ព្រះសង្ឃថៃ១អង្គព្រះជន្ម ៦៨ ឆ្នាំ ស្ទើរតែពុំអាចរួចផុតពីអាយុជីវិត បន្ទាប់ពីត្រូវបានខាំយ៉ាងសាហាវ ពីសំណាក់សត្វឆ្កែពូជក្បាលធំ (pit bull) ជិត១០ក្បាល ខណៈព្រះអង្គកំពុងចេញនិមន្តបិណ្ឌបាត នៅជុំវិញក្នុងខេត្ត Samut Songkhram កាលពីថ្ងៃអង្គារ៍ ។ នេះបើតាមទំព័រហ្វេសប៊ុកប៉ូលីសថៃក្នុងតំបន់ចុះផ្សាយឲ្យដឹងកាលពីថ្ងៃពុធ ។
បណ្តារូបភាពដ៏គួរឲ្យអាសូរ ពីរបួសស្នាមដោយចង្កូមឆ្កែចំនួន ៥០ ក្នុងនោះរួមទាំងរបួសធ្ងន់ធ្ងរជាច្រើន ដែលតម្រូវឲ្យពេទ្យត្រូវដេររហូតដល់ ២០ ថ្នេរ ទៅលើព្រះសង្ឃព្រះនាម Phakhru Samutkhanisorn Panyawichuro បានកំពុងរីករាលដាលនៅលើប្រព័ន្ធផ្សាយសង្គមថៃ ។
មេភូមិស្រុក Muang លោក Direk Makhamek បាននិយាយថា ខណៈព្រះសង្ឃរងគ្រោះខាងលើ កំពុងនិមន្តបិណ្ឌបាត នៅពេលនោះ ព្រះអង្គត្រូវបានសត្វឆ្កែក្បាលធំ១ក្បាលដេញតាមប៉ុនប៉ងវាយប្រហារ ហើយនៅពេលលោករត់ត្រឡប់ក្រោយ និងបានដួលទៅនឹងដី ក៏មានឆ្កែ ៥ ទៅ ៦ ក្បាលផ្សេងទៀត ស្ទុះមកវាយប្រហារតែម្តង ។
លោក Direk បន្តថា ឆ្កែកាចសាហាវទាំងនោះ ជាសត្វចិញ្ចឹមរបស់ជាងបាញ់ថ្នាំរថយន្តឈ្មោះ Saman Sitthibutr ដែលពេលនោះគាត់ពុំបាននៅផ្ទះទេ ។ គាត់បានរក្សាទុកពួកវានៅក្នុងបរិវេណរបងផ្ទះ ប៉ុន្តែ សត្វឆ្កែ pit bull ទាំងនោះ មិនដឹងយ៉ាងម៉េច បានគ្រប់គ្រងចេញរួច ។
លោក Direk បានឲ្យដឹងទៀតថា នេះជាលើកទី២ហើយ ដែលសត្វឆ្កែធំៗទាំងនោះបានរួចចេញពីរបងផ្ទះគាត់បែបនេះ ។ លើកទី១ កាលពី២សប្តាហ៍មុន ក៏កើតមានដែរ ។ ហើយគាត់ក៏បានស្នើឲ្យលោក Saman រក្សាទុកសត្វចិញ្ចឹមទាំងអស់នោះរបស់គាត់ ធ្វើយ៉ាងណាកុំឲ្យកើតមានរឿងនេះម្តងទៀត ។
ចំណែកព្រះសង្ឃដែលកំពុងសះស្បើយពីរបួស នៅឯមន្ទីរពេទ្យ Somdet Phra Phutthaloetla ក៏រៀបរាប់អំពីហេតុការណ៍នេះថា ព្រះអង្គបានប្រទះឃើញសត្វឆ្កែ ៧ ក្បាល ឃើញដូច្នេះ គាត់ក៏បានគេចពីពួកវា ដោយនិមន្តទៅអែបនឹងចិញ្ចើមផ្លូវម្ខាងទៀត ប៉ុន្តែ សត្វឆ្កែកាចៗទាំងនោះ បានដេញតាមវាយប្រហារយ៉ាងសាហាវតែម្តង ។
ព្រះអង្គបន្តថា៖ «នៅពេលអាត្មាកំពុងដេកដួលលើដី ខណៈកំពុងត្រូវបានសត្វឆ្កែទាំងនោះខាំហែកហួរ អាត្មាបានគិតថា មិនរស់ទេ ។ ប៉ុន្តែ សំណាងហើយ ដែលបានបងប្អូនអ្នកជិតខាងបានឃើញ និងនាំគ្នាបង្ក្រាបពួកឲ្យចាកចេញ ហើយប្រញាប់ប្រញាល់នាំយកអាត្មាមកសង្គ្រោះនៅមន្ទីរពេទ្យ» ។ ព្រះអង្គក៏បានបញ្ជាក់ថា «ម្ចាស់សត្វឆ្កែបង្កទាំងនោះ គាត់បានទទួលខុសត្រូវចំពោះហេតុការណ៍នេះហើយ ។ គាត់បានពន្យល់ថា គាត់បានរក្សាទុកពួកវានៅក្នុងរបងផ្ទះ ប៉ុន្តែ ពុំនឹកស្មានពួកវាអាចចេញរួចសោះ ។ ទោះយ៉ាងណា អត្មាមិនចង់ស្តីបន្ទោសទៅលើអ្នកណាម្នាក់ទេ ព្រោះគ្មាននរណាម្នាក់ចង់ឲ្យកើតមានរឿងបែបនេះនោះទេ ។ ប៉ុន្តែ អត្មាក៏សូមទទួចដល់ម្ចាស់សត្វឆ្កែទាំងអស់ គួរធ្វើឲ្យប្រាកដថា សត្វចិញ្ចឹមរបស់ពួកគេនឹងមិនបង្កបញ្ហាដល់អ្នកដទៃ» ៕ ដោយ៖ ឧត្តម (ប្រភព៖ The Nation)