ភ្នំពេញ ៖ ករណីស្ត្រីរកស៊ីពពោះជំនួសដើម្បីទទួលបានថវិការាប់ម៉ឺនដុល្លារ នៅថ្ងៃទី១៥ ខែវិច្ឆិកា ឆ្នាំ២០១៨នេះ ចៅក្រមស៊ើបសួរសាលាដំបូងរាជធានីភ្នំពេញ លោក ម៉ុង មុន្នីសោភា បានចេញដីកាសម្រេចឃុំខ្លួន ជនត្រូវចោទចំនួន៤នាក់ ដាក់ពន្ធនាគារព្រៃស ដើម្បីរង់ចាំការជំនុំជម្រះទោសទណ្ឌជាក្រោយ។
តំណាងអយ្យការ លោក ស៊ិន វីរ: បានចោទចោទប្រកាន់ក្រុមជនសង្ស័យពីបទសមគំនិតក្នុងអំពើលក់ដូរមនុស្ស សម្រាប់ឆ្លងដែន និងធ្វើអន្តរការីរវាងអ្នកសុំកូន និងស្ត្រីពពោះ យោងតាមមាត្រា១៦ នៃច្បាប់ស្តីពីការទប់ស្កាត់អំពើជួញដូរមនុស្ស មាត្រា២៩ និងមាត្រា៣៣២ នៃក្រមព្រហ្មទណ្ឌ។ បើតាមសមត្ថកិច្ច បានឲ្យដឹងថា ក្រុមមេខ្លោងដែលត្រូវ តុលាការសម្រេច ចេញដីកា ដាក់គុករួចហើយរួមមាន៖ ឈ្មោះ សុខ ឃឿន ឈ្មោះ ខៀវ វណ្ណា ឈ្មោះ ចេង សំអុល និងឈ្មោះ អៀង ម៉ាន់។
សូមបញ្ជាក់ថា សមត្ថកិច្ចនគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជធានីភ្នំពេញ បានបញ្ជូនខ្លួនមនុស្ស១៥នាក់ ដែលជាប់ពាក់ព័ន្ធករណីរកស៊ីពពោះជំនួស ក្នុងនោះមានប្រុស២នាក់ និងស្រី១៣នាក់ មកកាន់តុលាការ ដើម្បីចំណាត់ការតាមបីតិវិធី។
ក្រោយបិទការស៊ើបសួរ តំណាងអយ្យការ បានសម្រេចចោទប្រកាន់លើក្រុមជនសង្ស័យមានឈ្មោះ សុខ ឃឿន ឈ្មោះ ខៀវ វណ្ណា ឈ្មោះ ចេង សំអុល និងឈ្មោះ អៀង ម៉ាន់។ ដោយមនុស្ស១១នាក់ផ្សេងទៀត កំពុងស្ថិតក្នុងចំណាត់ការសាកសួរនៅឡើយ មុនសំណុំរឿងនេះត្រូវបញ្ចប់នៅដំណាក់កាលចៅក្រមស៊ើបសម្រេច។
កាលពីថ្ងៃទី៨ ខែវិច្ឆិកា ឆ្នាំ២០១៨ កម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលរាជធានីភ្នំពេញ ដោយមានការចូលរួមពីអភិបាលខណ្ឌសែនសុខ និងអធិការនគរបាលខណ្ឌ បានចុះបង្ក្រាបទីតាំងមួយកន្លែង ស្ថិតក្នុងខណ្ឌសែនសុខ រាជធានីភ្នំពេញ ដែលពាក់ព័ន្ធករណីស៊ីឈ្នួលពពោះជំនួស ដោយឃាត់ខ្លួនបានមនុស្ស១៥នាក់។ ក្នុងចំណោមមនុស្សស្រីទាំង១៣នាក់នោះ មានមនុស្ស១១នាក់ កំពុងតែមានផ្ទៃពោះ ដែលជាអ្នករកស៊ីពពោះជំនួសផ្ទាល់តែម្ដង ហើយ២នាក់ផ្សេងទៀត ជាចុងភៅ។
ដោយឡែក សម្រាប់ការពពោះនេះ ហើយត្រូវលក់បន្ដទៅឲ្យជនបរទេស ឬជនណានោះ លោក ទូច សារ៉េន មិនទាន់បានបញ្ជាក់នៅឡើយទេ ព្រោះលោកថាមនុស្សទាំងអស់ កំពុងតែស្ថិតក្រោមការសួរនាំរបស់សមត្ថកិច្ចជំនាញ ដើម្បីកសាងសំណុំរឿងចាត់វិធានការតាមផ្លូវច្បាប់។ ករណីពពោះជំនួសនេះនៅកម្ពុជា ត្រូវបានចាត់ទុកថាជាអំពើខុសច្បាប់ ខណ:ដែលក្រសួងមហាផ្ទៃ កំពុងតែធ្វើការចងក្រងច្បាប់ ដើម្បីធ្វើការផ្ដន្ទាទោសតាមច្បាប់៕ ដោយ ៖ បញ្ញាស័ក្តិ
