លោកតាវ័យ ៨៤ឆ្នាំម្នាក់ នៅខេត្តសុរិន្ទ ប្រទេសថៃ ទើបលាចាកលោកដោយគ្រោះថ្នាក់ចរាចរ ។ គ្រួសារបានរៀបចំពិធីបុណ្យសពជូនគាត់ដោយមានការចូលរួមយ៉ាងកុះករពីសាច់ញាតិ មិត្តភក្តិ អ្នកភូមិ ។
ស្មានពុំដល់ថា “តួអង្គ” ដែលពុំត្រូវបាន “អញ្ជើញ” សោះ បែរជាដើរតម្រង់មកកន្លែងតម្កល់មឈូសរបស់គាត់ ។
នោះគឺដំរីមួយក្បាល ដែលគាត់ថែទាំចិញ្ចឹមបីបាច់វា ១០ឆ្នាំមកហើយ ។
កូនប្រុសរបស់គាត់ចែករំលែកថា ពេលគាត់កើតទុក្ខ ព្រោះឪពុកស្លាប់ក៏និយាយប្រាប់វាដើម្បីឲ្យធូរចិត្តប៉ុណ្ណោះ ។ ប៉ុន្តែស្មានពុំដល់សោះថាវាយល់ ហើយតក់ស្លុតខ្លាំងណាស់ ។ វាទាញបណ្តាច់ខ្សែ ហើយបោលសំដៅកន្លែងតម្កល់មឈូស ។ វាបន្ទន់ជើងទាំង ៤ ក្រាបដល់ដីជាមួយនឹងទឹកភ្នែកហូរហាម ។ ទិដ្ឋភាពនេះ ពិតជាធ្វើឲ្យអ្នកចូលរួមរញ្ជួយចិត្តយ៉ាងខ្លាំង ។
ដោយវាពុំព្រមងើប ហើយមានសភាពសោកសង្រេងខ្លាំង កូនរបស់គាត់ក៏លោតជិះពីលើកវា ហើយបបោសអង្អែលលួងលោមវា ។
វាក្រោកឈរសន្សឹមៗ ហើយឱនក្បាលគោរពជាច្រើនសារ ហាក់ដូចជាការថ្លែងអំណគុណចំពោះទឹកចិត្តម្ចាស់ចំពោះវា ១០ឆ្នាំកន្លងមក ។
ចុងក្រោយវាបែរជាដើរចេញយ៉ាងស្ងៀមស្ងាត់… ។
គិតទៅសត្វពេលខ្លះ… ៕
ចន្ទ្រា