ប្រភពជាច្រើននៅប្រទេសថៃឱ្យដឹងថា អតីតនាយករដ្ឋមន្ត្រីថៃ Thaksin Shinawatra នឹងជួបលោកPrayut Chan-ocha នៅសិង្ហបុរី ដើម្បីពិភាក្សាអំពីបណ្ដាបញ្ហារបស់ប្រទេសនេះ ក្នុងនោះមានការបោះឆ្នោតនៅឆ្នាំ២០១៩ ខាងមុខ ។
ពាក្យចចាមអារ៉ាមនេះចាប់ផ្តើមផ្ទុះឡើងនៅឱកាសដែលលោក Thaksin បានទៅសិង្ហបុរីដើម្បីជួបមេដឹកនាំថ្មី របស់គណបក្សភឿថៃ (Pheu Thai) ទើបត្រូវបានជ្រើសរើសកាលពីចុងខែតុលា ឆ្នាំ២០១៨ ។ ក្រុមមេដឹកនាំគណបក្សនេះដឹកនាំដោយអ្នកស្រី Sudarat Keyuraphan ដែលជាអ្នកទទួលបន្ទុកការងារបោះឆ្នោតរបស់ភឿថៃ នឹងជួបពិភាក្សាជាមួយលោកThaksin ដើម្បីឯកភាពយុទ្ធសាស្ត្របោះឆ្នោតរបស់គណបក្សនេះ។
មជ្ឈដ្ឋានមេដឹកនាំថ្មីរបស់គណបក្សថៃរក្សាជាតិ (Raksa Chart) ដែលជាកូនគណបក្សរបស់ភឿថៃ (ដើម្បីប្រទេសថៃ) ក៏នឹងមានវត្តមានក្នុងជំនួបជាមួយលោក Thaksin និងរួមទាំងនាយករដ្ឋមន្ត្រី Yingluck។ ស្របពេលជាមួយគ្នានោះ នាយករដ្ឋមន្ត្រី Prayut ក៏កំពុងមានវត្តមាននៅសិង្ហបុរី ដើម្បីចូលរួមអង្គប្រជុំកំពូលជាច្រើននៃសម្ព័ន្ធសមាគមរបស់ បណ្តាប្រទេសអាស៊ីអាគ្នេយ៍ (ASEAN) ។
ប៉ុន្តែនៅព្រឹកព្រលឹមថ្ងៃទី១៥ ខែវិច្ឆិកា ឧបនាយករដ្ឋមន្ត្រីថៃ Prawit Wongsuwan និយាយថា លោកគ្មានព័ត៌មានពីរឿងនេះទេ ហើយថាប្រការនេះមិនអាចកើតឡើងបានឡើយ ទោះបីអ្នកទាំងពីរមានវត្តមាននៅ សិង្ហបុរីក្តី។ ឧបនាយករដ្ឋមន្ត្រីរូបនេះឆ្លើយប្រាប់អ្នកកាសែតថា៖ យ៉ាងណាខ្ញុំជឿថា នាយករដ្ឋមន្ត្រី Prayut នឹងមិនជួបលោកThaksin នៅសិង្ហបុរីទេ ព្រោះរវាងអ្នកទាំងពីរមានគោលដៅដោយឡែកក្នុងដំណើរទៅកាន់ទីនោះ នាយករដ្ឋមន្ត្រីទៅបេសកកម្ម ចំណែកលោកThaksin ទៅទេសចរណ៍។
នៅមិនទាន់ឃើញមានប្រតិកម្មអ្វីពីលោកThaksin និងភឿថៃទេ ក្នុងពេលនោះលើគណនី Facebook ឯកជន របស់អ្នកស្រីYingluck បានបង្ហោះរូបភាពរបស់ខ្លួននិងបងប្រុសពេលទាំងពីរស្ថិតនៅក្រុង Kiev, Ukraine អមដោយសំណេរថា៖ «…ពលរដ្ឋប្រទេសនេះបានឆ្លងកាត់រយៈពេលដ៏ពិបាកបំផុតក្នុងសម័យសង្គ្រាម ហើយឥឡូវគេបានក្លាយជាប្រទេសថ្កុំថ្កើងដូចពេលនេះ…»៕សូយន
