ភ្នំពេញ៖ ឃាតករម្នាក់ ដែលចាក់សម្លាប់ប្រធានប្រជាការពារភូមិតាឡីម្នាក់ ត្រូវបានកម្លាំងនគរបាលខណ្ឌដង្កោ ឃាត់ខ្លួនបានហើយ។
លោកវរសេនីយ៍ឯក ជឹម សីុថា អធិការខណ្ឌដង្កោបានអោយដឹងថា ជនសង្ស័យឈ្មោះ ថាច់ សួ ភេទប្រុសអាយុ៤៨ ឆ្នាំជនជាតិខ្មែរ ស្នាក់នៅផ្ទះគ្មានលេខ ភូមិបូរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ ។ ឃាតកររូបនេះ បានប្រើកាំបិតចុងស្រួចចាក់សម្លាប់ប្រធានប្រជាការពារភូមិតាឡី ហើយត្រូវឃាត់ខ្លួនបានហើយនៅចំណុចផ្ទះលេខ នៅភូមិសំបូរមាស សង្កាត់ដង្កោ ខណ្ឌដង្កោនៅថ្ងៃទី១៥ ខែវិច្ឆិកា ឆ្នាំ ២០១៨ វេលាម៉ោង១១និង១០នាទីព្រឹក។
លោកអធិការ បានឲ្យដឹងដា ចំពោះមូលហេតុដែលឈានដល់ការចាក់សម្លាប់ជនរងគ្រោះ គឺផ្តើមចេញពីទំនាស់ទិញលក់ដី ហើយមុនពេលកើតហេតុ ជនរងគ្រោះបានស្ទុះទៅវៃជនសង្ស័យ ទើបធ្វើឲ្យជនសង្ស័យការពារខ្លួន ទាញកូនកាំបិតចាក់ទៅលើជនរងគ្រោះតែម្តងទៅ។ នេះបើតាមការសារភាពរបស់ជនសង្ស័យ។
គួរបញ្ជាក់ថាកាលពីយប់ថ្ងៃទី១៣ ខែ វិច្ឆិកា ឆ្នាំ ២០១៨ ជនសង្ស័យនឹងរងគ្រោះ បានផឹកស៊ីជាមួយគ្នា នៅហាងមួយកន្លែងតាមបណ្តោយផ្លូវព្រៃស ហើយពេលផឹកស្រវឹង ក៏បានទាស់សម្តីគ្នាតិចតួច រឿងរកសីុទិញលក់ដីធ្លី រហូតដល់ម៉ោង១១យប់ ក៏បបួលគ្នាទៅផឹកបន្តទៀត នៅផ្ទះរងគ្រោះ ប៉ុន្តែពេលជិះដល់កណ្តាលផ្លូវ ជនសង្ស័យក៏ យកកូនកាបិតចាក់ទៅលើជនរងគ្រោះចំនួនបីកាំបិតបណ្តាលឲ្យស្លាប់ពេលបញ្ជូនទៅមន្ទីរពេទ្យ ចំណែកជនសង្ស័យ បានរត់គេចខ្លួនបាត់។
បន្ទាប់ពីករណីនេះកម្លាំងសមត្ថកិច្ចខណ្ឌដង្កោ ដែលដឹកនាំដោយលោកវរសេនីយ៍ឯក ជឹម ស៊ីថា បានដាក់កម្លាំងតាមគោលដៅដើម្បីស្វែងរកចាប់ខ្លួនឃាតករ។ កម្លាំងសមត្ថកិច្ច ក៏ក្របួចឃាតករនោះ បានបញ្ជូនទៅកាន់ស្នងការដ្ឋាននគរបាលរាជធានីភ្នំពេញ ដើម្បីបន្តនិតីវិធី៕ ដោយ ៖ បញ្ញាស័ក្តិ
