Christian Daghio អាយុ ៤៦ ឆ្នាំ អតីតកីឡាករ Muay Thai មកពីប្រទេសអ៊ីតាលី ត្រូវបានប្រកាសថាស្លាប់ បន្ទាប់ត្រូវបានដៃគូប្រកួតរបស់គាត់បានវាយឲ្យសន្លប់ធំ នៅក្នុងទឹកចុងក្រោយទី១២ ក្នុងអំឡុងការប្រកួតលក្ខណៈសកលប្រភេទទម្ងន់ធ្ងន់ ដណ្តើមពានរង្វាន់ប្រាក់របស់ក្រុមប្រឹក្សាកីឡាប្រដាល់ស៊ី WBC ។
ហេតុការណ៍ដ៏រន្ធត់នេះ បានកើតឡើងនៅសង្វៀនប្រដាល់ នៃពហុកីឡាដ្ឋានអន្តរជាតិ Rangsit ក្នុងទីក្រុង Rangsit (ក្បែរបាងកក) ប្រទេសថៃ កាលពីថ្ងៃទី២៦ ខែតុលា ។ កីឡាករ Christian Daghio ត្រូវបានគូប្រកួតកីឡាករ Don Parueang ប្រើកណ្តាប់ដៃធ្ងន់ៗជាច្រើនដងទៅលើផ្ទៃមុខរបស់គាត់ នៅក្នុងការប្រកួតទឹកទី១២ ។ នៅក្នុងទឹកចុងក្រោយនេះ គាត់ត្រូវបានអាជ្ញាកណ្តាលរាប់ ខណៈដួលលើកទី១ ប៉ុន្តែ បន្ទាប់ពីរាប់រួចបន្តការប្រកួតទៀត គាត់ក៏ត្រូវរងកណ្តាប់ដៃធ្ងន់ៗឡើងញាប់ស្មេរពី Parueang បណ្តាលឲ្យដួលសន្លប់ធំងើបលែងរួចតែម្តង ។
ស្ថិតក្នុងស្ថានភាពនេះ អាជ្ញាកណ្តាលក៏បានបញ្ឈប់ការប្រកួត ហើយហៅគ្រូពេទ្យមកពិនិត្យ ។ ប៉ុន្តែ ដោយសារស្ថានភាពសន្លប់របស់គាត់ធ្ងន់ធ្ងរ គេក៏បានបញ្ជូនគាត់ទៅសង្គ្រោះនៅមន្ទីរពេទ្យ ។ ទោះយ៉ាងណា គាត់នៅតែសន្លប់ និងពុំដឹងខ្លួននោះទេ ហើយក៏ត្រូវបានគ្រូពេទ្យប្រកាសថាស្លាប់នៅថ្ងៃទីសុក្រ (០២ វិច្ឆិកា) ។
បងប្រុសរបស់គាត់ឈ្មោះ Fabrizio បាននិយាយទៅកាន់សារព័ត៌មានអ៊ីតាលីថា៖ «គាត់បានស្លាប់តាមបំណងរបស់គាត់ហើយ ។ ខ្ញុំពុំមានការសោកស្តាយអ្វីនោះទេ ព្រោះគាត់ចូលចិត្តអីចឹង ។ គាត់ចង់ប្រកួតរហូតគាត់មានអាយុ ៨០ ឆ្នាំ ។ សង្វៀនគឺជាជីវិតរបស់គាត់ ហើយគាត់ស្លាប់ក្នុងនាមជាជើងឯកម្នាក់ផងដែរ» ៕ ដោយ៖ ឧត្តម (ប្រភព៖ Nextshark)
