ភ្នំពេញ ៖ កម្លាំងនគរបាលនៃអធិការដ្ឋាននគរបាល ខណ្ឌសែនសុខបានបញ្ជូនខ្លួនជនសង្ស័យចំនួន១១នាក់ទៅកាន់តុលាការពាក់ព័ន្ធនៅក្នុងសំណុំរឿង០៣ករណីផ្សេងគ្នា ដូចជា លួច ប្រើប្រាស់សារធាតុញៀន និងកាន់កាប់អាវុធដោយខុសច្បាប់ កាលពីថ្ងៃចន្ទ ទី១២ ខែវិច្ឆិកា ឆ្នាំ២០១៨នេះ។
សមត្ថកិច្ចបានឲ្យដឹងថា ករណីទី១-អំពើលួចមានចំនួន២នាក់ ករណីទី២-ពាក់ព័ន្ធនឹងការប្រើប្រាស់ដោយខុសច្បាប់នូវសារធាតុញៀនមានចំនួន៨នាក់ និងករណីទី៣-ពាក់ព័ន្ធនឹងការកាន់កាប់អាវុធដោយខុសច្បាប់មានម្នាក់ផងដែរ។
បើតាមនគរបាលជំនាញផ្នែកព្រហ្មទណ្ឌខណ្ឌបានឲ្យដឹងថា ទាំង៣ករណីខាងលើនេះ សមត្ថកិច្ចនគរបាលខណ្ឌសែនសុខ បង្ក្រាបបានកន្លងមកក្នុងមូលដ្ឋានខណ្ឌសែនសុខ ហើយបានបញ្ចាប់នីតិវិធី សាកសួរ និងកសាងសំណុំរឿង បញ្ជូននសង្ស័យទាំង១១នាក់ខាងនេះរួមនិងវត្ថុតាងមួយចំនួនទៀតទៅតុលានៅថ្ងៃនេះតែម្តង។
លោកវរសេនីយ៍ឯក ហួរ ម៉េងវ៉ាង អធិការនគបាលខណ្ឌសែនសុខ ក៏បានសំណូមពរដល់បងប្អូនប្រជាពលរដ្ឋ ក្នុងមូលដ្ឋានខណ្ឌសែនសុខទាំងអស់ សូមជួយសហការណ៍ និងផ្តល់ព័ត៌មានមកកម្លាំងសមត្ថកិច្ចផង ប្រសិនបើបងប្អូនដឹងថាមានក្មេងទំនើង ប្រមូលផ្តុំគ្នាប្រើប្រាស់ ឬចែកចាយនូវសាធាតុញៀន និងបទល្មើសផ្សេងៗ ដើម្បីឲ្យកម្លាំងរបស់លោក ចុះទៅបង្ក្រាបឲ្យបានទាន់ពេលវេលា៕ ដោយ ៖ បញ្ញាស័ក្តិ
