វេជ្ជបណ្ឌិតផ្នែកវះកាត់ក្នុងប្រទេសឥណ្ឌា បានសំដែងការងើយឆ្ងល់យ៉ាងខ្លាំង និងសឹងមិនជឿលើអ្វីដែលពួកគេបានឃើញ បន្ទាប់ពីរកឃើញដែកតូចៗជាច្រើននៅក្នុងពោះស្ត្រីអ្នកជំងឺម្នាក់។ ដែកតូចៗទាំងនោះរួមមាន ខ្សែដៃ ចិញ្ជៀន ក្នៀបសក់ និងម្ជុលជាដើម។
ស្ត្រីឥណ្ឌាម្នាក់នោះ ត្រូវបានគេស្គាល់ថាមានឈ្មោះថា Sangita។ គាត់ត្រូវបានគេដឹកយកទៅមន្ទីរពេទ្យបន្ទាប់ពីមានការឈឺពោះយ៉ាងខ្លាំង។
ដោយមានការព្រួយបារម្ភខ្លាំង វេជ្ជបណ្ឌិតបានធ្វើតេស្តជាច្រើនសារដើម្បីចង់ដឹងពីមូលហេតុ នៃការឈឺពោះរបស់ស្ត្រីរូបនោះ។
បន្ទាប់ពីធ្វើការពិនិត្យ ពេទ្យមានការស្រឡាំងកាំង នៅពេលពួកគេឃើញដុំដែកតូចៗជាច្រើននៅក្នុងពោះស្ត្រីអ្នកជំងឺនោះ។ អ្នកជំងឺនោះត្រូវបានគេគិតថា បានលេបរបស់ទាំងនោះតាំងពីយូរ ហើយដែកទាំងនោះបានប្រមូលផ្តុំគ្នា ធ្វើឲ្យពោះរបស់គាត់រឹង។
វេជ្ជបណ្ឌិត Nitin Parmar ដែលជាពេទ្យវះកាត់ជាន់ខ្ពស់ នៅមន្ទីរពេទ្យ Ahmedabad Civil ក្នុងប្រទេសឥណ្ឌា បាននិយាយថា “ក្រពះរបស់អ្នកជំងឺនោះបានក្លាយទៅជារឹងដូចដុំថ្ម។ ពួកយើងបានធ្វើការពិនិត្យកាំរស្មីអ៊ិច ហើយវាបានបង្ហាញពីដុំនៅក្នុងក្រពះគាត់”។
វេជ្ជបណ្ឌិតក៏បានធ្វើការវះកាត់ និងយកដែកទាំងនោះ រួមមានខ្សែដៃ ចិញ្ជៀន ក្នៀបសក់ ម្ជុលខ្ទាស់… ចេញពីពោះរបស់គាត់៕
ប្រភព៖ mirror
សុភ័ក្ត្រ