ខេត្តស្វាយរៀង ៖ បុរសចំនួន៦នាក់រួមនិងវត្ថុតាងត្រូវបានសមត្ថកិច្ចនៃស្នងការដ្ឋាននគរបាលខេត្តស្វាយរៀងធ្វើការកសាងសំណុំរឿងបញ្ជូនទៅសាលាដំបូងខេត្តស្វាយរៀងនៅរសៀលថ្ងៃទី ០៩ . វិច្ឆិកា ឆ្នាំ . ២០១៨ នេះ។
ប្រភពព័ត៌មានពីសមត្ថកិច្ចបានឱ្យដឹងថាៈកម្លាំងការិយាល័យនគបាលព្រហ្មទណ្ឌកំរិតធ្ងន់ បានបញ្ជូនជនសង្ស័យ ចំនួន០៦នាក់ ទៅសាលាដំបូងខេត្តស្វាយរៀង ៖
១ ឈ្មោះ សល់ គុយ ភេទប្រុស ឣាយុ ២០ ឆ្នាំជាតិខ្មែរ មុខរបរជាងដែក រសនៅភូមិទ័ពស្តេច ឃំុច្រេស ស្រុកមេសាង ខេត្តព្រៃវែង។
២ ឈ្មោះ រិន ជាតិ ភេទប្រុស ឣាយុ ២៧ ឆ្នាំជាតិខ្មែរ មុខរបរជាងដែក រស់នៅភូមិវិហា ឃំុច្រេស ស្រុកមេសាង ខេត្តព្រៃវែង។
៣ ឈ្មោះ ខឿន ដារ៉ា (ច្រូច) ភេទប្រុស ឣាយុ ១៩ ឆ្នាំជាតិខ្មែរ មុខរបរកសិករ រស់នៅភូមិឣណ្តូងតាស្រែន ឃុំច្រេស ស្រុកមេសាង ខេត្តព្រៃវែង។
៤ ឈ្មោះ សៀន សុខចាន់ដារ៉ា ភេទប្រុស ឣាយុ ១៥ ឆ្នាំជាតិខ្មែរ មុខរបរសិស្ស រស់នៅភូមិថ្នល់កែង ឃុំស្មោងខាងជើង ស្រុកកំចាយមា ស្រុកព្រៃវែង។
៥ ឈ្មោះ ជី ធារី ភេទប្រុស ឣាយុ ១៦ ឆ្នាំជាតិខ្មែរ មុខរបរមិនពិតប្រាកដ រស់នៅភូមិឣណ្តូងតាស្រែន ឃុំច្រេស ស្រុកមេសាង ខេត្តព្រៃវែង។
៦ ឈ្មោះ រឹត នរា ភេទប្រុស ឣាយុ ២០ ឆ្នាំជាតិខ្មែរ មុខរបរកម្មករយាមម៉ូតូ រស់នៅភូមិពង្រ ឃុំក្រញូងស្រុកកំចាយមា ខេត្តព្រៃវែង ។
សូមបញ្ជាក់ថា ៖ កាលពីថ្ងៃទី ០៤.ខែវិច្ឆិកា ឆ្នាំ.២០១៨ វេលាម៉ោង ២០.និង១០ នាទីយប់នៅចំណុចភូមិសំដី ឃុំធ្លក ស្រុកស្វាយជ្រំមានករណីលួចមានស្ថានទម្ងន់ទោសមួយកើតឡើង បង្កដោយជនសង្ស័យមានគ្នា០៣ នាក់មិនស្គាល់អត្តសញ្ញាណជិះម៉ូតូ ០១ គ្រឿង មិនស្គាល់ម៉ាកប្រដាប់ដោយដាវនិងដំបងឆក់ បានធ្វើសកម្មភាពស្ទាក់ប្លន់យកម៉ូតូ០១ គ្រឿងម៉ាកហុងដាសេ១២៥ស៊េរី២០១៥ពណ៍ខ្មៅពាក់ផ្លាកលេខស្វាយរៀង ១G ០៣០៨ លេខម៉ាសីុននិងលេខតួ ៩២១១៤៩១ ពីជនរងគ្រោះឈ្មោះប៉ុល ណារិន ភេទប្រុសអាយុ៣៧ឆ្នាំ មានទីលំនៅភូមិធំឃុំធ្លក ស្រុក ស្វាយជ្រំ ខណៈពេលដែលឈ្មោះប៉ុល ណារិន ជិះម៉ូតូដឹកប្រពន្ធត្រឡប់ពីឃុំស្វាយចេកស្រុករំដួលមកផ្ទះវិញ ។
ប្រភពដដែលបានឱ្យដឹងទៀតថា ៖ នៅពេលប្លន់នោះក្រុមចោរបានធ្វើសកម្មភាពកាប់ទៅលើឈ្មោះប៉ុល ណារិន បណ្តាលឲ្យរបួសដៃខាងឆ្វេងនិងប្រើដំបងឆក់ទៅលើឈ្មោះកែវ យ៉ុម ជាប្រពន្ធបណ្តាលឲ្យរងរបួសដៃខាងឆ្វេងដែរ ។ បន្ទាប់ពីធ្វើសកម្មភាពរួចក្រុមចោរជិះម៉ូតូឡើងផ្លូវលេខ១០បត់ទៅជើង ។ ក្រោយពេលកើតហេតុសមត្ថកិច្ច ជំនាញខេត្តស្វាយរៀង និងស្រុកស្វាយជ្រំ បានចុះដល់កន្លែងកើតហេតុដើម្បីធ្វើការស្រាវជ្រាវ ។ រហូតដល់ព្រឹកថ្ងៃទី ០៨ ខែ វិច្ឆិកា ឆ្នាំ ២០១៨ បន្ទាប់ពីសមត្ថកិច្ចយើងបានធ្វើការស្រាវជ្រាវតាមបច្ចេកទេសជំនាញក៏កំណត់បានមុខសញ្ញាសង្ស័យនៅមូលដ្ឋានឃុំច្រេស ស្រុកមេសាង ខេត្តព្រៃវែង ហើយសមត្ថកិច្ចយើងក៏បានសហការជាមួយសមត្ថកិច្ចស្រុកមេសាង និងប៉ុស្តិ៌រដ្ឋបាលច្រេស បានធ្វើការហ៊ុំព័ទ្ធផ្ទះរបស់ឈ្មោះ ឃឿន ដារ៉ា នៅភូមិឣណ្តូងតាស្រែន ឃំុច្រេស ស្រុកមេសាង និងបានឃាត់ខ្លួនជនសង្ស័យចំនួន ០៦ នាក់ ។
វត្ថុតាងចាប់យកបានរួមមាន ម៉ូតូ ០៤ គ្រឿង ក្នុងនោះពាក់ពន្ធនិងករណីប្លន់នេះមួយគ្រឿង គឺស្លាកលេខ ស្វាយរៀង ១G ០៣០៨ និងដាវសាំមូរ៉ៃ ០២ ដើម ។
នៅចំពោះមុខសមត្ថកិច្ច ជនសង្ស័យបានសារភាពថា ពិតជាបានរួមគ្នាធ្វើសកម្មភាពប្លន់យកម៉ូតូ កាលពីថ្ងៃទី ០៤ ខែ វិច្ឆិកា ឆ្នាំ ២០១៨ នៅខេត្តស្វាយរៀងប្រាកដមែន ៕ ដោយ ៖ វ៉ៃគោ