ភ្នំពេញ ៖ នៅរសៀលពុធ ទី៧ ខែវិច្ឆិកា ឆ្នាំ២០១៨នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានអនុញ្ញាតឲ្យលោកស្រី Rhona Smith អ្នករាយការណ៍ពិសេស អង្គការសហប្រជាជាតិ ទទួលបន្ទុកស្ថានភាពសិទ្ធិមនុស្សនៅកម្ពុជាចូលជួបពិភាក្សាការងារ នៅទីស្ដីការក្រសួងមហាផ្ទៃ។
បន្ទាប់ពីបញ្ចប់ជំនួបនោះ លោក ផាត សុផានិត អ្នកនាំពាក្យក្រសួងមហាផ្ទៃ បានថ្លែងប្រាប់ក្រុមអ្នកសារព័ត៌មានថា កិច្ចការងារសំខាន់ៗ ចំនួន៣ ដែលលោកស្រី រ៉ូណា ស្មីត លើកយកមកពិភាក្សាជាមួយ សម្ដេចក្រឡាហោម ស ខេង រួមមាន ៖ ទី១៖ពាក់ព័ន្ធអនុវត្តគោលដៅអភិវឌ្ឍន៍ប្រកបដោយចីរភាព២០១៦ និងអង្គការសង្គមស៊ីវិល ទី២៖ពាក់ព័ន្ធបញ្ហាគណនីយភាព និងទី៣៖ពាក់ព័ន្ធរឿងចង្អៀតណែន ក្នុងពន្ធនាគារ។
បើតាមអ្នកនាំពាក្យ៖ សម្ដេចក្រឡាហោម ស ខេង បានប្រាប់លោកស្រី រ៉ូណា ស្មីត ថា ដើម្បីដោះស្រាយបញ្ហាប្រឈមផ្សេងៗ ក៏ដូចជាផ្សារភ្ជាប់ភាពជាដៃគូរ និងការធ្វើការជាមួយគ្នាដើម្បីសង្គម គឺរាជរដ្ឋភិបាល បានបង្កើតក្រុមការងារមួយ ដើម្បីធ្វើការដោះស្រាយការងារផ្សេងៗ ដែលជាក្ដីបារម្ភ ឬក៏ជាមតិលើកឡើង របស់សង្គមស៊ីវិល ពាក់ព័ន្ធការអនុវត្តសកម្មភាពរបស់ពួកគាត់ ហើយនៅពេលមានបញ្ហាអ្វីអាចដាក់ជាសំណួរ និងមតិផ្សេងៗ។
ជាការឆ្លើយតប លោកស្រី រ៉ូណាស្មីត សម្ដែងនូវការរីករាយចំពោះគំនិតផ្ដួចផ្ដើមរបស់រាជរដ្ឋាភិបាលកម្ពុជា ក្នុងការបង្កើនឲ្យមានការផ្សាភ្ជាប់ភាពជាដៃគូ ជាមួយអង្គការ សង្គមស៊ីវិល និងNGOs តាមរយៈការបង្កើតនូវវេទិកា ក៏ដូចជាចេញសេចក្ដីជូនដំណឹងថ្មី កាលពីខែតុលា ដើម្បីបញ្ជាក់ឲ្យកាន់តែច្បាស់ និងធ្វើឲ្យសង្គមស៊ីវិល និងអង្គការ NGOs មានទំនុកចិត្តក្នុងការអនុវត្តសកម្មភាព ដើម្បីចូលរួមក្នុងការអភិវឌ្ឍន៍សង្គមកម្ពុជា។
សម្ដេចក្រឡាហោម ស ខេង បានបញ្ជាក់ថា រាជរដ្ឋាភិបាលកម្ពុជា ដែលមានក្រសួងមហាផ្ទៃ ជាសេនាធិការ បានខិតខំយកចិត្តទុកដាក់ ដើម្បីលុបបំបាត់នូវចំណុចអសកម្មផ្សេងៗ ដែលកម្ពុជាខិតខំបង្កើតឲ្យមានយន្ដការច្រកចេញចូលតែមួយនៅគ្រប់រាជធានី-ខេត្ត ខណៈដែលទិសដៅធ្វើឲ្យបានគ្រប់ស្រុក ដើម្បីផ្ដល់សេវាឲ្យកាន់តែជិតជាមួយប្រជាពលរដ្ឋកាន់តែឆាប់រហ័ស និងមានតម្លាភាព។ ការិយាល័យច្រកចេញចូលតែមួយនេះ ក៏មានកន្លែងទទួលពាក្យបណ្ដឹងប្រជាពលរដ្ឋដើម្បីដោះស្រាយ អ្វីដែលជាចំណុចអសកម្មនៅក្នុងការផ្ដល់សេវា ជូនប្រជាពលរដ្ឋនៅថ្នាក់មូលដ្ឋាន។
