ស្ត្រីឥណ្ឌានិងនារីវ័យជំទង់រាប់រយនាក់ស្ម័គ្រចិត្តក្រាបនៅលើដីទុកឱ្យគ្រូសិល្ប៍ពីររូបប្តូរវេនគ្នាវាយដំយ៉ាងសាហាវ ក្នុងកិច្ចបណ្តេញខ្មោច ព្រាយព្យាបាលជំងឺ។
ខ្សែវីដេអូខាងក្រោមបង្ហាញឱ្យឃើញគ្រូសិល្ប៍២រូបយកដំបងនិងខ្សែតីប្តូរវេនគ្នាវាយសំពងទៅលើ ក្រុមមនុស្សមួយទំហឹងតែម្តង។ នៅខាងក្រៅមានមនុស្សរាប់ពាន់នាក់ ទាំងចាស់ ទាំងក្មេង នាំគ្នាចោមរោមមើល ដោយមានវត្តមានរបស់ប៉ូលិសរក្សាសណ្ដាប់ធ្នាប់ផង។
នេះគឺជាកិច្ចមួយប្រព្រឹត្តទៅក្នុងពិធីបុណ្យនៃសាសនាហិណ្ឌូ។
ពិធីបុណ្យនេះតែងប្រព្រឹត្តទៅនៅចុងរដូវរំហើយ នាអារាមបុរាណ Sri Achappan ស្ថិតនៅBavithram Vellalapatti ដែលជាភូមិដាច់ស្រយាលមួយស្ថិតនៅភាគខាងត្បូងឥណ្ឌា។
ក្នុងចំណោមស្ត្រីដែលស្ម័គ្រចិត្តឱ្យគ្រូសិល្ប៍វាយដំទាំងនោះ មានខ្លះត្រូវបានឪពុកម្តាយបង្ខំឱ្យចូលរួម ។អ្នកចូលរួមជាច្រើនឱ្យដឹងថា៖ «ការវាយដំបែបនេះពិតជាឈឺណាស់ ប៉ុន្តែយើងត្រូវតែទ្រាំ ដើម្បីឱ្យយើងបានជាសះស្បើយពីជំងឺ ក៏ដូចជាបណ្តេញព្រលឹងខ្មោច ព្រាយដែលតាមយាយី។
និស្សិតម្នាក់ឈ្មោះ Vanity ដែលត្រូវបានឳពុកម្តាយចាប់បង្ខំឱ្យចូលរួមក្នុងពិធីនេះ ពោលថា៖ «ឳពុកមា្តយខ្ញុំបង្ខំខ្ញុំឱ្យចូលរួម ។ឥឡូវនេះមិត្តភក្តិខ្ញុំសម្លឹងមើលខ្ញុំក្នុងកែវភ្នែកមានការសង្ស័យ ដោយសារតែខ្ញុំបានចូលរួមក្នុងពិធីមួយទុកសម្រាប់ព្យាបាលមនុស្សឆ្កួត៕លីសា
