ខេត្តស្វាយរៀង ៖ មន្ទីរបរិស្ថានខេត្តស្វាយរៀង សហការជាមួយរដ្ឋបាលក្រុងបាវិត និងក្រុមហ៊ុនហាយប្រីដប្រមូលសំរាម នៅរសៀលថ្ងៃទី៦ ខែវិច្ចិកាឆ្នាំ២០១៨ បានចុះផ្សព្វផ្សាយ និងដឹកនាំក្រុមយុវជន កងកម្លាំង ធ្វើការសម្អាតបរិស្ថាន បាញ់ទឹកសម្អាតផ្លូវជាតិលេខ១ ជិតព្រំដែនច្រកទ្វារអន្តរជាតិបាវិត និងរើសសំរាមតាមផ្លូវនានាផងដែរក្នុងគោលបំណងពង្រឹងការយល់ដឹង ពីការធ្វើអនាម័យ សំអាតបរិស្ថាន និងលើកកម្ពស់សុខុមាលភាពរបស់ប្រជាពលរដ្ឋ។
លោកហែ សាន អនុប្រធានមន្ទីរបរិស្ថាន ខេត្តស្វាយរៀង បានឱ្យដឹងថាៈឡើងថា ដើម្បីឲ្យការគ្រប់គ្រងសំរាម សំណល់រឹង-សំណល់រាវបានល្អ មន្ទីរមានការសហការ ជាមួយអាជ្ញធរដែនដី និងដៃគូពាក់ព័ន្ធនានា ជាទិសដៅ រាជរដ្ឋាភិបាលតែងតែយកចិត្តទុកដាក់ លើការគ្រប់គ្រងគុណភាព បរិស្ថានជាអាទិភាព ពីព្រោះការបំពុលបរិស្ថាន នឹងធ្វើឱ្យជួបប្រទះ នូវបញ្ហាជាច្រើនដូចជាសុខភាព សេដ្ឋកិច្ចនិងការប្រែប្រួលអាកាសធាតុជាដើម។
អាជ្ញាធរក្រុងបាវិតបានបញ្ជាក់ផងដែរថា គោលបំណងរបស់សាលាក្រុង គឺរៀបចំធ្វើយុទ្ឋនាការនេះជាប្រចាំ ដើម្បីលើកកម្ពស់សោភ័ណភាពទីក្រុង ដែលអាចទាក់ទាញភ្ញៀវទេសចរ និងធ្វើឱ្យប្រជាពលរដ្ឋមានសុខភាពល្អ។
សូមបញ្ជាក់ថា សព្វថ្ងៃសម្រាមនៅក្រុងបាវិត ក្នុងមួយថ្ងៃប្រមាណពី១២០ទៅ១៧០តោន ហើយក្នុងនោះក្រុមហ៊ុនហាយប្រីដ ប្រតិបត្តិការប្រមូលសំរាម ដោយមានរថយន្ត ដែលត្រូវដឹកសំំរាមរបស់ក្រុមហ៊ុនមាន ១៩គ្រឿង និងកម្មករ ប្រមាណជិត៥០នាក់ ហើយកាលពីមុនក្នុងមួយថ្ងៃ មានសំរាមតែ៧០ទៅ៩០តោនប៉ុណ្ណោះ តែនៅឆ្នាំ២០១៨នេះ សំំរាមកើនដល់ពី១២០ទៅ១៧០តោន ក្នុងមួយថ្ងៃដូច្នេះមានការកើនឡើងច្រើនជាងមុន ដោយសារកំណើនរបស់ប្រើប្រាស់ និងគ្រឿងហូបចុកតាមរោងចក្រ កាស៊ីណូនិងតាមផ្ទះប្រជា ពលរដ្ឋ កើនឡើងពីមួយថ្ងៃទៅមួយថ្ងៃ៕ វ៉ៃគោ