ភ្នំពេញ ៖ ប្រជាពលរដ្ឋរស់នៅក្នុងខណ្ឌឫស្សីកែវ បានស្នើសុំឲ្យអាជ្ញាធររាជធានីភ្នំពេញ ជួយអន្តរាគមន៍ទៅក្រសួងសុខាភិបាល ធ្វើយ៉ាងណាចាត់វិធានការទៅលើ ក្រុមរថយន្តសាមុយដឹកជញ្ជូនអ្នកជំងឺ និងគ្រូពេទ្យមួយចំនួន ដែលធ្វើសកម្មភាពជំរិតទារលុយ និងប្រងើយ កន្តើយចំពោះអ្នកជំងឺ ក្នុងករណីគ្រោះថ្នាក់ចរាចរដែលរងរបួសធ្ងន់ធ្ងរ មិនជួយសង្គ្រោះឲ្យទាន់ពេលវេលា និងដឹកទៅមន្ទីរពេទ្យ រហូតធ្វើឲ្យអ្នកជំងឺស្លាប់ទាំងមិនអស់ចិត្ត។
ស្នើសុំបែបនេះរបស់ប្រជាពលរដ្ឋបានធ្វើឡើងនៅមជ្ឈមណ្ឌលម៉ូឌែន៥ សង្កាត់ឫស្សីកែវ ខណ្ឌឫស្សីកែវ ក្នុងវេទិកាផ្សព្វផ្សាយនិងពិគ្រោះយោបល់ របស់ក្រុមប្រឹក្សារាជធានីភ្នំពេញ កាលពីព្រឹកថ្ងៃទី៦វិច្ឆិកា ២០១៨នេះ ក្រោមអធិបតីភាពលោកម៉ប់ សារិន ប្រធានក្រុមប្រឹក្សារាជធានីភ្នំពេញ លោកស៊ុយ សេរិទ្ធ អភិបាលរងរាជ ធានីភ្នំពេញ ព្រមទាំងមានការចូលរូមពីប្រជាពលរដ្ឋជាង៥០០នាក់ផងដែរ។
អ្នកស្រី សេង ឈុនលី រស់នៅម្តុំគីឡូម៉ែត្រលេខ៦ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ បានលើកឡើងទាំងមានកំហឹងថា កាលពីថ្ងៃ២៩ មិថុនា ២០១៨កន្លងមកនេះ កូនប្រុសរបស់គាត់ជួបគ្រោះថ្នាក់ចរាចរមួយនៅខណ្ឌច្បារអំពៅ ហើយត្រូវបានរថយន្តសាមុយទៅដល់កន្លែងកើតហេតុភ្លាម ព្រមទាំងបានលើកជនរងគ្រោះដាក់លើឡាន តែមិនព្រមចេញទេ ដោយនិយាយថា ចាំភរិយាជនរងគ្រោះមកសិន និងបានពន្យារពេលយ៉ាងយូរ ទារលុយថ្លៃដឹក និងថ្លៃរុំរបួស នៅលើឡានថែមទៀត ។ ការព្រងើយ កន្តើយបែបនេះ ពេលដឹកមកដល់មន្ទីរពេទ្យព្រះកុសុមៈ កូនរបស់គាត់ក៏បានសន្លប់បាត់ស្មារតី និងឈានស្លាប់បាត់បង់ជីវិត គួរឲ្យសង្វេកបំផុត ដែលនេះជាទង្វើអសីលធម៌ដ៏ធ្ងន់ធ្ងរបំផុត ដែលមិនអាចទទួលយកបានទាស់តែសោះ។ ដូច្នេះទេ ពួកគាត់សូមឲ្យរាជរដ្ឋាភិបាល តាមរយៈអាជ្ញាធររាជធានីភ្នំពេញ មានវិធានការលើបញ្ហាខាងលើនេះផង ។ បើនៅតែបែបនេះ ប្រជាពលរដ្ឋស្លាប់អស់ហើយ។ អ្នកស្រីបានបញ្ជាក់ថា “នាងខ្ញុំសំណូមពរដល់ឯកឧត្តមជួយពាំនាំព័ត៌មាន របស់នាងខ្ញុំទៅដល់ក្រសួងសុខាភិបាល ។ នាងខ្ញសំណូមពរនេះ ដោយសារតែឡានសាមុយ។ កាលពីថ្ងៃ២៩ មិថុនា ២០១៨កន្លងមកនេះ កូនប្រុសរបស់គាត់ជួបគ្រោះថ្នាក់ចរាចរណ៍មួយនៅខណ្ឌច្បារអំពៅ ម្តុំរដ្ឋាករទឹក ពេលនោះចៅរបស់ខ្ញុំ និងម្តាយមីង បានសុំអង្វរឲ្យឡានសាមុយចេញទៅ ព្រោះទុកយូរទៅជនរងគ្រោះកាន់តែ… ។ នៅពេលដែលលើកជនរងគ្រោះដាក់លើឡានសាមុយ ជនរងគ្រោះនៅនិយាយបាន ហើយចៅខ្ញុំនិងម្តាយមីង បានសុំអង្វរសំពះឲ្យពួកគាត់ចេញឡាន ប៉ុន្តែក្រុមឡានសាមុយថា ចាំភរិយាជនរងគ្រោះមកសិន។ ហើយចៅខ្ញុំបាននិយាយ សូមគ្រូពេទ្យចេញឡានយកប៉ាខ្ញុំទៅព្យាបាលឲ្យបានទាន់ពេល ។ ហើយបានដឹកកូនខ្ញុំមកដល់ពេទ្យលោកសង្ឃ បានទារថ្លៃរុំរបួស ហើយកូនខ្ញុំបានមរណភាពភាព ។ អីចឹង ហេតុការណ៍នេះ នាងខ្ញុំសោកស្តាយណាស់ មិនគួរណាមន្ទីរពេទ្យមិនស្គាល់ពីជីវិតមនុស្ស ស្គាល់តែលុយ អីចឹងនាងខ្ញុំឈឺចាប់ណាស់ ដោយគ្រាន់តែក្នុងរយៈពេល២ម៉ោង កូនរបស់ខ្ញុំបានបាត់បង់ជីវិត “។ អ្នកស្រីបានស្នើឡើងដោយសម្តីខ្លាំងៗថា “នាងខ្ញុំសំណូមពរដល់ឯកឧត្តមជួយពាំនាំនូវព័ត៌មាននេះ ទៅដល់ក្រសួងសុខាភិបាល សុំឲ្យក្រសួងសុខាភិបាល ជួយដោះស្រាយយ៉ាងណាជីវិតមនុស្សឲ្យបានមុន ថវិកាមកដល់ ។ បើតាមប្រសាសន៍របស់សម្តេចថា ត្រូវជួយសង្គ្រោះជីវិតមនុស្សមុន កុំគិតថវិកា តែគាត់អត់បានយល់ពីសម្តីខ្លឹមសាររបស់សម្តេចទេ គឺគាត់គិតតែថវិកាៗ “។
ជុំវិញបញ្ហារបស់ប្រជាពលរដ្ឋដែលបានលើកឡើងខាងលើនេះ ត្រូវបានតំណាង មន្ទីរសុខាភិបាលរាជធានីភ្នំពេញ និងលោកលោកស៊ុយ សេរិទ្ធ អភិបាលរងរាជធានីភ្នំពេញ បានបញ្ជាក់ឲ្យដឹងថា នៅថ្ងៃ២៩ មិថុនា ២០១៨នោះ គឺមិនមានរថយន្តសាមុយរបស់មន្ទីរពេទ្យបង្អែកច្បារអំពៅ ទៅដឹកជនរងដោយគ្រោះថ្នាក់ចរាចរ នៅខណ្ឌច្បារអំពៅនោះទេ អាចជារថយន្តសាមុយឯកជន បើឡានរបស់រដ្ឋពាក់ស្លាកលេខរដ្ឋ ហើយបើរដ្ឋ គឺមិនទារលុយមុននោះទេ ។ ចំពោះរថយន្តសាមុយឯកជននេះ ក្រសួងក៏បានចេញការណែនាំរួចហើយគឺ មិនឲ្យដឹកជនរងគ្រោះនៅតាមផ្លូវសាធារណៈនោះទេ ប៉ុន្តែពួកគេនៅតែបន្តសកម្មភាពដដែល ដែលយើងទាំងអស់គ្នា ត្រូវសហការ ក៏ដូចជា រាយការណ៍ដើម្បីយើងមានវិធានការ ចំពោះរថយន្តសាមុយឯកជនទាំងនោះ៕ ដោយ ៖ កូឡាប