ភ្នំពេញ៖ សម្តេចតេជោ ហ៊ុន សែន ជួបសំណេះសំណាល ជាមួយកូនក្មួយកម្មករជាង១ម៉ឺននាក់ នៅរោងចក្រតំបន់អូរដឹម ។ សម្តេចតេជោ ហ៊ុន សែន បានថ្លែងថា “ពូសូមផ្តាំផ្ញើ បងប្អូន កូនក្មួយកម្មករ ទូទាំងប្រទេសថា បើក្មួយៗមិនពេញចិត្តអំពីរឿងអ្វីមួយនៅក្នុងរោងចក្រ គឺសូមកូនក្មួយព្យាយាមរួមគ្នាដោះស្រាយបញ្ហាដោយសន្តិវិធី សូមក្មួយៗកុំធ្វើអ្វីខុសច្បាប់ ដូចកាលពីថ្មីៗ នេះដែលកូនក្មួយបានបិទផ្លូវនៅវេងស្រេងដែលធ្វើអោយប៉ះពាល់ដល់បងប្អូនអ្នកធ្វើដំណើរ”។
សម្តេចតេជោ បានបន្តថា ចុះប្រសិនបើមានអ្នកឆ្លងទន្លេត្រូវធ្វើដំណើរតាមផ្លូវ ហើយទៅមិនរួចគឺនឹងកាន់តែបង្កបញ្ហាធំឡើងមិន ខាន។ សូមកូនក្មួយកុំធ្វើអ្វីអោយប៉ះពាល់អ្វីដល់ម្ចាស់រោងចក្រ ឬបង្កការខូចខាតដល់រោងចក្រអោយ សោះ។ បើមានបញ្ហាអ្វីគឺយើងត្រូវរួមគ្នាដោះស្រាយ ហើយពូនឹងចូលរួមដោះស្រាយជាមួយកូនក្មួយគ្រប់ ពេលជានិច្ច។ សម្តេចតេជោ ហ៊ុន សែន ផ្តល់ក្តីស្រលាញ់ និងស្នាមញញឹមដល់បងប្អូនកូនក្មួយកម្មការនីមានផ្ទៃពោះ។
នៅព្រឹកថ្ងៃទី ៦ធ្នូ នេះ បន្ទាប់ពីបានសំណេះសំណាលជាមួយកម្មករ កម្មការិនីនៅតំបន់រោងចក្រអូឌឹម ក្នុងខណ្ឌពោធិ៍សែនជ័យ រាជធានីភ្នំពេញរួចហើយ សម្តេចតេជោ ហ៊ុន សែន នាយករដ្ឋមន្ត្រី បានអញ្ជើញសួរសុខទុក្ខ និងផ្តល់ថវិកាឧបត្ថម្ភមួយចំនួនដោយផ្ទាល់ដៃជូនដល់កូនក្មួយស្ត្រីកម្មការនីមានផ្ទៃពោះ ចំនួន ៣០៨នាក់។ ទីណាដែលមានការលំបាក គឺយើងតែងតែឃើញវត្តមានសម្តេចនៅទីនោះជាមួយបងប្អូន កូនក្មួយជានិច្ច។
សម្តេចតេជោ ហ៊ុន សែន នឹងបន្តមើលថែរក្សាកូនក្មួយ និងបន្តដោះស្រាយបញ្ហានានាជូនបងប្អូនកម្មករ អោយទទួលបាននូវល័ក្ខខ័ណ្ឌការងារល្អ និងប្រាក់ខែល្អសមរម្យនៅទូទាំងប្រទេស។
នៅព្រឹកថ្ងៃទី៦ ខែធ្នូ ឆ្នាំ២០១៧នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជួបសួរសុខទុក្ខកូនក្មួយកម្មករកម្មការនី ចំនួន១៥៧៤២នាក់ មកពីរោងចក្រនានានៅតំបន់អូរដឹម ក្នុងខណ្ឌពោធិ៍សែនជ័យ រាជធានីភ្នំពេញ។
សម្តេចតេជោ ហ៊ុន សែន បានអញ្ជើញមកជួបជុំជាមួយបងប្អូន កូនក្មួយកម្មករកម្មការិនីក្នុងការចុះជួបសំណេះសំណាលប្រចាំសប្តាហ៍ដើម្បីស្វែងយល់ពីសុខទុក្ខផ្ទាល់ និងដើម្បីដោះស្រាយបញ្ហាប្រឈមនានាមួយចំនួនរបស់កម្មករ និងជំរុញនូវគោលនយោបាយអភិវឌ្ឍន៍វិស័យឧស្សាហកម្ម (២០១៥-២០២៥) ឲ្យកាន់តែមានប្រសិទ្ធភាពខ្ពស់។
