ខេត្តកណ្ដាល៖ នៅរសៀលថ្ងៃទី៥ ខែធ្នូ ឆ្នាំ២០១៧ ប្រធានតុលាការ លោក ហុក វ៉ាន់ធីណា បានចេញដីកាឃុំខ្លួន ម្ចាស់សង្វៀនជល់មាន់ដ៏ធំ នៅឃុំអរិយក្សត្រ ស្រុកល្វាឯម ឈ្មោះ ថៃ ផានី ហៅ ម៉ាប់ ដែលជាកូនប្រសារបស់លោក ហ៊ុន សាន ដាក់ពន្ធនាគារហើយ ខណៈអ្នកពាក់ព័ន្ធទាំង៦៤នាក់ ដែលចូលលេងជល់មាន់នៅអរិយក្សត្រទាំង៦៤នាក់ត្រូវតុលាការខេត្តកណ្ដាល ចេញដីកាបង្គាប់ឲ្យដាក់ពន្ធនាគាររយៈមួយខែ ប៉ុន្ដែទោសនេះត្រូវបានតុលាការសម្រេចព្យួរ ដូច្នេះត្រូវអនុញ្ញាតឲ្យត្រឡប់ទៅវិញ ទាំងអស់តែម្ដង។
មន្ដ្រីតុលាការបញ្ជាក់ថា ការសម្រេចនេះ បន្ទាប់ពីសវនាការត្រូវបានបញ្ចប់ និងយោងតាមមាត្រា៤ នៃច្បាប់ល្បែងស៊ីសង។
ប្រធានតុលាការខេត្តកណ្ដាល លោក ហុក វ៉ាន់ធីណា បានចេញដីកាសម្រេចឲ្យឃុំខ្លួនឈ្មោះ ថៃ ផានី ហៅម៉ាប់ កូនប្រសារលោក ហ៊ុន សាន ដាក់ពន្ធនាគារដែលជាម្ចាស់ទីតាំងសង្វៀនជល់មាន់។ ប្រតិបត្តិការចុះបង្ក្រាបកាលពីថ្ងៃទី៤ខែធ្នូ
នោះ មានចំនួន៦៤នាក់ ខណៈដំបូងមនុស្សជាង១៥០នាក់ ត្រូវបានឃាត់ខ្លួនជាបណ្តោះអាសន្ន ប៉ុន្តែខ្លះជាជាងសំណង់ ក៏អនុញ្ញាតឲ្យត្រឡប់ទៅវិញ។ សម្រាប់វត្ថុតាងដែលត្រូវបានរឹបអូសវិញ លោកឧត្តមសេនីយ៍ស្នងការ បានបញ្ជាក់ថា រថយន្តមានចំនួនជិត៦០គ្រឿង ម៉ូតូជាង១០០គ្រឿង ព្រមទាំងមាន់ជល់ជាង១០០ក្បាល។
ម្ចាស់សង្វៀនជល់មាន់ល្មើសច្បាប់ដ៏ធំចំនួន២ខាងលើនេះ ត្រូវបានសមត្ថកិច្ចបញ្ជាក់ថា មានឈ្មោះ ថៃ ផានី ហៅម៉ាប់ ជាកូនប្រសារបស់លោក ហ៊ុន សាន បងប្រុសបង្កើតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។ ការប្រគល់ឲ្យកម្លាំងសមត្ថកិច្ចក្រសួងមហាផ្ទៃនេះដើម្បីឲ្យអនុវត្តតាមផ្លូវច្បាប់របស់កម្ពុជា។
ក្រោយចុះបង្ក្រាបនេះ សមត្ថកិច្ចបានសម្រេចប្រើគ្រឿងចក្រកម្ទេចទីតាំងសង្វៀនជល់មាន់ដ៏ធំទាំងពីរនេះហើយ៕ ដោយ ៖ បញ្ញាស័ក្តិ
