ភ្នំពេញ ៖ ការប្រកួតកីឡាតេក្វាន់ដូជ្រើសរើសជើងឯកជាតិឆ្នាំ២០១៨ ប្រព្រឹត្តទៅរយៈពេល៤ថ្ងៃ ចាប់ពីថ្ងៃទី៩ ដល់ថ្ងៃទី១២ ខែវិច្ឆិកា ឆ្នាំ២០១៨ នៅសាលប៊ូយ៉ុង-ខ្មែរ ក្នុងពហុកីឡដ្ឋានជាតិ លើ២២វិញ្ញាសា ក្នុងនោះមេគុន ៥វិញ្ញាសា និងប្រកួត១៧វិញ្ញាសា ដោយមានការចូលរួមប្រកួត ២៨ក្លឹប។
ការប្រកួតនេះ ត្រូវបានប្រកាសបើកជាផ្លូវការក្រោមអធិបតីភាព លោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងជាប្រធានសហព័ន្ធតេក្វាន់ដូជាតិ រួមជាមួយ Dr.CHUNGWON CHOUE ប្រធានសហព័ន្ធតេក្វាន់ដូពិភពលោក នារសៀលថ្ងៃសៅរ៍ ទី១០ ខែវិច្ឆិកា ឆ្នាំ២០១៨។
ការប្រកួតដែលធ្វើនៅអគារតេក្វាន់ដូប៊ូយ៉ុងនោះ មានក្លិបចូលរួមមានក្លិបចំនួន២៨ចូលរួម ដែលក្នុងនោះ២៣ក្លិបនៅភ្នំពេញ និងក្លិប៥ មកពីបណ្តាលខេត្ត ដែលមានកីឡាករ-កីឡាការិនី២២៦នាក់ កើនជាងឆ្នាំ២០១៧ ចំនួន៣៨នាក់ នៅលើវិញ្ញាសាចំនួន២២វិញ្ញាសា រួមមាន មេគុន ៥វិញ្ញាសា និងប្រយុទ្ធ១៧វិញ្ញាសា។
លោកChung Won Choueបានកោតសរសើរ លោកហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងជាប្រធានខេមរសហព័ន្ធតេក្វាន់ដូ ក្រោមការដឹកនាំរបស់លោក ធ្វើឲ្យកម្ពុជា ទទួលបានមេដាយមាសដំបូង កម្រិតអាស៊ីកាលឆ្នាំ២០១៤ លើប្រភេទកីឡាតេក្វាន់ដូ គឺកីឡាការិនីស៊ន សៀវម៉ីដែលកូនខ្មែរពិតៗ៕ ដោយ ៖ កូឡាប
