ភ្នំពេញ ៖ អភិបាលរាជធានីភ្នំពេញលោក ឃួង ស្រេង បានអំពាវនាវដល់ម្ចាស់អាជីវករដឹកទំនិញ ដែលប្រើប្រាស់រថយន្ដធំៗ ធ្វើដំណើរចូលរាជធានីភ្នំពេញ នៅថ្ងៃដែលរៀបចំព្រះរាជពិធីបុណ្យអុំទូក អកអំបុក បណ្តែតប្រទីព និងសំពះព្រះខែ ដែលនឹងប្រព្រឺត្ដិទៅពីថ្ងៃទី២១-២៣ ខែវិច្ឆិកា ឆ្នាំ២០១៨ ខាងមុខនេះ ហើយសម្រាប់អ្នកដែលមកកម្សាន្ដ ក៏កុំជិះរថយន្ដចូលទៅបរិវេណទីតាំងប្រារព្ធពិធីផងដែរ ព្រោះចៀសវាងការកកស្ទះចរាចរណ៍។
ការអំពាវនាវរបស់លោក ឃួង ស្រេង ត្រូវបានធ្វើឡើងនៅរសៀលថ្ងៃទី១៤ ខែវិច្ឆិកា ឆ្នាំ២០១៨នេះ ក្នុងឱកាសចុះពិនិត្យការរៀបចំប្រទីប របស់សាលារាជធានីភ្នំពេញ ត្រើយខាងកើត បន្ទាប់ពីបញ្ចប់កិច្ចប្រជុំរក្សាសន្តិសុខ និងសណ្តាប់ធ្នាប់ឲ្យបានល្អប្រសើរ ក្នុងឱកាសបុណ្យអុំទូក អកអំបុក បណ្តែតប្រទីព និងសំពះព្រះខែ។
អភិបាលរាជធានីភ្នំពេញ បានថ្លែងយ៉ាងដូច្នេះថា ខ្ញុំសូមជម្រាប និងជូនដំណឹងដល់ប្រជាពលរដ្ឋទាំងអស់ ដែលមានបំណងចង់ចូលរួមសប្បាយភាព ក្នុងព្រះរាជពិធីបុណ្យអុំទូក មេត្ដាស្ដាប់តាមការណែនាំរបស់កងកម្លាំងសមត្ថកិច្ច ក៏ដូចជាអាជ្ញាធរដែនដី ដើម្បីរៀបចំទុកដាក់រថយន្ដ និងធ្វើចរាចរណ៍ ហើយយើងនឹងមានបិទតំបន់ខ្លះ ដើម្បីទុកជូនដល់សាធារណជន ធ្វើដំណើរដោយថ្មើរជើង»។
បើតាមលោក ឃួង ស្រេង នៅថ្ងៃទី១៩ ខែវិច្ឆិកា ឆ្នាំ២០១៨ខាងមុខនេះ សាលារាជធានីភ្នំពេញ នឹងបើកការប្រណាំងទូកសាកល្បង ហើយនឹងមានរៀបចំពិធីក្រុងពាលី តាមប្រពៃណីសាសនា ដើម្បីសុំសេចក្ដីជូនប្រជាពលរដ្ឋទាំងអស់ និងឈានដល់ការប្រារព្ធព្រះរាជពិធីទាំងផ្លូវការផងដែរ។
ចំណែកប្រទីបរដ្ឋបាលរាជធានីភ្នំពេញ បានត្រៀមលក្ខណៈក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកនៅថ្ងៃទី២១ដល២៣វិច្ឆិកា ខាងមុខជាមួយប្រទី១៤ទៀតនៅទន្លេមុខព្រះបរមរាជវាំង។
លោក ឃួង ស្រេង អភិបាលរាជធានីភ្នំពេញ បានដឹកនាំមន្ត្រីពាក់ព័ន្ធចុះពិនិត្យការងាររៀបចំប្រទីបរដ្ឋបាលរាជធានីភ្នំពេញ នឹងសម្រេចជាស្ថាពរនាពេលខាងមុននេះ ។ ឆ្នាំ២០១៨នេះ មានប្រទីបចំនួន១៥ដែលឆ្នាំកន្លងមកមានតែ១៣ តែឆ្នាំនេះបន្ថែមប្រទី២ទៀតមួយគ្រឿង របស់ក្រសួងវប្បធម៌និងវិចិត្រសិល្បៈ និងទី២ប្រទីបក្រុមសហភាពសហព័ន្ធយុវជនកម្ពុជា។
កន្លងមករដ្ឋបាលរាជធានីភ្នំពេញ បានតុបតែងលម្អតាមសួនច្បារនៅត្រើយខាងកើត រដ្ឋបាលរាជធានីភ្នំពេញ ក៏បានរៀបចំកន្លែងស្នាក់ជូនបងប្អូនចំណុះទូក ដោយមានតភ្ជាប់ជូននូវទឹកស្អាត ភ្លើងអគ្គិសនី បង្គន់អនាម័យ បន្ទប់ទឹក និងកន្លែងសង្គ្រោះបឋមក្នុងតំបន់នេះផងដែរ។
សូមជម្រាបថា ដើម្បីរក្សាសន្តិសុខ និងសណ្តាប់ធ្នាប់ឲ្យបានល្អប្រសើរ ក្នុងឱកាសបុណ្យអុំទូក អកអំបុក បណ្តែតប្រទីព និងសំពះព្រះខែ ដែលនឹងប្រព្រឺត្ដិទៅពីថ្ងៃទី២១-២៣ ខែវិច្ឆិកា ឆ្នាំ២០១៨ ខាងមុខនេះ កម្លាំងមានសមត្ថកិច្ចរហូតដល់ជាង១ម៉ឺននាក់ នឹងត្រូវដាក់ពង្រាយ នៅតាមតំបន់A B និងC ក្នុងនោះ កម្លាំងរបស់គណៈបញ្ជាការឯកភាពរាជធានីភ្នំពេញ មានរហូតដល់ជាង៨ពាន់នាក់៕ ដោយ ៖ កូឡាប