ករណីកកស្ទះចរាចរណ៍ បណ្តាលឲ្យរថយន្តជាច្រើននៅតែបន្តកន្ទុយគ្នា (ពាំងផ្លូវ) គួរឲ្យរន្ធត់ជំនួស ខណៈរថភ្លើងខិតចូលមកដល់ យើងក៏ធ្លាប់បានឃើញដើរ នៅចំណុចស្តុប «ត្រឡោកបែក» យើងហ្នឹង ។ ឥឡូវនេះ ករណីដ៏បុកពោះនេះផងដែរ នៅក្នុងប្រទេសថៃឯណោះវិញក៏បង្កឲ្យមានការភ្ញាក់ផ្អើលថ្មីៗនេះ ហើយត្រូវបានអ្នកប្រើប្រាស់ហ្វេសប៊ុកជនជាតិថៃ បានថតវីដេអូ និងទូន្មានឲ្យមានការប្រុងប្រយ័ត្ន ដើម្បីចៀសផុតពីគ្រោះថ្នាក់កើតឡើង ។
វីដេអូឃ្លីបដែលទទួលបានការទស្សនាជាង ២.៦ លានដង ចាប់តាំងពីត្រូវបានបង្ហោះឡើងបណ្តាញសង្គមកាលពីម្សិលមិញ បានបង្ហាញរថភ្លើង១ខ្សែរត់ចូលមកស្តុបយឺតៗ ដើម្បីទុកឱកាសឲ្យរថយន្តដទៃទៀត បានឆ្លងផុតនៅផ្លូវប្រសព្វ Petchburi-Asoke ។ ទន្ទឹមនោះផងដែរ រថយន្តជាច្រើនគ្រឿងដទៃទៀត ក៏ត្រូវបានឃើញនៅតែស្ថិតនៅលើផ្លូវរបស់វាគួរឲ្យស្រៀវសាច់មែនទែន ។ នេះជារឿងចរាចរណ៍ដ៏ពុំធម្មតាមួយ នៅក្នុងទីក្រុងបាងកក ខណៈឃើញរថយន្តជាច្រើនគ្រឿងបង្ខំឈប់នៅកណ្តាលផ្លូវប្រសព្វទាំងព្រលឹងចុងសក់បែបនេះ ព្រោះតែពួកគេពុំអាចបើកទៅមុខរួច ។ ហើយករណីនេះ ក៏ពុំមែនជារឿងថ្មីនោះទេ ពោលគឺវាបានកំពុងកើតឡើងជាយូរមកហើយ ។
ទាក់ទងនឹងករណីនេះផងដែរ ផេកផ្លូវការរបស់ប៉ូលីសភូមិន្ទថៃ Police TV ក៏បានចែករំលែកវីដេអូដែលកំពុងរីករាលដាលនេះ ដើម្បីក្រើនរំលឹកដល់អ្នកបើកបរទាំងឡាយ ឲ្យឈប់រថយន្តរបស់ពួកគេ មុនភ្លើងចរាចរណ៍ ប្រសិនពួកគេបានឃើញថា ពុំមាន «ចន្លោះផ្លូវ» ដើម្បីឆ្ពោះទៅមុខ ។
ផេកនេះបន្តថា៖ «អ្នកត្រូវបានសន្មត់ឲ្យទុកគម្លាត ឬ ចន្លោះផ្លូវ សម្រាប់រថភ្លើងឆ្លងកាត់ ដែលយ៉ាងហោចណាស់ ក៏គិតពីសុវត្ថិភាពផ្ទាល់ខ្លួនឯងផងដែរ» ៕ ដោយ៖ ឧត្តម (ប្រភព៖ Coconusts)
