ភ្នំពេញ ៖ ដើម្បីរក្សាសន្តិសុខសណ្តាប់ធ្នាប់អោយបានល្អ ប្រសើរក្នុងឱកាសបុណ្យអុំ ទូក អកអំបុក បណ្តែតប្រទីព និងសំពះ ព្រះខែ ដែលនឹងប្រព្រឺត្ដិទៅពីថ្ងៃទី២១ ដល់ថ្ងៃទី២៣ ខែវិច្ឆិកា ឆ្នាំ២០១៨ ខាងមុខនេះ កម្លាំងមានសមត្ថកិច្ច នឹងដាក់ពង្រាយកម្លាំងរហូតដល់ជាង១ម៉ឺននាក់ នៅតាមតំបន់A B និងC ក្នុងនោះកម្លាំងរបស់គណៈបញ្ជាការឯកភាពរាជធានីភ្នំពេញ មានរហូតដល់ជាង៨ពាន់នាក់ ។
នេះបើយោងតាមផែនការ ការពារដែលលើក ឡើងដោយ លោក មានចាន់ យ៉ាដាអភិបាលរងរាជធានីភ្នំពេញ នៅក្នុងកិច្ចប្រជុំមួយកាលពីរសៀលថ្ងៃទី១៤ វិច្ឆិកា ២០១៨នៅសាលារាជធានីភ្នំពេញក្រោមអធិបតីភាពលោក ឃួង ស្រេង អភិបាលរាជធានីភ្នំពេញ លោក ស ថេត ស្នងការរាជធានីភ្នំពេញ អភិបាលខណ្ឌទាំង១២និងមានការចូលរួមពីមន្ត្រីពាក់ព័ន្ធគ្រប់លំដាប់ថ្នាក់មួយចំនួនទៀត ។
លោក មានចាន់ យ៉ាដាបានឲ្យដឹងថា បុណ្យអ៊ំទូកឆ្នាំនេះនិងប្រើកម្លាំងសរុបចំនួន១២៧៥៤នាក់ ដើម្បីរក្សាសន្តិសុខសណ្តាប់ធ្នាប់ជូនប្រជាពលរដ្ឋ ក្នុងនោះសម្រាប់កម្លាំងរបស់ គណៈបញ្ជាការឯកភាពរាជធានីភ្នំពេញ មានរហូតដល់៨៦២៥នាក់ ដោយឈជើង នៅតាមតំបន់សំខាន់ៗចំនួន ៣គឺ តំបន់A,B,C និងចែកជាគោលដៅតូចៗផងដែរ ។
លោកបានបញ្ជាក់ផងដែរថា ស្ថានភាពទឹកទន្លេនៅឆ្នាំនេះទាបជាងឆ្នាំទៅរហូតដល់១ម៉ែត្រ ហើយល្បឿនទឹក ក៏ហូរយឺតជាងឆ្នាំទៅផងដែរ។ ដោយឡែកសម្រាប់ទូកង ដែលត្រូវចូលរួមប្រកួតនៅឆ្នាំ២០១៨នេះ មានចំនួន២៩៨ទូក ខណៈដែលឆ្នាំ២០១៧មានទូកងត្រឹមតែ២៧០ទូក និង មានទីឡាករជិត២ម៉ឺននាក់។ សម្រាប់ប្រទីបឆ្នាំនេះមានចំនួន១៥ ។
លោក ឃួង ស្រេង ក្នុងកិច្ចប្រជុំនោះក៏បានមានប្រសាសន៍ថា បញ្ហាសន្តិសុខ សណ្តាប់ធ្នាប់ជាបញ្ហាចម្បង ដែលអាជ្ញាធររាជធានីភ្នំពេញត្រូវយកចិត្តទុកដាក់ ដូច្នេះ លោកជម្រុញអោយអភិបាលខណ្ឌដូនពេញ និងខណ្ឌចំការមនត្រូវយកចិត្តទុកដាក់អោយបានខ្ពស់ ។ លោកបន្តថា បញ្ហាសណ្តាប់ធ្នាប់នេះ បើមនុស្ស១០០នាក់ ធ្វើអោយប៉ះពាល់ផលប្រយោជន៍ មនុស្ស១លាននាក់ យើងត្រូវធ្វើដើម្បីប្រយោជន៍មនុស្ស១លាននាក់នោះហើយ។ចំណែក ការគ្រប់គ្រងអ្នកលក់ដូរ និងការបើកកន្លែងផ្ញើម៉ូតូ លោកអភិបាលរាជធានីភ្នំពេញ ក៏បានជម្រុញឲ្យមានការពិនិត្យឲ្យបានម៉ត់ចត់ផងដែរ មិនអាចឲ្យមានការដំឡើងថ្លៃស្រេចតែចិត្តនោះទេ៕ ដោយ ៖ កូឡាប