កីឡាករម្នាក់ដែលចូលរួមការរត់ប្រណាំងពានរង្វាន់ Nanchang Internatiol Marathon ចម្ងាយ៤២គីឡូម៉ែត្រ នៅទីក្រុង Nanchang , ខេត្ត Jiangxi ប្រទេសចិន ។ ពេលទៅដល់គោលដៅ ស្រាប់តែគាត់លុតជង្គង់ទ្រហោយំ។
នៅពេលដែលគណៈកម្មការមានការងឿងឆ្ងល់ សាកសួរ ទើបដឹងថា គាត់ឈ្មោះ Li Gang ហើយគេបានឃើញគាត់ក្តាប់ណែនក្នុងដៃរូបថតកូនប្រុសវ័យជំទង់ ដែលតាមគាត់ឱ្យដឹងនោះតាំងពីខែសីហា បន្ទាប់ពីឪពុកកូនទៅចុះឈ្មោះរត់ម៉ារ៉ាតុង ក៏ចៃដន្យកូនប្រុសគាត់បានស្លាប់ដោយសារលង់ទឹក។
ក្នុងសភាពឈឺចាប់គ្មានទីបំផុត Li Gang សម្រេចចិត្តបន្តធ្វើការចូលរួមរត់ប្រណាំងតែម្នាក់ឯងក្នុងចម្ងាយផ្លូវ៤២គីឡូម៉ែត្រនៅថ្ងៃទី១១វិច្ឆិកាកន្លងមក ។ នៅពេលគាត់បោះជំហានផុតគំនូសស ក៏ជាពេលដែលទឹកភ្នែកគាត់ហូរមិនឈប់ឈរ ។ គាត់ឆ្លើយទៅគណៈកម្មការថា៖ «កូនប្រុសសម្លាញ់ចិត្តរបស់ខ្ញុំគួរណាស់តែនៅទីនេះជាមួយខ្ញុំនៅពេលនេះ» ។
លោកLi រំលឹកថា កាលពីឆ្នាំទៅមិញ យើងរត់ជាមួយគ្នា ចម្ងាយ៤២គីឡូម៉ែត្រ ហើយប្រើពេលអស់៣ម៉ោងនិង៤០នាទី។ កូនប្រុសខ្ញុំលើកទឹកចិត្តដល់ខ្ញុំថា៖ «មិនអីទេពុក! យើងនឹងរត់បានលឿនជាងនេះនៅលើកក្រោយទៀត»។
ក្នុងការរត់ម៉ាតុងឆ្នាំនេះ ពោលគឺមួយឆ្នាំក្រោយដូចសម្តីកូនគាត់ លោកLi ប្រើពេលតែ២ម៉ោង៥៥នាទីប៉ុណ្ណោះ ។ពេលរត់គាត់ពាក់ស្រោមដៃតែម្ខាង ហើយក្នុងនោះគឺរូបថតកូនអភ័ព្វរបស់ខ្លួន។មុនពេលរត់ខ្ញុំបានសន្យាជាមួយវិញ្ញាណក្ខន្ធកូនថា ខ្ញុំនឹងរត់ដល់គោលដៅក្រោម៣ម៉ោងប៉ុណ្ណោះ។ គាត់ស្រែកខ្លាំងៗ «កូនឃើញទេ ពុកពិតជាធ្វើបានដូចសម្តីដែលកូនលើកទឹកចិត្តពុក»។
ការរត់ម៉ារ៉ាតុងអន្តរជាតិនៅ Nanchang មានកីឡាករ កីឡាការិនីចំនួន៣០.០០០នាក់ មកពីពាសពេញពិភពលោកចូលរួម ៕សូយន
