិរោងបន្លែងសង្កាត់ស្វាយរៀងក្រុងស្វាយរៀង។
តាមប្រភពព័ត៍មានពីមន្ត្រីសាលាខេត្តស្វាយរៀងបានឱ្យដឹងថាៈនៅដើមខែវិច្ឆិកាឆ្នាំ២០១៨នេះការអភិវឌ្ឍលើហេដ្ឋារចនាសម្ព័ន្ធសាធារណៈ របស់រដ្ឋបាលខេត្តបានស្ថាបនាផ្លូវអ៊ុតបេទីមមីន័រ ចំនួន៥ខ្សែនៅក្នុងក្រុងស្វាយរៀងរួមនិងផ្លូវចាក់បេតុងអាមេចំនួន៤ខ្សែទៀតបាននឹងកំពុងស្ថាបនាជាបន្តបន្ទាប់។
សូមបញ្ជាក់ថាបន្ទាប់ពីមានការសាងសង់សួនច្បារ ការដាក់ភ្លើងស្តុបនៅតាមដងផ្លូវសំខាន់ៗមួយចំនួនក្នុងក្រុងស្វាយរៀង ការសាងសង់ច្រាំងទន្លេវ៉ៃគោ (ទំនប់តាណេង) រដ្ឋបាលខេត្ត ក៏បានធ្វើការជួសជុលផ្លូវអ៊ុតបេទីមមីន័រ ចំនួន ៥ខ្សែបន្ថែមទៀតនៅចុងឆ្នាំ២០១៨នេះ បន្ទាប់ពីបានជួសជុលអ៊ុតបេទីមមីន័រ ចំនួន៩ខ្សែរួចហើយនាឆ្នាំកន្លងទៅ ស្ថិតក្នុងក្រុងស្វាយរៀង ដើម្បីកែលម្អសោភ័ណភាព និងភាពស្រស់បំព្រង ចូលរួមចំណែកការប្រឡងប្រណាំងទីក្រុងស្អាតប្រចាំឆ្នាំផងដែរ ។
ដោយឡែក ចំពោះផ្លូវជនបទ នៅតាមមូលដ្ឋានភូមិ ឃុំ សង្កាត់មួយចំនួនដែលរងការខូចខាតដោយសារជំនន់ទឹកភ្លៀងនារដូវវស្សា ឆ្នាំ២០១៨នេះ អាជ្ញាធរខេត្ត ក៏មានការគិតគូរធ្វើការជួសជុលឡើងវិញផងដែរ ៕ វ៉ៃគោ