សម្ដេចក្រឡាហោម ស ខេង បានជម្រាបជូនថា បញ្ហាគ្រឿងញៀនជាបញ្ហាមួយ ដែលជាការប្រឈមមួយរបស់សង្គមកម្ពុជា ព្រោះថាបើសមត្ថកិច្ចមិនបង្ក្រាបគ្រឿងញៀនទេនោះ បញ្ហានេះ នឹងរីករាលដាលនៅក្នុងសង្គម ហើយក៏ជាការទទួលខុសត្រូវមួយដ៏ធំរបស់រាជរដ្ឋាភិបាលកម្ពុជា។
សម្ដេចក្រឡាហោម ស ខេង បន្ថែមថា សមត្ថកិច្ចជៀសមិនផុតនោះទេ អំពីការឃាត់ខ្លូន និងឃុំខ្លួនជនសង្ស័យ ដែលនាំឲ្យជាបញ្ហាក្នុងចង្អៀតណែនក្នុងពន្ធនាគារ។ ប៉ុន្ដែដើម្បីដោះស្រាយបញ្ហានេះ រាជរដ្ឋាភិបាល និងក្រសួងមហាផ្ទៃ គឺបានខិតខំ និងកំពុងតែសាងសង់នូវហេដ្ឋារចនាសម្ព័ន្ធក្នុងពន្ធនាគារបន្ថែម នៅតាមខេត្ត ដើម្បីធ្វើយ៉ាងណាជួយរំលែកទុក ពន្ធនាគារនៅភ្នំពេញ ក៏ដូចជានៅពន្ធនាគារណាដែលមានភាពចង្អៀតខ្លាំង។ សម្ដេច ស ខេង ក៏ចង់ឲ្យមានកិច្ចប្រជុំមួយ ដើម្បីធ្វើការរួមគ្នា ដោះស្រាយបញ្ហាការឃុំខ្លួន មុនកាត់សេចក្ដី នៃអ្នកជាប់ឃុំមួយចំនួន ដែលចំនួនអ្នកឃុំខ្លួន មុនកាត់សេចក្ដីនេះ ក៏ជាផ្នែកមួយដែលធ្វើឲ្យមានការចង្អៀតណែនក្នុងពន្ធនាគារ។
លោកស្រី រ៉ូណា ស្មីត ក៏បានសម្ដែងនូវការអបអរសាទរផងដែរ ហើយក៏លើកទឹកចិត្តឲ្យរដ្ឋាភិបាល ក៏ដូចជាក្រសួងមហាផ្ទៃ បន្ដខិតខំធ្វើយ៉ាងណា ពង្រឹងបន្ថែម បង្កើតបន្ថែមនូវការិយាល័យច្រកចេញចូលតែមួយនេះ ដើម្បីបម្រើប្រជាពលរដ្ឋឲ្យកាន់តែងាយស្រួល និងកាន់តែជិតស្និទ្ធជាមួយប្រជាពលរដ្ឋ។ លោកស្រី រ៉ូណា ស្មីត ក៏បានគាំទ្រចំពោះអ្វីដែលរាជរដ្ឋាភិបាល បានធ្វើកន្លងមកពាក់ព័ន្ធការសាងសង់ហេដ្ឋារចនាសម្ព័ន្ធក្នុងពន្ធនាគារ ហើយលោកស្រីថា ប្រសិនបើមានកិច្ចប្រជុំរវាងក្រសួងមហាផ្ទៃ ឬស្ថាប័នពាក់ព័ន្ធក្នុងការធ្វើយ៉ាងណាខិតខំដោះស្រាយពន្លឿនការកាត់សេចក្ដី ក៏ដូចជាដោះស្រាយចំពោះអ្នកឃុំខ្លួន រង់ចាំការកាត់សេចក្ដីនេះបានជាកត្តាមួយល្អ៕ ដោយ ៖ បញ្ញាស័ក្តិ
