បុរសជនជាតិហូឡង់ម្នាក់ មានគម្រោងទម្លាក់អាយុរបស់គាត់ពី ៦៩ឆ្នាំ មកត្រឹម ៤៩ឆ្នាំ ដោយគាត់បញ្ជាក់ថា នៅវ័យ ៤៩ឆ្នាំនឹងធ្វើឲ្យគាត់ស្ថិតនៅតំណែងល្អបំផុត ដែលអាចឲ្យគាត់ធ្វើអ្វីៗ បានច្រើន។
បុរសរូបនោះមានឈ្មោះថា Emile Ratelband។ គាត់បានដាក់ពាក្យទៅកាន់រដ្ឋាភិបាលហូឡង់ ដើម្បីស្នើសុំបន្ថយអាយុគាត់ ២០ឆ្នាំ ដោយដូរថ្ងៃខែឆ្នាំកំណើតគាត់ពី ថ្ងៃទី ១១ ខែមិនា ឆ្នាំ ១៩៤៩ មកថ្ងៃទី ១១ ខែមិនា ឆ្នាំ ១៩៦៩ វិញ។
លោក Emile Ratelband ជាមនុស្សល្បីនៅលើបណ្តាញសង្គម និងអ្នកបង្រៀនសាសនាផងដែរ។
គាត់បានថ្លែងប្រាប់សារពត៌មាន BBC ដូច្នេះថា “ពួកយើងរស់នៅក្នុងពេលវេលា ដែលយើងអាចដូរឈ្មោះ និងភេទបាន ហើយដូច្នេះ ហេតុអ្វីខ្ញុំមិនអាចប្តូរអាយុបាន?”
លោកក៏បានថ្លែងប្រាប់តុលាការដែរថា ការមានអាយុផ្លូវការដែលមិនឆ្លុះបញ្ជាំងពីសភាពផ្លូវចិត្ត របស់គាត់វាគឺជាបញ្ហាប្រឈសម្រាប់អាជីព និងជីវិតស្នេហារបស់គាត់។
“នៅពេលខ្ញុំអាយុ ៦៩ឆ្នាំ ខ្ញុំមានដែនកំណត់។ ប្រសិនជាខ្ញុំអាយុ ៤៩ឆ្នាំ ខ្ញុំអាចទិញផ្ទះថ្មីបាន និងអាចបើកបរឡានផ្សេងៗបាន។ ខ្ញុំអាចធ្វើការងារបានច្រើន។ នៅពេលខ្ញុំអាយុ ៤៩ឆ្នាំ ជាមួយរូបរាងដែលខ្ញុំមាន ខ្ញុំនឹងស្ថិតនៅតំណែងដ៏ល្អខ្លាំង”។
ចៅក្រមបានទទូលស្គាល់ការលើកឡើងរបស់លោក Emile Ratelband ដែលបញ្ជាក់ថា ច្បាប់អនុញ្ញាតិឲ្យប្រជាជនមានការដូរភេទបាន ប៉ុន្តែក៏បានបញ្ជាក់ត្រឡប់មកវិញថា ការអនុញ្ញាតិឲ្យមានការដូរអាយុ វានឹងក្លាយជាការលុបផ្នែកខ្លះនៃជីវិតរបស់ពួកគេ៕ សុភ័ក្ត្រ