នៅក្នុងថ្ងៃនេះដែរ សម្តេចតេជោ ហ៊ុន សែន បានស្នើសុំថៅកែរោងចក្រអនុញ្ញាតិអោយកម្មករកម្មការិនីទាំងអស់ទទួលបានការឈប់សំរាកមួយថ្ងៃដោយមិនមានការកាត់ប្រាក់ខែក្រោយពីចប់កម្មវិធីសំណេះ សំណាលនេះ។ សម្តេចតេជោ ហ៊ុន សែន ក៏បានអរគុណចំពោះក្រសួងការងារ និងបណ្តុះបណ្តាលវិជ្ជាជីវៈ តំណាងម្ចាស់ក្រុមហ៊ុន រោងចក្រ សហគ្រាស និងកូនក្មួយកម្មករកម្មការនី ទាំងអស់ដែលបានគោរពស្រលាញ់សម្តេច។ ការគោរពស្រឡាញ់នេះ គឺបានលើកទឹកចិត្តសម្តេចក្នុងការបន្តចុះសួរសុខទុក្ខ និងដោះស្រាយបញ្ហាជូនកូនក្មួយនៅទូទាំងប្រទេស។
សម្តេចតេជោ ហ៊ុន សែន បានបញ្ជាក់យ៉ាងម៊ឺងម៉ាត់ថាសង្គ្រាមមិនអាចកើតមានឡើងដរាបណា មានវត្តមាន សម្តេច ដឹកនាំប្រទេស។ សម្តេចតេជោ ប្តេជ្ញាការពារ និងថែរក្សាសន្តិភាពជូន ប្រជាពលរដ្ឋ និងប្រទេសជាតិអោយខានតែបាន។
ទន្ទឹមនឹងនោះដែរ សម្តេចតេជោ ហ៊ុន សែន នាយករដ្ឋមន្ត្រីបានផ្តល់នូវអនុសាសន៍សំខាន់ៗ ៥ចំណុច ដល់និយោជក និងនិយោជិតដើម្បីធ្វើការរួមគ្នាធានាដល់ល័ក្ខខ័ណ្ឌការងារល្អ និងប្រាក់ចំណូលល្អ: ត្រូវរួមគ្នាថែរក្សាសន្តិភាពស្ថេរភាព និងសុវត្ថិភាពសណ្តាប់ធ្នាប់សង្គមអោយបាន ល្អ។ រួមគ្នារក្សាការងារនិងបង្កើតការងារថ្មីៗច្រើនថែមទៀតដោយធ្វើការពង្រីកនិងបង្កើនទីផ្សារបន្ថែម។ រួមគ្នាបង្កើនប្រាក់ចំណូលដោយការបណ្តុះបណ្តាលចំណេះដឹងបន្ថែមដល់កម្មករ។ រាជរដ្ឋាភិបាល នឹងបន្តតម្លើងប្រាក់ខែកម្មករជារៀងរាល់ឆ្នាំកើន ទាំងប្រាក់បៀវត្សន៍អប្បរិមា និងប្រាក់អត្ថប្រយោជន៍ផ្សេងៗ ចំពោះតម្លៃទឹក ភ្លើង។ សម្តេចតេជោ បានអំពាវនាវដល់ម្ចាស់ផ្ទះកុំតម្លើងថ្លៃឈ្នួលផ្ទះរយៈពេល១ឆ្នាំ(២០១៨)ដើម្បីជួយកម្មករយើងអោយមានលទ្ធភាពរកប្រាក់ចំណូលបន្ថែមក្នុងការសម្រួលដល់ជីវភាពរស់នៅប្រចាំថ្ងៃអោយកាន់តែប្រសើរឡើង។ ផ្តល់របបគាំពារសន្តិសុខសង្គមដល់កម្មករ។ រាជរដ្ឋាភិបាលបន្តយកចិត្តទុកដាក់ផ្តល់កិច្ចគាំពារចំពោះកម្មករកម្មការិនីដែលកំពុងធ្វើការនៅក្រៅប្រទេសដោយធ្វើការសម្របសម្រួលជាមួយប្រទេសដៃគូដើម្បីផ្តល់នូវល័ក្ខខ័ណ្ឌការងារល្អៗដែលមានប្រាក់ខែល្អសមរម្យដល់កម្មករព្រមទាំងជួយសម្រួលនូវបែបបទលិខិតបទដ្ឋានផ្លូច្បាប់នានាដែលពាក់ព័ន្ធនឹងការងាររបស់បងប្អូនកូនក្មួយកម្មករ។ទន្ទឹមនឹងនេះដែររាជរដ្ឋាភិបាលនឹងបន្តជជែកជាមួយប្រទេសផ្សេងៗដូចជាកូរ៉េខាងត្បូងម៉ាឡេស៊ី និងប្រទេសថៃដើម្បីផ្តល់នូវល័ក្ខខ័ណ្ឌការងារ និងប្រាក់ខែល្អៗសម្រាប់បងប្អូនកូនក្មួយកម្មករខ្មែរ ៕ ដោយ៖កូឡាប