ខេត្តព្រះសីហនុ ៖ អភិបាលនៃគណៈអភិបាលខេត្តព្រះសីហនុ ឯកឧត្តម យន្ត មីន កាលពីព្រឹកថ្ងៃសៅរ៍ទី១០ ខែវិច្ឆិកា ឆ្នាំ២០១៨ បានដឹកនាំមន្ត្រីជំនាញពាក់ព័ន្ធ ចុះពិនិត្យស្ថានភាពទូទៅ នៃសកម្មភាពអភិវឌ្ឍមូលដ្ឋាន ជាពិសេសបានជំរុញឱ្យដំណើរការជួសជុលផ្លូវ ក្នុងក្រុងព្រះសីហនុ ដូចជា៖ ផ្លូវសេតេ និងផ្លូវអូរ១ជាដើមដែលផ្លូវខ្លះ ត្រូវស្ថាបនាជាកៅស៊ូ និងផ្លូវខ្លះកំពុងស្ថាបនាជាបេតុង។
ឯកឧត្តមបន្តថា នៅមុនដំណាច់ខែវិច្ឆិកា ឆ្នាំ២០១៨នេះ រដ្ឋបាលខេត្តមានគម្រោងសំអាតបរិស្ថានតាមដងផ្លូវ និងតាមសង្កាត់នានា ក្នុងក្រុងព្រះសីហនុ ដើម្បីត្រៀមស្វាគមន៍ពិធីបុណ្យឆ្លងឆ្នាំសកល២០១៨ – ២០១៩ និងចូលរួមចលនាប្រឡងប្រណាំង ទីក្រុងស្អាតថ្នាក់ជាតិ។
ព្រមជាមួយគ្នានេះ ឯកឧត្តម ឧត្តម យន្ត មីន ក៏បានក្រើនរំលឹក ទៅដល់មន្ត្រីក្រុមប្រឹក្សាគ្រប់សង្កាត់ទាំងអស់ ត្រូវអនុវត្តន៍ឱ្យបាននូវវិធានការសំអាតអនាមយ័បរិស្ថាន តាមរយៈការអប់រំពលរដ្ឋឱ្យចូលរួមទាំងការវេចខ្ចប់ទុកដាក់សំរាម ការពាររថយន្តដឹកដីកុំឱ្យធ្លាក់ប្រឡាក់ផ្លូវ។ ហើយថា ក្នុងករណីចាំបាច់ និងឱ្យមានស្ថានភាពបំពានធ្ងន់ធ្ងរ អាជ្ញាធរសង្កាត់ត្រូវចាត់វិធានការដាក់ពិន័យតាមផ្លូវច្បាប់ឱ្យបានធ្ងន់ធ្ងរ។
ទាក់ទងបញ្ហាជួសជុលផ្លូវនេះដែរ ឯកឧត្តមអភិបាលខេត្ត ដ៏បានស្នើឱ្យម្ចាស់ក្រុមហ៊ុនម៉ៅការ និងស្ថាប័នរដ្ឋដែលកំពុងជួសជុល ត្រូវពន្លឿន ឬបន្ថែមពេលវេលាសភាពជាក់ស្តែង។
ឯកឧត្តម យន្ត មីន បញ្ជាក់ថា ការជម្រុញដល់សកម្មភាពជួសជុលផ្លូវក្នុងក្រុងព្រអសីហនុខាងលើនេះ ប្រយោជន៍ឱ្យឆាប់រួចរាល់ ដើម្បីជួយកាត់បន្ថយការលំបាកធ្វើដំណើរ របស់ពលរដ្ឋ ជាពិសេសការកកស្ទះចរាចរណ៍នៅចំណុចផ្លូវកំពុងជួសជុល៕ ដោយ ៖ ដែន សីមា