អាជ្ញាធរក្នុងប្រទេសឥណ្ឌូណេស៊ី ដែលបានបញ្ចេញសកម្មភាពបញ្ជារថយន្តពន្លត់អគ្គីភ័យ បង្ក្រាបទៅលើស្ត្រីជាខ្ទើយ៣នាក់ ដោយអះអាងថាធ្វើឡើងដើម្បីលាងជម្រះ «ភាពមិនបរិសុទ្ធ» របស់ពួកគេ បានធ្វើឲ្យមហាជនផ្ទុះកំហឹងយ៉ាងខ្លាំងក្លាតែម្តង ។ ហេតុការណ៍នេះ បានកើតឡើងនៅកន្លែងទេសចរណ៍មួយកន្លែង ក្នុងខេត្ត Lampung ភាគពាយព្យនៃរដ្ឋធានីហ្សាកាតា កាលពីថ្ងៃទី២ ខែវិច្ឆិកា ឆ្នាំ២០១៨ ។
យោងតាម VOA Indonesia, នោះមន្ត្រីមកពីទីភ្នាក់ងារសណ្តាប់ធ្នាប់សាធារណៈ Satpol PP នៃក្រុម Pesisir Barat Regency បានចាប់ខ្លួនខ្ទើយ៣នាក់នោះ មុនពេលធ្វើបាបពួកគេ នៅក្នុងអ្វីដែលគេហៅថា “mandi wajib” ដែលជាពិធីងូតទឹកតាមទំលៀមទម្លាប់អ៊ីស្លាម ដើម្បីជម្រះចេញនូវ “junub” ឬ “ភាពមិនបរិសុទ្ធ” ដែលទាក់ទងនឹងការសេពកាមតាមទ្វារបាត ។
ក្រុម Satpol PP បន្ទាប់មក បានបង្ហោះរូបថតនៃលទ្ធផលនេះ នៅលើទំព័រហ្វេសប៊ុករបស់ខ្លួន ដែលនាំឲ្យក្រុមស្រាវជ្រាវនៃអង្គការឃ្លាំមើលសិទិ្ធមនុស្ស (HRW) នៅឥណ្ឌូនេស៊ី លោក Andreas Harsono បានចែករំលែកនៅលើ Twitter បន្ត ។
ជាការឆ្លើយតប អង្គការ LBH Masyarakat (មូលនិធិជំនួយផ្នែកច្បាប់សហគមន៍) បានរិះគន់ទង្វើរបស់មន្ត្រីប៉ូលីសថាជាអ្នកប្រព្រឹទ្ធឡើងក្រៅប្រព័ន្ធតុលាការ ។
ស្ត្រីអ្នកនាំពាក្យ Naila Rizki បាននិយាយថា៖ «តើមានច្បាប់ណាមួយដែលបង្ហាញថាអំពើអមនុស្សធម៌ ក្នុងការបង្ក្រាបមនុស្សនៅពេលយប់ដោយប្រើទុយយ៉ោរថយន្តពន្លត់អគ្គីភ័យបាញ់បែបនេះដែរ ឬទេ? ហើយតើមានការដាក់ទណ្ឌកម្មណាមួយដូចនេះនៅក្នុងច្បាប់តំបន់ទេ?» ។ អ្នកស្រីបន្តថា៖ «គោលបំណងរបស់ពួកមន្ត្រីទាំងនោះ គឺដើម្បីធ្វើទារុណកម្មលើមនុស្ស និងធ្វើឲ្យអាប់ឱនកិត្តិយសពួកគេតែម្តង ។ ដូច្នេះ គោលបំណងរបស់ពួកគេ គឺមិនមែនដើម្បីអនុវត្តច្បាប់ឡើយ ប៉ុន្តែ ធ្វើឡើងតាមតែទំនើងចិត្តផ្ទាល់ខ្លួនរបស់ពួកគេប៉ុណ្ណោះ» ។
សមាជិកអនាមិកម្នាក់បាននិយាយថា៖ «ខ្ញុំសូមផ្ញើសារមួយនេះទៅកាន់អាជ្ញាធរទាំងនោះថា ក្នុងនាមជាប៉ូលីស, Satpol PP, យោធា ជាដើម សូមអស់លោកមើលឃើញ LGBT ជាមនុស្សខ្លះផង ។ ថ្វីបើពួកយើងបែបនេះក៏ដោយ តែពួកយើងមានសិទ្ធិដូចគ្នានឹងពលរដ្ឋឥណ្ឌូនេស៊ីទាំងអស់ដែរ» ។
បន្ទាប់ពីរូបភាពដ៏គួរឲ្យអាសូរនេះ បានរីករាលដាលនៅលើបណ្តាញសង្គម មនុស្សជាច្រើនដែលគាំទ្រខាងស្ត្រីជាខ្ទើយរងគ្រោះទាំងនោះយ៉ាងដូច្នេះថា៖
«ខ្ញុំសូមធ្វើការថ្កោលទោសយ៉ាងខ្លាំងក្លា ចំពោះទង្វើធ្វើតាមតែអំពើចិត្តបែបនេះ របស់ពួកមន្រ្តីទាំងនោះ!»
«ពួកគេក៏ជាមនុស្ស, ជាពលរដ្ឋឥណ្ឌូនេស៊ី ហេតុនេះ ពួកគេមានសិទ្ធិដូចគ្នានឹងអស់លោកដែលបានបង្ក្រាបពួកគេដែរតាស!!»
«សង្ឃឹមថា ពួកអ្នកដែលធ្វើបាបសហគមន៍ LGBT នឹងទទួលទណ្ឌកម្មធ្ងន់ធ្ងរពីព្រះ Allah»
«ថ្វីបើពួកគេក្លាយជាមនុស្សយ៉ាងនេះក៏ដោយ តែពួកគេក៏មិនគួរត្រូវបានធ្វើបាបបែបនេះឡើយ ។ វាពិតជាអមនុស្សធម៌ខ្លាំងណាស់»
ជាមួយរឿងរ៉ាវដ៏ក្តៅគគុកនេះផងដែរ លោក Harsono ដែលជាសិល្បករម្នាក់នៅក្នុងប្រទេសឥណ្ឌូនេស៊ី ក៏បានចូលរួមបញ្ចេញមតិទូន្មានថា៖ «មន្ត្រីឥណ្ឌូនេស៊ីនៅគ្រប់ជាន់ថ្នាក់ទាំងអស់ ត្រូវតែការពារក្រុម LGBT ពីអំពើហិង្សា និងការរើសអើង ។ អភិបាលខេត្ត West Java លោក Ridwan Kamil គួរតែគាំទ្រឲ្យបានម៉ឺងមាត់នូវសិទ្ធិមូលដ្ឋានរបស់ប្រជាជនឥណ្ឌូនេស៊ីទាំងអស់ ក្នុងនោះរួមទាំង LGBT ផងដែរ» ៕ ដោយ៖ ឧត្តម (ប្រភព៖ Nextshark)
