កុមារប្រុសស្រីកម្ពុជា២រូបដែលលក់វត្ថុអនុស្សាវរីយ៍ នៅតាមប្រាង្គប្រាសាទលើទឹកដីអង្គរ បានកំពុងល្បីយ៉ាងខ្លាំងនៅលើបណ្តាញសង្គម បន្ទាប់ពីស្ត្រីទេសចរជនជាតិម៉ាឡេស៊ីមានរូបឆោមដ៏ស្រស់ស្អាតម្នាក់ ឈ្មោះថា Venus GWC បានចែករំលែកការវីដេអូនៃសកម្មភាពប្រាស័យទាក់ទងជាមួយពួកគេ បានរីករាលដាលខ្លាំងនៅលើ Facebook ។ ហើយខាងក្រោមនេះ ជាអ្វីដែលនាងបានសរសេររៀបរាប់និយាយអំពីពួកគេ បន្ទាប់ពីនាងបានទៅទស្សនានៅលើទឹកដីអង្គរខេត្តសៀមរាប កាលពីសប្តាហ៍មុន ។
«ខ្ញុំបានជួបក្មេងប្រុសស្រី២នាក់ នៅឯប្រាសាទតាព្រហ្ម នៅក្នុងអង្គរវត្ត ។ ក្មេងស្រីទី១មានឈ្មោះ លីសា នាងមានអាយុ ៧ ឆ្នាំ ជាអ្នកលក់វត្ថុអនុស្សាវរីយ៍ដោយខ្លួនឯង ។ ខ្ញុំបានទៅជិតនាង ហើយនាងបានប្រាប់ខ្ញុំថា នាងអាចច្រៀងចម្រៀងឆ្មាដ៏ល្បីនៅលើ Tik Tok ។ ពួកយើងបាននិយាយលេងសើចជាមួយនាង និងថតវីដេអូជាច្រើន» ។
Venus បានសរសេរបន្តក្នុងផុសថា៖ «ប៉ុន្តែ អ្វីដែលធ្វើឲ្យស្ទើរពុំគួរឲ្យជឿនោះ គឺក្មេងប្រុសម្នាក់ទៀត ពិតជាមានទេពកោសល្យយ៉ាងខ្លាំង ដោយគាត់អាចនិយាយបានជាង ១០ ភាសាបរទេស ។ គាត់បាននិយាយមកកាន់ខ្ញុំលើកដំបូងជាភាសា Cantonese ហើយបានចែករំលែកជាមួយខ្ញុំ នូវភាសាបរទេសជាច្រើនទៀតដែលគាត់អាចនិយាយ ។ គាត់ពិតជាធ្វើឲ្យខ្ញុំស្ងើចសរសើរយ៉ាងខ្លាំង» ។
នៅក្នុងវីដេអូបង្ហោះនៅលើ Facebook ដ៏ល្បីល្បាញនេះ ក្មេងប្រុសដើរលក់វត្ថុអនុស្សាវរីយ៍ដោយជើងទទេនេះ បានប្រាប់នាងថា រូបគេអាចនិយាយបានជាង ១០ ភាសា ក្នុងនោះរួមមាន៖ Cantonese, Mandarin, Thai, Japanese, Korean, French, Spanish, German, Tagalog, Malay ។
Venus និយាយថា នាងបានសន្ទនាជាមួយប្អូនប្រុស សាលិ ជាភាសាបារាំង, ជប៉ុន, Cantonese, Manarin និងថៃ មុនពេលនាងទិញវត្ថុអនុស្សាវរីយ៍មួយចំនួនពីគាត់ ។ នាងក៏បានឲ្យដឹងទៀតថា ប្អូនប្រុសម្នាក់នេះ (ធុច សាលិ) បានរៀនចេះនិយាយភាសាអស់ទាំងនេះពីភ្ញៀវបរទេស ក្នុងអំឡុងពេលដើរលក់វត្ថុអនុស្សាវរីយ៍ ៕ ដោយ៖ ឧត្តម (ប្រភព៖ worldofbuzz)