ភ្នំពេញ ៖ ក្រួចលួចរត់មកពីប្រទេសវៀតណាម មកពួននៅប្រទេសកម្ពុជា មានពណ៌ក្រហមគួរឲ្យចង់ពិសារ។ នគរបាលប្រឆាំងបទល្មើសសេដ្ឋកិច្ច នៃអគ្គស្នងការនគរបាលជាតិ សហការជាមួយមន្ត្រីកាំកុង ត្រូលនៅរសៀលថ្ងៃទី៦ ខែវិច្ឆិកា នេះបានដុតកម្ទេចចោលនូវសាច់ក្រួចខុសច្បាប់ ដែលនាំមកពីប្រទេសវៀតណាម លក់នៅកម្ពុជា ប្រមាណជាងពីរតោន ក្រោយពីរឹបអូសបាន ពីឈ្មួញទុច្ចរិត។
កម្លាំងនាយកដ្ឋាននគរបាលប្រឆាំងបទល្មើសសេដ្ឋកិច្ច សហការជាមួយអគ្គនាយកដ្ឋានកាំកុងត្រូល ក្រោមការសម្របសម្រួលនីតិវិធីពីលោក ខាំ សុផារី ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានបង្រា្កបករណីនាំចូលសាច់សត្វក្រួច គ្មានច្បាប់អនុញ្ញាតពីប្រទេសវៀតណាម ដឹកតាមរថយន្តកូរ៉េ១គ្រឿង ម៉ាកHYUNDIA ស្លាកលេខ 3E 5868 នៅចំណុចផ្លូវ ជា សុផារ៉ា សង្កាត់ទួលសង្កែ ខណ្ឋឬស្សីកែវ រាជធានីភ្នំពេញ។ ក្រោយការត្រួតពិនិត្យ សមត្ថកិច្ចចម្រុះបានឆែកឆេរជាក់ស្តែង រកឃើញសាច់សត្វក្រួច គ្មានច្បាប់អនុញ្ញាតប្រមាណ២,៥តោន។
ព្រះរាជអាជ្ញារង ខាំ សុផារី បានសម្រេចឲ្យដកហូតរក្សាទុកជាបណ្តោះអាសន្ន និងយកសាច់សត្វក្រួច គ្មានច្បាប់អនុញ្ញាតទៅដុតបំផ្លាញចោល នៅទីលានចាក់សំរាមបឹងជើងឯក និងបាននាំខ្លួនអ្នកបើកបររថយន្តម្នាក់ មកនាយកដ្ឋាន ដើម្បីបន្តនីតិវិធី៕ ដោយ ៖ បញ្ញាស័ក្តិ