នេះជាហេតុការណ៍ដ៏សាហាវពុំនឹកស្មានមួយ ដែលស្ត្រីជិះរថយន្ត Mercedes ម្នាក់ ត្រូវបានជនមិនស្គាល់មុខ បានជិះម៉ូតូមកអែប និងជះទឹកម្ទេស ទៅលើមុខរបស់នាង ខណៈពួកគេទាំងពីរកំពុងឈប់រង់ចាំភ្លើងខៀវ នៅចំណុចស្តុបកន្លែងជាមួយគ្នា ។
Khaosod បានរាយការណ៍ថា ស្ត្រីរងគ្រោះឈ្មោះ Wassana Wasaratchawet អាយុ ៤៨ ឆ្នាំ ដែលឥឡូវនេះ បានចាកចេញពីមន្ទីរពេទ្យ បន្ទាប់ពីព្យាបាលរបួសនៅត្រង់ភ្នែកទាំងសងខាង បានទៅកាន់ប៉ុស្តិ៍ប៉ូលីស Bang Sue ដើម្បីផ្តល់ព័ត៌មានលម្អិតបន្ថែមអំពីហេតុការណ៍នេះ ។
យោងតាម Wassana នាងបានឈប់រថយន្តនៅផ្លូវប្រសព្វ Kamphaeng Phet ស្ថិតក្នុងសង្កាត់ Chatuchak ទីក្រុងបាងកក កាលពីយប់ថ្ងៃព្រហស្បតិ៍ នៅពេលនោះស្ត្រីម្នាក់ដែលត្រូវបានប៉ាន់ស្មានមានអាយុក្រោម ២០ ឆ្នាំ បានមកគោះទ្វារថយន្តរបស់នាង ។ នៅពេល Wassana បានចុចទម្លាក់កញ្ចក់ចុះ ដោយគិតថាគេចង់សួរនាំនាងអំពីទិសដៅផ្លូវធ្វើដំណើរ ប៉ុន្តែ ផ្ទុយទៅវិញ អ្នកជិះម៉ូតូនោះស្រាប់ជះលើមុខនាងជាមួយទឹកម្ទេសយ៉ាងលឿន និងបានជិះម៉ូតូគេចខ្លួនបាត់ស្រមោលតែម្តង ។
Wassana បានបន្តថា ភ្លាមៗនោះ នាងបានក្តៅក្រហាយភ្នែកយ៉ាងខ្លាំង ដែលធ្វើឲ្យនាងគ្រប់គ្រងបើករថយន្តទៅផ្ទះសឹងតែពុំដល់ ។ នាងបានសម្រេចចិត្តទៅកាន់មន្ទីរពេទ្យ Hua Chiew បន្ទាប់ពីគ្មានជំនួយអ្វីអាចធ្វើឲ្យបាត់ឈឺចុកចាប់នៅត្រង់ភ្នែករបស់នាង ។
Wassana បានប្រាប់អ្នកសារព័ត៌មានថា៖ «ខ្ញុំពុំដែលមានជម្លោះណាមួយជាមួយអ្នកណាម្នាក់នោះទេ ។ ហើយខ្ញុំពិតជាពុំដឹងពីហេតុផលស្ថិតនៅពីក្រោយការវាយប្រហារដ៏សាហាវនេះដែរ» ។
បច្ចុប្បន្ន ប៉ូលីសកំពុងឆែកមើលកាមេរ៉ាសន្តិសុខដងផ្លូវ ដើម្បីតាមស្វែងរកមុខជនបង្កមកផ្តន្ទោទោសទៅតាមផ្លូវច្បាប់ឲ្យខាងតែបាន ៕ ដោយ៖ ចន្ទី (ប្រភព៖ Cocconuts, Khaosod)