សព្វថ្ងៃនេះ ក្មេងៗជំនាន់ក្រោយៗយ៉ាងច្រើនដែលមានអាយុចាប់ពី ៣០ ចុះក្រោម អាចនិយាយបានថាស្ទើរតែពុំស្គាល់អំពីឧបករណ៍របស់ដូនតាខ្មែរយើង «ត្បាល់ជាន់» ឬ «ត្បាល់បុកស្រូវ» នោះទេ ប៉ុន្តែ ចាប់ពី ៣០ ឆ្នាំ ឡើងទៅ នឹងប្រាកដណាស់ជាបានស្គាល់ ។
«ត្បាល់ជាន់» ត្រូវបានដឹងថា គឺជាឧបករណ៍ប្រើប្រាស់ដ៏សំខាន់មួយ ដើម្បីបម្រើឲ្យជីវភាពរស់របស់ប្រជាជនខ្មែរនាជំនាន់ដើម ដែលពុំអាចខ្វះបាន ដើម្បីបុកស្រូវយកអង្ករ ឬ សម្រាប់បុកអំបុកជាដើម ។ ឧបករណ៍នេះ គឺតម្រូវឲ្យមានកម្លាំងជាន់សង្កត់ពី ១នាក់ ទៅ២នាក់ តាមដែលអាចធ្វើទៅបាន និងអ្នកចាំផាត់តែ១នាក់ប៉ុណ្ណោះ ។
ប៉ុន្តែ គួរឲ្យសោកស្តាយ ដោយសារតែនៅតាមស្រុកភូមិជាច្រើននៅទូទាំងប្រទេស បានកកើតមានរោងម៉ាស៊ីនកិនស្រូវយ៉ាងផុសផុល ហេតុនេះ «ត្បាន់ជាន់» ក៏បានបាត់ស្រមោលបន្តិចម្តងៗរហូតមកទល់សព្វថ្ងៃនេះ ។
ទោះយ៉ាងណា តាមរយៈការចែករំលែកវីដេអូដោយគណនីហ្វេសប៊ុក Phalla Phorn ជាសប្បុរសជនលេចធ្លោមួយរូបជួយដល់ជនក្រីក្រក្នុងសង្គម បានធ្វើឲ្យកូនខ្មែរយ៉ាងច្រើនភ្ញាក់ផ្អើលជាខ្លាំង ខណៈបានឃើញ «ត្បាល់ជាន់» ដូនតាខ្មែរយើងបន្សល់ទុក ត្រូវបានកែច្នៃដោយប្រើម៉ាស៊ីន «ជាន់» ជំនួសកម្លាំងមនុស្សដ៏អស្ចារ្យបែបនេះ ស្ថិតនៅភូមិសាងគួរ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ។ យ៉ាងណាមិញ ការកែច្នៃត្បាល់ជាន់ ដើម្បីប្រកបរបរដាល់អំបុកដោយប្រើម៉ាស៊ីននេះផងដែរ នៅតាមបណ្តោយផ្លូវជាតិលេខ១ ស្ថិតក្នុងទឹកដីនៃឃុំក្រោលគោ ស្រុកស្វាយជ្រំ ខេត្តស្វាយរៀង ក៏ត្រូវបានគេឃើញមានច្រើនហូរហែរ ៕ ដោយ៖ ឧត្តម
តោះ! ទស្សនាវីដេអូខាងក្រោមទាំងអស់គ្នា៖
