ស្វាយរៀង ៖ បុរសម្នាក់ ត្រូវបានគេឃើញដេកស្លាប់គ្មានពាក់អាវ មានតែខោលីអូ ក្បែរព្រែកបឹងក្វាងធ្វើឱ្យមានការភ្ញាក់ផ្អើលដល់ប្រជាពលរដ្ឋ បន្ទាប់ពីមានប្រជាពលរដ្ឋម្នាក់ បានដឹកក្របីទៅចងនៅព្រែកបឹងក្វាងហើយក៏បានស្រែកហៅបងប្អូនប្រជាពលរដ្ឋមកមើលកាលពីវេលាម៉ោង ៦និង៣០នាទីព្រឹក ថ្ងៃទី១៣ ខែវិច្ឆិកា ឆ្នាំ២០១៨ នៅចំណុះក្បៃរព្រែកបឹងក្វាង ភូមិជ្រៃធំ សង្កាត់ព្រៃអង្គុញ ក្រុងបាវិត ខេត្តស្វាយរៀង។
បើតាមសមត្ថកិច្ចនគរបាលក្រុងបាវិតបានអោយដឹងថាបុរសដែលប្រទះឃើញស្លាប់នោះមានឈ្មោះអិន សូវៀត អាយុ៣៨ឆ្នាំ រស់ភូមិជ្រៃធំ សង្កាត់ព្រៃអង្គុញ ក្រុងបាវិត ខេត្តស្វាយរៀង។
ប្រភពបានឲ្យដឹងទៀតថា បន្ទាប់ពីមានប្រជាពលរដ្ឋរាយការណ៍ថា មានមនុស្សស្លាប់នៅទីតាំងខាងលើ កម្លាំងនគរបាលប៉ុស្តិ៍រដ្ឋបាល សហការជាមួយកម្លាំងក្រុងបាវិត ព្រមទាំងគ្រូូពេទ្យជំនាញក៏បានចុះទៅដល់គោលដៅ ទីតាំងដែលជនរងគ្រោះ បានដេកស្លាប់ហើយកម្លាំងជំនាញក្រុមគ្រូពេទ្យបានពិនិត្យធ្វើកោសលវិច័យសាកសពពុំមានស្លាកស្នាម ឬដាច់រលាត់ត្រង់ចំណុចណានោះទេ សមត្ថកិច្ចក៏បានដាក់ការសង្ស័យថា ជនរងគ្រោះស្លាប់ដោយសារខ្យល់គរ ព្រោះជនរងគ្រោះចូលចិត្តពិសាស្រាជាប្រចាំ។
បន្ទាប់ពីធ្វើកោសលវិច័យរួច សមត្ថកិច្ចបានប្រគល់សាកសពទៅឲ្យក្រុមគ្រួសារយកទៅធ្វើបុណ្យតាមប្រពៃណី ៕ ដោយ ៖ វ៉ៃគោ
