ហេតុការណ៍នេះកើតឡើងនៅថ្ងៃទី ១២ ខែវិច្ឆិកា កន្លងមក ខណៈនាង Neha កំពុងបំបៅដោះកូនប្រុសនៅក្នុងផ្ទះរបស់ពួកគេនាតំបន់ជាយក្រុង Agra ប្រទេសឥណ្ឌា ស្រាប់តែស្វាមួយក្បាលបានសម្រុកចូលចាប់ទាញយកក្មេង ហើយរត់ចេញទៅ ។ លោក Yogesh ឪពុករបស់ក្មេងប្រុសរងគ្រោះនិយាយថា ៖ ទ្វាផ្ទះបើក ហើយភរិយាខ្ញុំកំពុងឲ្យកូនបៅ ស្រាប់តែស្វាមួយក្បាលបានលោតចូល រួចស្រវ៉ាឱបកក្មេងប្រុសទាញយកទៅ ។ ទម្រាំតែភរិយាខ្ញុំយល់ពីហេតុការណ៍កើតឡើងនោះ ស្វានេះបានរត់ចេញទៅក្រៅផ្ទះបាត់ទៅហើយ។
ក្មេងប្រុស Arush អាយុ ១២ថ្ងៃ នៅមុនពេលកើតហេតុ ។
ប្តីប្រពន្ធភ្លាមៗនោះបានរត់ដេញតាមស្វា ហើយចុងក្រោយស្វានេះបន្សល់ទុកទារកខាងលើនៅលើដំបូលផ្ទះរបស់អ្នកជិតខាង ។ ពេលនោះអ្វីៗបានចប់សព្វគ្រប់ហើយ ព្រោះរាងកាយក្មេងហូរឈាមច្រើន ហើយបេះដូងក៏លែងដើរ ។
តាមពលរដ្ឋនៅតំបន់នោះឲ្យដឹងថា ស្វាមួយក្បាលនេះបានវាយប្រហារក្មេងស្រីអាយុ ១៤ឆ្នាំម្នាក់ នៅមុនពេលដែលវាចូលទៅឆក់យកទារកដែលម្តាយកំពុងបំបៅដោះ៕ ចន្ទ្រា