ភ្នំពេញ ៖ កម្លាំងគណៈបញ្ជាការឯកភាពខណ្ឌមានជ័យ ក្រោមការបញ្ជាពីលោកពេជ្រកែវ មុន្នីអភិបាលខណ្ឌមានជ័យនៅព្រឹកថ្ងៃទី១៣ ខែវិច្ឆិកា ឆ្នាំ២០១៨នេះ បានចុះទៅឲ្យក្រុមហ៊ុននឹម ម៉េងបញ្ឈប់ចាក់ដីលុបប្រឡាយរំដោះទឹកជាបន្ទាន់ ខណៈដែលពួកគេចាក់លុបប្រឡាយបានប្រមាណជិត៥០ភាគរយហើយនោះ។
សកម្មភាពរំលាភយកទ្រព្យសម្បត្តិសាធារណៈរបស់លោកផ្កាយ៣នឹម ម៉េងនេះ ធ្វើឡើងស្របពេលដែលរដ្ឋបាលរាជធានីភ្នំពេញ បាននិងកំពុងតែស្តាប្រព័ន្ធប្រឡាយមួយចំនួននៅក្នុងក្រុងដើម្បីរំដោះទឹកភ្លៀងនារដូវវស្សា ។ប៉ុន្តែបែរជាលោកផ្កាយ៣នឹមម៉េង លួចចាក់ដីលុបប្រឡាយរំដោះទឹកនៅចំណុចភូមិដំណាក់ធំ២សង្កាត់ស្ទឹងមានជ័យ៣ខណ្ឌមានជ័យទៅវិញ ។
សកម្មភាពនេះបានធ្វើឡើងអស់រយៈពេល២ថ្ងៃមកហើយ ទើបប្រជាពលរដ្ឋមានការភិតភ័យខ្លាច លិចលង់ផ្ទះសម្បែងរបស់ពួកគាត់នៅរដូវវស្សាខាងមុខ ក៏បានរាយការណ៍ជូនលោកចៅសង្កាត់ស្ទឹងមានជ័យ៣ ហើយលោកចៅសង្កាត់ក៏បានរាយការណ៍ព័ត៌មាននេះ ជូនលោកពេជ្រកែវមុន្នីអភិបាលខណ្ឌមានជ័យ។
នៅពេលដែលលោកអភិបាលខណ្ឌមានជ័យទទួលបានព័ត៌មានថា មានការចាក់ដីលុបប្រឡាយរំដោះទឹក ហើយគណៈបញ្ជាការឯកភាពខណ្ឌមានជ័យ បានដឹកនាំកម្លាំងចុះបញ្ឈប់ និងឃាត់រថយន្តដឹកដីយីឌុបចំនួន៦គ្រឿង ទៅរក្សាទុកនៅសាលាខណ្ឌមានជ័យ ដើម្បីដោះស្រាយគ្នាតាមផ្លូវច្បាប់៕ ដោយ ៖ រចនា