មួយសប្តាហ៍កន្លងមកហើយ ដែលមនុស្សជាច្រើនបាននិងកំពុងកាន់ទុក្ខដ៏ក្រៀមក្រំ ចំពោះជីវិតមនុស្ស ១៨៩ នាក់ ដែលបានស្លាប់គ្មានសល់នៅក្នុងគ្រោះថ្នាក់យន្តហោះ របស់ជើងហោះហើរក្រុមហ៊ុនអាកាសចរណ៍ Lion Air ។ ប៉ុន្តែ ខណៈពេលដែលមនុស្សជាច្រើននៅតែពុំទាន់ស្បើយទុក្ខផងនោះ ស្រាប់ថ្មីៗនេះ ជើងហោះហើរមួយទៀតរបស់ក្រុមហ៊ុននេះ បានជួបគ្រោះថ្នាក់ជាបន្តទៀតនៅក្នុងព្រលាន ធ្វើឲ្យអ្នកដំណើរមានការភិតភ័យយ៉ាងខ្លាំងតែម្តង ។
Astro Awani បានរាយការណ៍ថា ជើងហោះហើរពី Bengkulu ទៅកាន់ Jakarta លេខ JT 633 ត្រូវបង្ខំលុបចោលការធ្វើដំណើររបស់ខ្លួន បន្ទាប់ពីវាបានបុកជាមួយបង្គោលភ្លើង ក្នុងអំឡុងពេលរៀបចំហោះហើរកាលពីយប់ថ្ងៃពុធ (៧ វិច្ឆិកា) ។
គ្រោះថ្នាក់នេះមិនត្រឹមតែពន្យារពេលការហោះហើររបស់ខ្លួនប៉ុណ្ណោះទេ ប៉ុន្តែវាក៏បានបង្អាក់ជើងហោះហើរក្នុងស្រុកមួយផ្សេងទៀតរបស់ក្រុមហ៊ុនអាកាសចរណ៍ Batik Air ។
អ្នកនាំពាក្យរបស់ Lion Air ត្រូវបានដកស្រង់សម្តីដោយនិយាយថា៖ «ឧបទ្ទវហេតុនេះបានបណ្តាលឲ្យស្លាបខាងឆ្វេងរបស់យន្តនោះ ត្រូវដាច់អស់មួយដុំ, ដូច្នេះ យើងត្រូវបង្ខំលុបចោលជើងហើរ សម្រាប់ហេតុផលសុវត្ថិភាព» ។
របាយការណ៍បានបញ្ចេញឲ្យដឹងថា មានអ្នកដំណើរចំនួន ១៤៣ នាក់ នៅលើនោះ ប៉ុន្តែ ពុំមាននរណាម្នាក់របួសនោះទេ នៅក្នុងហេតុការណ៍នេះ ៕ ដោយ៖ ឧត្តម (worldofbuzz)