ភ្នំពេញ ៖ រដ្ឋបាលរាជធានីភ្នំពេញ នៅព្រឹកថ្ងៃទី១៣ ខែវិច្ឆិកា ឆ្នាំ២០១៨នេះ បានរៀបចំ បើកឱកាស ដល់ប្រជាពលរដ្ឋបានលើកឡើង នូវកង្វល់ ក៏ដូចជាសំណូមពរ របស់ខ្លួន ក្នុងវេទិកា សាធារណៈ នៅខណ្ឌ សែនសុខ ដើម្បីឲ្យអាជ្ញាធរក្នុងមូលដ្ឋាន បានដោះស្រាយ និងពិភាក្សា ស្វែងរកដំណោះស្រាយ ជូនប្រជាពលរដ្ឋ ។
នៅក្នុងវេទិកានេះ ត្រូវបានរៀបចំដោយ រដ្ឋបាលរាជធានីភ្នំពេញ ក្រោមការដឹកនាំ ដោយ លោក ម៉ប់ សារិន ប្រធានក្រុមប្រឹក្សា រាជធានីភ្នំពេញ និងលោកស្រីកែវ សុខពិសី អភិបាលរង រាជធានីភ្នំពេញ ព្រមជាមួយ ប្រជាពលរដ្ឋ ក្នុងមូលដ្ឋានមួយចំនួន ដោយក្នុងនោះ ប្រជាពលរដ្ឋ បានបង្ហាញ នូវក្តីកង្វល់ ប្រឈម ទៅលើបញ្ញាអសន្តិសុខ ដែលនៅតែកើតមានឡើង ទោះបីជាអាជ្ញាធរ បានដោះស្រាយជូន ជាបន្តបន្ទាប់ហើយក្តីនោះ ។ បញ្ហាប្រឈម ដែលនៅសេសសល់ ដូចជាបញ្ហាគ្រឿងញៀន បញ្ហាចោរលួច ចោរឆក់ ចោរប្លន់ បញ្ហាល្បែងស៊ីសង កត់កន្ទុយលេខ នៅតែជាការព្រួយបារម្ភ សម្រាប់ប្រជាពលរដ្ឋ ។
ដោយឡែក បញ្ហាគ្រោះថ្នាក់ចរាចរណ៍ មកពីខ្វះការប្រុងប្រយ័ត្ន មិនគោរពច្បាប់ចរារណ៍ បើកបរគ្មានពាក់មួកសុវត្ដិភាព នាំឲ្យមានការបាត់បង់អាយុជីវិត និងខូតខាតទ្រព្យសម្បត្តិ នៅមានកំរឹតខ្ពស់នៅឡើយ ។ ចំណែកការអភិវឌ្ឍន៍ ហេដ្ឋារចនាសម្ព័ន្ធ ផ្លូវ លូ ស្ពាន ស្ពានអាកាស មណ្ឌលសុខភាពសាធារណៈ ការប្រើសេវាសាធារណៈជូនប្រជាពលរដ្ឋ នៅតែជាបញ្ហា ដែលត្រូវយកចិត្តតុកដាក់ និងបន្តធ្វើព្រមទាំងសេវា ប្រមូលសំរាម កំពុងត្រូវបានពង្រឹង ក្នុងការអនុវត្ត ជាបន្តបន្ទាប់ក៏ដោយ ក៏បញ្ហាប្រឈមទាំងនេះ ទាមទារអោយមានការចូលរួម យ៉ាងសកម្ម ពីប្រជាពលរដ្ឋ សង្គមស៊ីវិល និងវិស័យឯកជន អោយបានច្រើនជាងនេះ ។
ពាក់ព័ន្ធនឹងហេដ្ឋារចនាសម្ព័ន្ធ ប្រជាពលរដ្ឋ ដែលនៅក្នុងវេទិកាសាធារណៈ មួយចំនួនធំ បន្តស្មើសុំ នូវការកសាងផ្លូវ ប្រព័ន្ធលូ ជូនដល់ពួកគាត់ ដែល់កន្លងមក លោកអភិបាលរាជធានី ក៏ដូចជាអភិបាលខណ្ឌ បានកសាងជូនពួកគាត់ខ្លះៗមកហើយ នៅឡើយកន្លែងមួយចំនួន ក្នុងមូលដ្ឋានខណ្ឌសែនសុខ ដែលនៅខ្វះប្រពន្ធលូ និងផ្លូវ ដោយឲ្យតែមានភ្លៀងធ្លាក់ម្តងៗ តែងតែនៅសល់ទឹកដក ពិបាកក្នុងការធ្វើដំណើរ ។ ក្នុងនោះ នៅមានសហគមន៍មួយចំនួន សំណូមពរ អោយអភិបាលរាជធានី ពិនិត្យទៅលើលទ្ធភាព ដើម្បីផ្តល់ប័ណ្ណកម្មសិទ្ធិពេញលេញ ជូនពួកគាត់ ។
ឆ្លើយតបនឹងសំណូមពរទាំងឡាយ លោក ម៉ូវ ម៉ានិត អភិបាលខណ្ឌសែនសុខ បានទទួលយក នូវសំណូមពរ និងការស្នើសុំទាំងអស់ ដោយមានសំណូមពរខ្លះ អាចដោះស្រាយបាន ត្រូវបានដោះស្រាយភ្លាមៗផងដែរ និងសំណូមពរមួយចំនួន ត្រូវការការពិភាក្សា ក៏ដូចជាសិក្សាជាក់ស្តែង និងបញ្ចូនមកអភិបាល រាជធានីភ្នំពេញ ដើម្បីពិនិត្យនិងសម្រេច ថាត្រូវដោះស្រាយជូន តាមរបៀបណា និងពេលណា ជូនដល់ប្រជាពលរដ្ឋ ។ នៅក្នុងនោះដែរ បើតាមការឆ្លើយតប របស់លោកអភិបាល ខណ្ឌសែនសុខ ឃើញថា ការស្នើសុំ ពាក់ព័ន្ធ និងហេដ្ឋារចនាសម្ព័ន្ធ ភាគច្រើន ត្រូវបានលោកអភិបាលខណ្ឌ ឲ្យដឹងថាសុទ្ធតែស្ថិតក្នុង គម្រោងដែលបានអនុម័ត្ត ដោយគ្រាន់តែ ត្រូវការសិក្សារៀបចំ ចាប់ផ្តើមសាងសង ក្នុងពេលណាមួយឆាប់ៗនេះតែប៉ុណ្ណោះ៕ ដោយ ៖ កូឡាប