ខេត្តកំពត ៖ ឯកឧត្តម ជាវ តាយ អភិបាល នៃគណៈអភិបាលខេត្តកំពត និងលោកជំទាវ- ឯកឧត្តម អុឹង ម៉េងហួរ ប្រធានក្រុមប្រឹក្សាខេត្តកំពត និងលោកជំទាវ ព្រមទាំងមន្ត្រីថ្នាក់ដឹកនាំមន្ទីរស្ថាប័នពាក់ព័ន្ធមួយចំនួនទៀត បានដឹកនាំបើកកម្មវិធីប្រណាំងទូក ក្នុងដង ព្រែកកំពង់បាយ មានទីតាំងស្ថិតនៅក្នុងក្រុងកំពត កាលពីព្រឹកថ្ងៃសុក្រ ទី១៦ ខែវិច្ចិកា ឆ្នាំ២០១៨។
មន្ត្រីរដ្ឋបាលសាលាខេត្តកំពត បានឱ្យដឹងថា ការរៀបចំពិធីនេះឡើង ប្រយោជន៍ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកប្រពៃណីជាតិដែលនឹងចាប់ផ្តើមរយៈពេល៣ថ្ងៃចាប់ពីថ្ងៃទី២១-២២-២៣ ខែវិច្ឆិកា ឆ្នាំ២០១៨នេះ។
ពិធីនេះ មានការអញ្ជើញចូលរួមពី ថ្នាក់ដឹកនាំ មន្ត្រីរាជការមន្ទីរ ប្រជាពលរដ្ឋ លោកគ្រូ អ្នកគ្រូ សិស្ស និស្សិត និងកងកម្លាំងប្រដាប់ អាវុធយ៉ាងច្រើនកុះករ បានមកអបអរសាទរ ដោយក្នុងម្នាក់ៗមានទឹកមុខសប្បាយរីករាយ។
មន្ត្រីព័ត៌មានរដ្ឋបាលខេត្តកំពត បានឱ្យដឹងទៀតថា ពិធីប្រណាំងទូកឆ្នាំ២០១៨នេះ ប្រភេទទូក ដែលចូលរួមប្រកួតមាន៖ ប្រភេទទូកសមុទ្រ ទូកវែង និងទូកកៃយ៉ាក់ សរុបមានចំនួន៦០ទូក។ ហើយថា ការប្រណាំងទូកខាងលើនេះ គឺក្រោមការជួយឧបត្តម្ភពីសំណាក់ ឯកឧត្តម លោកជំទាវ ដែលជាថ្នាក់ដឹកនាំ រដ្ឋបាលខេត្តកំពត និងថ្នាក់ដឹកនាំឬប្រធានមន្ទីរ អង្គភាព សាលាក្រុង ស្រុកទាំង៨ ក្រោមឱវាទខេត្ត និងការជួយឧបត្ថម្ភពីសប្បុរសនានា ក្នុងខេត្តកំពតទាំងមូល។
នាឱកាសនោះដែរ ឯកឧត្តម ជាវ តាយ អភិបាលខេត្តកំពត មានប្រសាសន៍ថា ការប្រារព្ធពិធីអុំទូក ដ៏សប្បាយរីករាយ កាលពីព្រឹកមិញនេះ បានបង្ហាញឱ្យឃើញពីវប្បធម៌ នៃសុខសន្តិភាពពេញបរិបូរណ៍ នៅទូទាំងប្រទេសកម្ពុជា ក្រោមម្លប់ដឹកនាំ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តម ជាវ តាយ បានឱ្យដឹងដូច្នេះ រួចបានបង្ហាញបច្ចុប្បន្នភាពខេត្តកំពត ថា បានធ្វើការអភិវឌ្ឍរាល់គ្រប់សមិទ្ធផលនានា លើគ្រប់វិស័យ ក្នុងបំណងបម្រើ នូវសេចក្តីត្រូវការ របស់ប្រជាពលរដ្ឋក្នុងមូលដ្ឋាន ភ្ញៀវទេសចរជាតិ-អន្តរជាតិ ក៏ដូចជាដើម្បីទាក់ទាញចំណាប់អារម្មណ៍អ្នកវិនិយោគិនជាតិ និងអន្តរជាតិ ឱ្យមកដាក់ទុនរកស៊ី ក្នុងមូលដ្ឋានខេត្តកំពត ដែលពោរពេញទៅដោយសក្តានុពលពង្រីកវិស័យសេដ្ឋកិច្ច និងទេសចរណ៍ដ៏សម្បូរបែប៕ ដោយ៖ ដែន សីមា
