ភ្នំពេញ ៖ បុរសម្នាក់បានបើករថយន្តស៊េរីទំនើបមួយគ្រឿងម៉ាក Land Cruiser ពណ៌ស ពាក់ស្លាកលេខភ្នំពេញ 2AV-0079 ក្នុងល្បឿនលឿនទៅបុកដើមឈើ បណ្ដាលឲ្យរថយន្តក្រឡាប់បះជើងបង្កជាអគ្គិភ័យ ឆេះខ្ទេចនៅសល់តែគ្រោងឆ្អឹង កាលពីវេលាម៉ោង១១យប់ថ្ងៃទី៧ ខែវិច្ឆិកា ឆ្នាំ២០១៨ ដែលមានទីតាំងស្ថិតនៅតាមបណ្ដោយផ្លូវលេខ២៧១ មុខវិទ្យាល័យជាស៊ីមសាមគ្គី ស្ថិតក្នុងសង្កាត់បឹងសាឡាង ខណ្ឌទួលគោក ក្រុងភ្នំពេញ។
ប្រជាពលរដ្ឋនៅក្បែរកន្លែងកើតហេតុ បាននិយាយថា នៅមុនពេលកើតហេតុ គាត់បានឮសំឡេងផ្ទុះយ៉ាងខ្លាំង ហើយក៏ចេញមកមើលស្រាប់តែឃើញរថយន្តស៊េរីទំនើបមួយគ្រឿងម៉ាក Land Cruiser ពណ៌ស ពាក់ស្លាកលេខភ្នំពេញ 2AV-0079 កំពុងតែក្រឡាប់ឆេះយ៉ាងសន្ធោសន្ធៅ នៅជាប់នឹងរបងសាលាវិទ្យាល័យ ជាស៊ីម សាមគ្គី ភ្លាមៗនោះដែរ កម្លាំងមូលដ្ឋានក៏បានទំនាក់ទំនងទៅឲ្យខាងផ្នែកពន្លត់អគ្គិភ័យ បានចេញមកអន្តរាគមន៍ ដើម្បីធ្វើការបាញ់ពន្លត់អស់រថយន្តមួយគ្រឿងរលត់ទាំងស្រុងតែម្ដង។ នៅក្នុងករណីបើករថយន្តបុកដើមឈើក្រឡាប់ផ្ទុះឆេះនេះមិនបណ្តាលឲ្យមានមនុស្សរងរបួសនោះទេ។
រថយន្តបង្ក ត្រូវបានសមត្ថកិច្ចជំនាញធ្វើការស្ទូច យកទៅរក្សាទុកនៅ ការិយាល័យចរាចរណ៍ផ្លូវគោក នៃស្នងការដ្ឋាននគរបាល រាជធានីភ្នំពេញ ដើម្បីរង់ចាំម្ចាស់ចូលខ្លួន មកដោះស្រាយទៅតាមផ្លូវច្បាប់៕ ដោយ ៖ បញ្ញាស័ក្តិ
