ក្នុងកំឡុងពេលនៃកិច្ចប្រជុំរដ្ឋមន្ត្រីដឹកជញ្ជូនអាស៊ាន លើកទី២៤ និងកិច្ចប្រជុំជាមួយដៃគូសន្ទនាពាក់ព័ន្ធ នាថ្ងៃទី៩ ខែវិច្ឆិកា ឆ្នាំ២០១៨ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានទទួលជួបពិភាក្សាការងារជាមួយលោក Hideaki Iwasaki នាយកតំណាងធនាគារអភិវឌ្ឍន៍អាស៊ីប្រចាំប្រទេសថៃ និងជាសហប្រធានកិច្ចប្រជុំគណៈកម្មាធិការរួម នៃកិច្ចព្រមព្រៀង ដឹកជញ្ជូនឆ្លងកាត់ព្រំដែន នៃមហាអនុតំបន់មេគង្គ និងកិច្ចប្រជុំគណៈកម្មាធិការរួមសម្របសម្រួលការដឹកជញ្ជូនថ្នាក់ជាតិ។
កិច្ចពិភាក្សាផ្តោតសំខាន់លើការរៀបចំ កិច្ចប្រជុំគណៈកម្មាធិការរួមនៃកិច្ចព្រមព្រៀងដឹកជញ្ជូនឆ្លងកាត់ព្រំដែន នៃមហាអនុតំបន់មេគង្គ និងកិច្ចប្រជុំគណៈកម្មាធិការរួមសម្របសម្រួលការដឹកជញ្ជូនថ្នាក់ជាតិ ព្រមទាំងបញ្ហាផ្សេងៗទៀត ស្ថិតក្រោមកិច្ចព្រមព្រៀងដឹកជញ្ជូនឆ្លងកាត់ព្រំដែន នៃមហាអនុតំបន់មេគង្គ។
យោងតាមលំដាប់អក្សរឡាតាំង កម្ពុជា គឺជាប្រធានកិច្ចប្រជុំគណៈកម្មាធិការរួមនៃកិច្ចព្រម ព្រៀងដឹកជញ្ជូនឆ្លងកាត់ព្រំដែន នៃមហាអនុតំបន់មេគង្គ និងកិច្ចប្រជុំគណៈកម្មាធិការរួមសម្របសម្រួលការដឹកជញ្ជូនថ្នាក់ជាតិ នៅក្នុងឆ្នាំ២០១៨-២០១៩។
លោកទេសរដ្ឋមន្ត្រីបានសម្តែងនូវការថ្លែងអំណរគុណ ចំពោះធនាគារអភិវឌ្ឍន៍អាស៊ី ដែលបានជួយកម្ពុជា ក្នុងការរៀបចំកិច្ចប្រជុំខាងលើ។ លោកទេសរដ្ឋមន្ត្រីក៏បាន គូសបញ្ជាក់អំពីកំណែទម្រង់សំខាន់ៗ ដែលបានបញ្ចប់ និងកំពុងអនុវត្ត នៅក្រសួងសាធារណការ និងដឹកជញ្ជូន ព្រមទាំងផែនការអភិវឌ្ឍន៍ហេដ្ឋារចនាសម្ព័ន្ធនៅកម្ពុជា។
លោក Hideaki Iwasaki បានបង្ហាញទំនុកចិត្តខ្ពស់ថា ក្រោមការរៀបចំ និងដឹកនាំកិច្ចប្រជុំរបស់កម្ពុជា ជាពិសេស ក្រោមការដឹកនាំរបស់ លោក ស៊ុន ចាន់ថុល ទេសរដ្ឋមន្ត្រីរដ្ឋមន្ត្រីក្រសួងសាធារណការ និងដឹកជញ្ជូន ការអនុវត្ត “ការប្រមូលផលដំបូង នៃកិច្ចព្រមព្រៀងសម្របសម្រួលការដឹកជញ្ជូនឆ្លងកាត់ព្រំដែន នៃមហាអនុតំបន់មេគង្គ” នឹងប្រព្រឹត្តទៅដោយរលូន។
