ការដាក់ទណ្ឌកម្មទៅលើក្មេង នៅពេលដែលពួកគេបានធ្វើខុស អាចជាការប្រដែប្រដៅ ឲ្យពួកគេកែរកផ្លូវត្រូវនៅថ្ងៃក្រោយ ប៉ុន្តែ សូមធ្វើឲ្យប្រាកដថា វាជាការដាក់ទណ្ឌកម្មមួយដ៏សមរម្យ ។
ថ្មីៗនេះ គេហទំព័រ Stomp បានចុះផ្សាយឲ្យដឹងថា បុរសម្នាក់ត្រូវបានប្រទះឃើញទះកំផ្លៀង និងបង្ខំក្មេងស្រីតូចម្នាក់ លុតជង្គង់នៅទីកន្លែងសាធារណៈ ខណៈស្ត្រីម្នាក់ដែលស្ថិតនៅជាមួយគ្នានោះ បានត្រឹមឈរមើលពុំអាចជួយបាន ។ ហេតុការណ៍នេះបានកើតឡើងនៅកន្លែងចតរថយន្តមួយកន្លែង នៅក្នុង IKEA Tampines ប្រទេសសិង្ហបុរី កាលយប់ពីថ្ងៃទី៥ ខែវិច្ឆិកា ឆ្នាំ២០១៨ ។
អ្នកដែលបានឃើញ និងថតវីដេអូពីហេតុការណ៍ដ៏រន្ធត់នេះ បានប្រាប់ Stomp ថា ហេតុការណ៍ទាំងស្រុងនោះបានកើតឡើងនៅវេលាម៉ោង ៩ យប់ ។ អ្នកថតនោះបានប្រាប់ឲ្យដឹងថា៖ «បុរសនោះត្រូវបានឃើញស្រែកខ្លាំងៗ និងទះកំផ្លៀងក្មេងស្រីនោះ ដែលត្រូវបានជឿថាជាកូនស្រីរបស់គាត់ និងបញ្ជាឲ្យនាងលុតជង្គង់នៅលើដី» ។
ប្រភពដែលសុំមិនបញ្ចេញឈ្មោះ បាននិយាយថា គាត់ពុំដឹងច្បាស់ពីមូលហេតុដែលនាំឲ្យបុរសជាឪពុករូបនោះ ផ្ទុះកំហឹងយ៉ាងខ្លាំងដាក់កូនស្រីរបស់ខ្លួនបែបនេះទេ ។ នាងតូចនោះមើលទៅមានអាយុប្រហែល ៥ ទៅ ៦ ឆ្នាំ ។
គាត់បន្តថា៖ «ខ្ញុំពុំដឹងថា បុរសជាឪពុកនោះផ្ទុះកំហឹងដាក់កូនស្រីរឿងអ្វីទេ ប៉ុន្តែ គ្រាន់តែលឺគាត់និយាយថា៖ ‘ប៉ាស្រលាញ់កូន ប៉ុន្តែ កូនស្រីមិនអាចនិយាយរឿងបែបអស់ទាំងនេះដល់ប៉ាឡើយ ហើយវាលែងជាតួនាទីរបស់ម្តាយឯងទៀតហើយ គឺវាជាតួនាទីរបស់ប៉ា…!!’» ៕ ដោយ៖ ចន្ទី (ប្រភព៖ worldofbuzz)