ខេត្តព្រះសីហនុ ៖ សមត្ថកិច្ចនគរបាល នៃស្នងការដ្ឋានខេត្តព្រះសីហនុ បានឱ្យដឹងថា មានមនុស្ស២នាក់បានស្លាប់ និង២នាក់ទៀតរងរបួស ដោយគ្រោះថ្នាក់ចរាចរណ៍រថយន្តបុកគ្នា កាលពីវេលាម៉ោង៦ព្រឹក ថ្ងៃទី៩ ខែវិច្ឆិកា ឆ្នាំ២០១៨ នៅលើផ្លូវជាតិលេខ៤ ត្រង់ចំណុច ផ្លូវបត់ទៅវត្តអូរត្រេះ ស្ថិតក្នុងក្រុម១៥ ភូមិ១ សង្កាត់១ ក្រុងព្រះសីហនុ។
របាយការណ៍ពីនគរបាលឱ្យដឹងថា គ្រោះថ្នាក់ចរាចរណ៍ខាងលើនេះ បង្កដោយ រថយន្ត ១គ្រឿងម៉ាក LEXUS RX330 ពណ៌ ស ពាក់ផ្លាកលេខភ្នំពេញ2AH-7808 បើកបរដោយឈ្មោះ ផល ស៊ីណា ភេទ ប្រុស អាយុ ២៥ឆ្នាំ មុខរបរ បុគ្គលិកហាងមនោរម្យ២ មានទីលំនៅភូមិ២ សង្កាត់លេខ៤ ក្រុង-ខេត្តព្រះសីហនុ មានអ្នករួមដំណើរម្នាក់ឈ្មោះ យស វ៉ាន់ឌី ភេទ ប្រុស អាយុ ៥៨ឆ្នាំ មុខរបរ យោធា មានទីលំនៅសង្កាត់ចតុមុខ ខណ្ឌដូនពេញ រាជធានីភ្នំពេញ មានទិសដៅពី ខេត្តព្រះសីហនុ ឆ្ពោះទៅរាជធានីភ្នំពេញ លុះដល់ចំណុចកើតហេតុខាងលើ ក៏បានបុកជាមួយរថយន្ត ១គ្រឿងម៉ាក LEXUS RX300 ពណ៌ ខ្មៅ ពាក់ផ្លាកលេខ ភ្នំពេញ2L-2376 បើកបរដោយឈ្មោះ ម៉ាត់ រី ភេទ ប្រុស អាយុ ៥២ឆ្នាំ មុខរបរ រត់តាក់ស៊ី មានទីលំនៅភូមិអូរត្រាវ ឃុំអណ្តូងថ្ម ស្រុកព្រៃនប់ ខេត្តព្រះសីហនុ មានអ្នករួមដំណើរចំនួន ០៣នាក់៖
១- ឈ្មោះ នី នាង ភេទ ស្រី អាយុ ៤៧ឆ្នាំ មុខរបរ លក់ដូរ (ប្រពន្ធអ្នកបើកបររថយន្ត) ។
២- ឈ្មោះ ម៉ាត់ សែ ភេទ ស្រី អាយុ ៣០ឆ្នាំ (កូនអ្នកបើកបររថយន្ត)
៣- ឈ្មោះ ម៉ាត់ សះរ៉ស់ ភេទ ស្រី អាយុ ២៦ឆ្នាំ មុខរបរ លក់ដូរ (កូនអ្នកបើកបររថយន្ត)។
អ្នករួមដំណើរទាំងអស់មានទីលំនៅជាមួយអ្នកបើកបររថយន្ត មានទិសដៅ ផ្ទុយគ្នា។
សមត្ថកិច្ចឱ្យដឹងថា គ្រោះថ្នាក់នេះបណ្ដាលឱ្យស្លាប់មនុស្សចំនួន ២នាក់ និង រងរបួសចំនួន ២នាក់ស្រី ម្នាក់។
សមត្ថកិច្ចឱ្យដឹងបន្តថា ជនរងគ្រោះឈ្មោះ យស់ វ៉ាន់ឌី អ្នករួមដំណើរលើរថយន្ត LEXUS RX330 រងរបួសធ្ងន់ បានបញ្ជូនទៅសង្គ្រោះនៅគ្លីនិកមិត្តភាពឃ្លាំងលើ ក្រោយមកស្លាប់។ ឈ្មោះ ម៉ាត់ រី អ្នកបើកបររថយន្តLEXUS RX300 រងរបួស ធ្ងន់ បានបញ្ជូនទៅសង្គ្រោះនៅមន្ទីរពេទ្យបង្អែកខេត្តព្រះសីហនុ ក្រោយមកស្លាប់។ ឈ្មោះ ផល ស៊ីណា អ្នកបើកបររថយន្ត LEXUS RX330 រងរបួសធ្ងន់ បានបញ្ជូនទៅសង្គ្រោះនៅគ្លីនិកមិត្តភាពឃ្លាំងលើ និងឈ្មោះ នី នាង អ្នករួមដំណើរលើរថយន្ត LEXUS RX300 រងរបួស ស្រាល បានបញ្ជូនទៅព្យាបាលនៅមន្ទីរពេទ្យបង្អែកខេត្តព្រះសីហនុ។
បច្ចុប្បន្នវត្ថុតាងរថយន្តទាំង ២គ្រឿងដែលរងការខូចខាត ត្រូវនគរបាលនាំយកមករក្សាទុក ដើម្បីបន្តដោះស្រាយតាមនិតិវិធីនៅថ្ងៃខាងមុខ៕ ដោយ៖ ដែន សីមា