តាមការស្នើសុំពីធនាគារអភិវឌ្ឍន៍អាស៊ី កម្ពុជានឹងទទួលធ្វើជាម្ចាស់ផ្ទះរៀបចំកិច្ចប្រជុំគណៈកម្មាធិការរួម នៃកិច្ចព្រមព្រៀងដឹកជញ្ជូនឆ្លងកាត់ព្រំដែន នៃមហាអនុតំបន់មេគង្គ និងកិច្ចប្រជុំគណៈកម្មាធិការរួម សម្របសម្រួលការដឹកជញ្ជូនថ្នាក់ជាតិ ក្នុងសប្តាហ៍ចុងក្រោយនៃខែមករា ឆ្នាំ២០១៩ ដោយគ្រោងនឹងពិភាក្សាលើចំណុចសំខាន់ៗ ដូចខាងក្រោម៖ ការបង្កើនតម្រាយផ្លូវ និងច្រកព្រំដែន ដែលមានចែងក្នុងពិធីសាទី១ ការអង្កេត វាយតម្លៃ ការអនុវត្ត “ការប្រមូលផលដំបូង នៃកិច្ចព្រមព្រៀងសម្របសម្រួល ការដឹកជញ្ជូនឆ្លងកាត់ព្រំដែន នៃមហាអនុតំបន់មេគង្គ” ការពន្យារពេល អនុស្សរណៈនៃការអនុវត្ត “ការប្រមូលផលដំបូង នៃកិច្ចព្រមព្រៀង” ក្រោយខែឧសភា ឆ្នាំ២០១៩ ការជួយពង្រឹងសមត្ថភាពប្រតិបត្តិករផ្តល់សេវាដឹកជញ្ជូន និងភស្តុភារកម្ម ការធ្វើបច្ចុប្បន្នភាព “កិច្ចព្រមព្រៀងសម្របសម្រួលការដឹកជញ្ជូនឆ្លងកាត់ព្រំដែន នៃមហាអនុតំបន់មេគង្គ ២.០”។
នៅរសៀលថ្ងៃទី៩ ខែវិច្ឆិកា ឆ្នាំ២០១៨ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញចូលរួមពិធីចុះហត្ថលេខា និងបិទកិច្ចប្រជុំរដ្ឋមន្ត្រីដឹកជញ្ជូនអាស៊ានលើកទី២៤ និងកិច្ចប្រជុំដៃគូពាក់ព័ន្ធ នៅទីក្រុងបាងកក ប្រទេសថៃ។ ពិធីខាងលើត្រូវបានប្រារព្វធ្វើឡើងក្រោមអធិបតីភាព ឯកឧត្តម Arkhom Termpittayapaisith រដ្ឋមន្ត្រីដឹកជញ្ជូនថៃ និងចូលរួមដោយរដ្ឋមន្ត្រីដឹកជញ្ជូនអាស៊ាន និងដៃគូសន្ទនា។
រដ្ឋមន្ត្រី និងឧត្តមមន្ត្រីពាក់ព័ន្ធ បានចុះហត្ថលេខាលើឯកសារចំនួន២ រួមមាន៖
១. ពិធីសារទី៤ ស្តីពីសិទ្ធិហោះហើរកូធ័រមីណល (Co-Terminal Rights) ដែលស្ថិតនៅក្រោមកិច្ចព្រមព្រៀងពហុភាគីអាស៊ាន នៃសេវាកម្មដឹកជញ្ជូន អ្នកដំណើរតាមផ្លូវអាកាសដោយសេរីពេញលេញ រវាងអាកាសយានដ្ឋាន នៅក្នុងដែនដីនៃប្រទេសសមាជិកអាស៊ាន។
២. អនុស្សរណៈនៃការយោគយល់រវាងរដ្ឋាភិបាល នៃរដ្ឋជាសមាជិកសមាគម ប្រជាជាតិអាស៊ីអាគ្នេយ៍ ហៅកាត់ថាអាស៊ាន (ASEAN) ស្តីពីការកែលម្អ បទដ្ឋានសុវត្ថិភាព និងអធិការកិច្ចនាវាមិនមែនអនុសញ្ញា ដែលស្ថិតក្នុងរដ្ឋជាសមាជិកអាស៊ាន៕ ដោយ ៖ បញ្ញាស័ក្តិ
