ខេត្តកោះកុង ៖ ពលរដ្ឋជាច្រើនគ្រួសារនៅស្រុកកោះកុង ខេត្តកោះកុង កាលពីព្រឹកថ្ងៃទី៧ ខែវិច្ឆិកាឆ្នាំ២០១៨ បានផ្ទុះការតវ៉ាដោយដុតកង់ឡាននៅមុខស្នាក់ការអង្គការសម្ព័ន្ធមិត្តសត្វព្រៃ(WILD AlIANCE) ដែលមានទីតាំងស្ថិតនៅក្នុងឃុំត្រពាំងរូង ស្រុកកោះកុង។
ប្រជាពលរដ្ឋបានឲ្យដឹងថា ពួកគាត់មកប្រមូលផ្តុំគ្នាធ្វើការតវ៉ានេះ ដើម្បីទាមទាឲ្យក្រុមមន្ត្រីអង្គការសម្ព័ន្ធមិត្តសត្វព្រៃ ចេញមកបកស្រាយ និងបញ្ជាក់ពីមូលហេតុ ដែលអង្គការនេះបានដឹកនាំកម្លាំងទៅកាប់បំផ្លាញផលដំណាំ របស់ពួកគាត់ នៅលើដីដែលក្រុមយុវជនសម្តេចតេជោ ហ៊ុន សែន ចុះវាស់វែងឲ្យកាន់កាប់កាលពីពេលកន្លងទៅ។
ពលរដ្ឋបានឲ្យដឹងបន្ថែមថា នៅចំពោះមុខការតវ៉ារបស់ពួកគាត់ គឺពុំមានខាងក្រុមមន្ត្រីអង្គការណាម្នាក់ចេញមកបកស្រាយ និងបញ្ជាក់ពីមូលហេតុទេ។
ជាមួយគ្នានេះលោក សុខ សុទ្ធី អភិបាលរងខេត្តកោះកុង និងមន្ត្រីអ្នកមុខអ្នកការជាច្រើនរូបទៀត បានចុះទៅសម្របសម្រួល ដោយស្នើរសុំឲ្យបងប្អូនប្រជាពលរដ្ឋរក្សាភាពស្ងៀមស្ងាត់ កុំប្រើអំពើហិង្សា ទុកពេលឲ្យលោក និងក្រុមការងាររកដំណោះស្រាយទៅតាមផ្លូវច្បាប់។
សូមបញ្ជាក់ថា ការតវ៉ានេះ បានផ្ទុះឡើងបន្ទាប់ពីកម្លាំងខាងអង្គការសម្ព័ន្ធមិត្តសត្វព្រៃជាច្រើននាក់ ប្រដាប់ដោយអាវុធ កាលពីរសៀលថ្ងៃទី៦ ខែវិច្ឆិកាឆ្នាំ២០១៨ បានចុះទៅកាប់បំផ្លាញផលដំណាំប្រជាពលរដ្ឋ ដែលបានដាំជាលក្ខណៈចំការគ្រួសារមាន៖ ដើមដូង ធុរ៉េន ចេក មង្ឃុត ភ្ញៀវ និងចន្ទី ជាដើម ដោយចោទប្រកាន់ថា ពលរដ្ឋទាំងនោះបានធ្វើចំការនៅលើដីក្នុងតំបន់អភិរក្សសត្វព្រៃ ដែលគ្រប់គ្រងដោយអង្គការសម្ពន្ធ័មិត្តសត្វព្រៃ៕ ដោយ៖ ដែន សីមា