ខេត្តព្រះសីហនុ ៖ កម្លាំងសមត្ថកិច្ចនគរបាលចរាចរណ៍ជើងគោក នៃស្នងការដ្ឋាននគរបាលខេត្តព្រះសីហនុ បានឱ្យដឹងថា កាលពីវេលាម៉ោងជាង ៧យប់ ថ្ងៃព្រហស្បតិ៍ ទី១៥ ខែវិច្ឆិកា ឆ្នាំ២០១៨ នៅលើវិថីផែ ត្រង់ចំណុចចំណោតលោកយាយម៉ៅ ស្ថិតក្នុងភូមិ៣ សង្កាត់៣ ក្រុងព្រះសីហនុ មានគ្រោះថ្នាក់ចរាចរណ៍ មួយករណីបានកើតឡើង។
សមត្ថកិច្ចនគរបាល បានឱ្យដឹងបន្តថា គ្រោះថ្នាក់ចរាចរណ៍នេះ បង្កឡើង រវាងរថយន្តធុនធំ១គ្រឿង ម៉ាក HYUNDAI ពណ៌ ស ពាក់ផ្លាកលេខ ព្រះសីហនុ 3A-7037 ( អ្នកបើកបរ មិនទាន់ស្គាល់អត្តសញ្ញាណ) មានទិសដៅ ចេញពីក្រុងព្រះសីហនុ លុះដល់ចំណុចកើតហេតុខាងលើ ក៏បានកៀរ រួចកិនពីលើម៉ូតូ ១គ្រឿងម៉ាក ZOOMER ពណ៌ក្រហម-ខ្មៅ ពាក់ផ្លាកលេខ ភ្នំពេញ 1HD-7389 បើកបរដោយយុវជនជាសិស្សសាលាមួយរូបឈ្មោះ រិទ្ធី ពិសិដ្ឋ អាយុ ១៦ឆ្នាំ មានទីលំនៅ ភូមិ៣ សង្កាត់១ ក្រុងព្រះសីហនុ មានទិសដៅស្របគ្នា បណ្ដាលឲ្យអ្នកបើកបរម៉ូតូ ឈ្មោះ រិទ្ធី ពិសិដ្ឋស្លាប់នៅនឹងកន្លែងកើតហេតុ។
សមត្ថកិច្ចឱ្យដឹងទៀតថា ក្រោយកើតហេតុភ្លាមៗ អ្នកបើកបររថយន្តបង្ក បានរត់គេចខ្លួនបាត់ស្រមោលឈឹង។
បច្ចុប្បន្នចំពោះវត្ថុតាងមានរថយន្ត១គ្រឿង និងម៉ូតូ១គ្រឿង ត្រូវនគរបាលចរាចរណ៍ បានចាត់ចែងនាំយកទៅរក្សាទុកនៅ ការិយាល័យនគរបាលចរាចរណ៍ផ្លូវគោក នៃស្នងការដ្ឋានខេត្តព្រះសីហនុ ដើម្បីរង់ចាំដោះស្រាយនៅពេលក្រោយ៕ ដោយ៖ ដែន សីមា