ស្ត្រីជនជាតិប៉េរូម្នាក់ឈ្មោះ Berliz បានអះអាងថា តុក្កតារបស់នាងត្រូវខ្មោចចូល និងបានវាយប្រហារលើមិត្តប្រុសរបស់នាង ព្រមទាំងបង្ខំមិត្តប្រុសនាងឲ្យចាកចេញពីនាងទៀតផង។
នាង Berliz ដែលមកពីតំបន់ Callao ក្នុងប្រទេសប៉េរូ បាននិយាយថា តុក្កតានោះមានឈ្មោះថា Deisy ហើយវាក៏បានកាប់មុខរបស់នាងផងដែរ។
នាងបន្តថា តុក្កតានោះអាចដើរបានដោយខ្លួនឯង និងអាចធ្វើរឿងផ្សេងៗទៀតផង ដែលមើលទៅហាក់ដូចជាកំពុងមានមនុស្សដើរនៅក្នុងផ្ទះអញ្ជឹងដែរ។
នាងបញ្ជាក់ប្រាប់ព័ត៌មានក្នុងស្រុកដូច្នេះថា តុក្កតានោះជាអំណោយដែលម្តាយនាងឲ្យក្នុងថ្ងៃបុណ្យណូអែល ប៉ុន្តែពេលនោះវាបានជ្រុះបាត់សក់ ហើយនៅថ្ងៃបន្ទាប់នាងបានយកថង់គ្របក្បាលវា។
នាងនិយាយទៀតថា នាងបានដាក់វាបែរមុខទៅជញ្ជាំង ប៉ុន្តែនៅពេលនាងក្រោកពីគេង នាងបានឃើញតុក្កតានោះបែរក្បាលមក និងសំលឹងមើលនាងវិញ។
នាងបានរៀបរាប់ថា មានរឿងចម្លែកៗផ្សេងកើតឡើងទៀត ដោយនៅថ្ងៃមួយ នៅពេលដាច់ភ្លើងអគ្គិសនី នាងបានយំ ហើយនាងក៏បានឃើញស្រមោលនៅជុំវិញខ្លួននាង។
“នៅពេលនោះ ខ្ញុំមានអាយុ ១៨ឆ្នាំ ហើយប៉ាបានអោបខ្ញុំ ហើយនៅពេលភ្លើងអគ្គិសនីភ្លឺវិញ មុខរបស់ខ្ញុំមានស្នាមកាត់ជាច្រើន”។
នាងក៏បានបញ្ជាក់ពីមូលហេតុដែលមិត្តប្រុសនាងបានចាកចេញពីនាងផងដែរថា គឺដោយសារតែតុក្កតាខ្មោចចូលនោះ បានបង្ខំគាត់ឲ្យចាកចេញ ពីព្រោះវាបានចាប់ និងវាយមិត្តប្រុសនាង នៅពេលគាត់កំពុងដេក៕
សុភ័ក្ត្រ
ប្រភព៖ Mirror